ၜဳကလေၚ်၊ သေပ်တေမ်ဗာ ၂၆
ကံၚ်ဇြဳပၞာန် ထ္မံက်ဒၟံၚ်ရုပ်ရဴ သၞောတ်ဂီုကၠီုညးဍုၚ်ကွာန်တံဂှ်ဝွံ ပ္ဍဲကဵုတွဵုရးဍုၚ်မန် ပွိုၚ်ဍုၚ်လ္ၚဵုတံဂှ် သွက်ဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်တံဂှ် ကော်ကောန်ဂကောံတုဲ ကဵုဒၟံၚ်တန်ဗ္တောန်ဒၟံၚ်ယျဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ဂွံဒက်ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ် ပ္ဍဲကဵုကွာန်အရာပ်တံဂှ် တုဲကၠုၚ်ဂိတုအဝ်ဂါတ်ကြပ်အိုတ်တေံ ပ္ဍဲကဵုပွိုၚ်ဍုၚ်ၜဳကလေၚ်၊ သဓီု၊ ၜါသွာၚ် ကေုာံ ပ္ဍဲကဵုပွိုၚ်ဍုၚ်ရေဝ်တံဂှ် ဂကောံအုပ်ဓုပ်ကွာန်အရာပ် သၟဝ်တဲကံၚ်ဇြဳပၞာန်တံ ပကောံဒၟံၚ်ကောန်ဒပ်တၟိတၟိရ။
အခိၚ်လၟုဟ် ပ္ဍဲကဵုပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်ရေဝ်ဂှ် သွက်ဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်ဂှ် လ္တူဍုၚ်တံကဵု ပ္ဍဲကဵုကွာန်အရာပ်လ္ၚဵုတံဂှ် ကဵုသြန်တုဲစန်ဒက်ကီု၊ ကော်ကေတ်မၞိဟ်မစုက်လုက်တံဂှ်တုဲ ကဵုဒၟံၚ်တန်ဗ္တောန် ဂွံၜိုတ်စှ်တ္ၚဲယျဂှ် ဂွံတီကေတ်ရ။
ညးဒေသဍုၚ်ၜဳကလေၚ်မွဲတၠဂှ် သွက်ဂွံဒက်ပ္တန်ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ် ကဆံၚ်အရာပ်၊ ကဆံၚ်ကွာန် ပ္ဍဲကဵုအရာပ်လ္တူဍုၚ်တံဂှ်တုဲ နဆန္ဒဇကုဇကု မၞိဟ်ပါကၠုၚ်ဂှ် ၁၈ တၠ နွံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“စန်ဒက်ဂှ်တှ်ေ ဗီုပြၚ်ဂီုကၠီုအရာပ်တံရဏောၚ်။ ဒၞါဲလဵုဟွံဒးအာ၊ ဒၞါဲလဵုမှ ဟွံဒးဗ္တိုက်ပၞာန်ပုဟ်။ ရန်တၟံကဵု အရာပ်ညး ညးစဵုဒၞါရဏောၚ်။ ဟီုလဝ်သာ်ဏံရ။ သြန်ဂိတုဂှ်တှ်ေ ပိကိုဋ်၊ သြန်ထံက်ပၚ်ဂှ်တှ်ေ တၞဟ်ဟ်ပၠန်။ ပြဟ်ဟ်ဏံ ထံက်ပၚ်ကဵုဒၟံၚ်အရာတံဏံ နွံရ” သာ်ဝွံ သ္ဂးရ။
နကဵုကံၚ်ဇြဳပၞာန် ဟိုတ်နူပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်ဂှ်တုဲ ဇြဟတ်ဒပ်လေၚ်ဒိုက် က္တဵုဒှ်ဒၟံၚ် ဗွဲမဂၠိုၚ်ဂၠေၚ်ဂှ်ရ ဂွံကလေၚ်ဗပေၚ်ဇြဟတ်နွံပၟိက်တံဂှ် ထ္မံက်ဒၟံၚ်ရုပ်ရဴ သၞောတ်ဂီုကၠီု ညးဍုၚ်ကွာန်တံ မပါလုပ်ဂှ်ရ။
ဟိုတ်ဂှ်ရ မၞိဟ်တြုံကောန်အရာပ် အာယုက်အကြာ ၃၅ ကဵု ၆၅ သၞာံတံဂှ် ကဵုလုပ်ပ္ဍဲဂကောံဂီုကၠီုညးဍုၚ်ကွာန်တံတုဲ ကဵုတန်ဗ္တောန်ကွတ်ပၞာန် တၞဟ်နသ္ဂောံဂွံကေတ်တာလျိုၚ် ပ္ဍဲကဵုအရာပ် ပ္ဍဲကဵုကွာန် မဆေၚ်စပ်တံဂှ်ရ။
စပ်ကဵုဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်တံဂှ်တုဲ အခိၚ်လၟုဟ် ကံၚ်ဇြဳပၞာန် ကဵုဒၟံၚ်တန်ဗ္တောန်ကွတ်ပၞာန် ပ္ဍဲကဵုပွိုၚ်ဍုၚ်လ္ၚဵု နူရးဒေသ ကဵု တွဵုရးမဆေၚ်စပ်တံဂှ် နွံကီုလေဝ် လလောၚ်ပ္တိတ်လဝ်ပရိုၚ် ဗွဲမလုပ်သၞောဝ်ဂှ် ဟွံမွဲဏီရ။
ပ္ဍဲအရာကဵုတန်ဗ္တောန်ဂှ်လေဝ် စၟတ်လဝ်ကဵုလၟေၚ်သတ္တာဟ ဗီုပြၚ်ဏံဂှ် ဟွံဂွံဆဵုကေတ်တုဲ ၜိုတ်မၞိဟ်စန်ဒက်ဂွံ ၜိုတ်လၟိဟ်မဂွံဂှ် ကဵုဒၟံၚ်တန်ဗ္တောန်ကွတ်ပၞာန် ပ္ဍဲကဵုဍုၚ်ဒပ်မဆေၚ်စပ်တံဂှ် ဂွံတီကေတ် ဇရေၚ်ညးဒေသတံရ။
ပွိုၚ်ဍုၚ်ရေဝ် မဒးဒုၚ်လလောၚ်တြးလဝ် နဒဒှ်ပရေၚ်အုပ်ဓုပ်ပၞာန် မွဲပွိုၚ်ဍုၚ်ဓဝ် ပ္ဍဲကဵုတွဵုရးဍုၚ်မန်ဂှ်တှ်ေ ပ္ဍဲဂိတုသေပ်တေမ်ဗာ ၁၆ တေံ သွက်ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်တံဂှ် စကဵုဒၟံၚ်တန်ဗ္တောန်ကွတ်ပၞာန် မၞိဟ်တြုံ လၟိဟ် ၅၀ ပြၚ်ရ။
နကဵုပွိုၚ်ဍုၚ်ရေဝ် ဂကောံဇြဟတ်လွဟ်ပၠန်ဂတး ချဳဒရာၚ်ဇြဟတ်ခိုဟ်ဒၟံၚ်ဂှ်တှ်ေ အရာပ်လ္တူဍုၚ် (၉) အရာပ်ဂှ်ကီု၊ ပ္ဍဲကဵုကွာန်ဗ္ဒါဲဗ္ဒါဲ မပ္တံကဵုကွာန်အစေန်၊ ကွာန်အၜဝ်၊ ကွာန်သၞေဟ်ကာ နူကဵုအရာပ် ပ္ဍဲကွာန်တံဏံဂှ်ရ ကော်ဂွံလဝ်ရ။
ညးဒေသရေဝ်မွဲတၠဂှ် ကောန်ဂကောံအုပ်ဓုပ်ကွာန်အရာပ် မဆေၚ်စပ်တံဝွံ ညးမဆက်စပ်ကဵု ညးတံကီု၊ ဒပ်ပၞာန်ဂှ်လေဝ် မၞိဟ်မစုက်လုက်ကဵုဒပ်ပၞာန်တံဂှ်ကီု စန်ဒက်တုဲ ပလံၚ်ဒၟံၚ်တန်ဗ္တောန်တံရောၚ် သ္ဂးရ။
“ကွာန်အရာပ် မဆေၚ်စပ်တံဂှ်တှ်ေ စန်ဒက်မၞိဟ်မဆက်စပ်ကဵုညးတံတုဲ အာပလံၚ်ဒၟံၚ်။ ကဵုစရၚ်တန်ဗ္တောန်။ ပ္ဍဲအရာပ်ဂှ်တှ်ေ နကဵုဗီုပြၚ်ပေါဲသဳကၠဳဂှ် ကၠောန်လဝ်ဇၞော်ဇၞော်ဂှ် ဟွံမိၚ်လဝ်ပုဟ်။ ကော်ကေတ်မၞိဟ်မစုက်လုက်ကဵု ဒပ်ဍေံတံတုဲ ပလံၚ်လဝ်တန်ဗ္တောန်ဂှ် ဂွံမိၚ်ကေတ်ရ” သာ်ဝွံ ဟီုရ။
ကံၚ်ဇြဳပၞာန်ဂှ်တှ်ေ ကဵုတန်ဗ္တောန်ကွတ်ပၞာန် ကုကောန်ဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်တံကီု၊ ဗ္ဂပ်ကဵုလွဟ်လက်နၚ်ကီု၊ ပလံၚ်ဗစိုပ်ထံက်ပၚ်ကဵုကီု ကေုာံ ရီုဗၚ်ဟံၚ်ပြာ်ဆုဲပြံၚ်ကဵု ကောန်ဒပ်ဂွံဝပ်တံဒှ်တမ် သွက်ဂွံပအပ်ကဵုတာလျိုၚ်တံဏံဂှ် စဳဇန်လဝ်ရ။
သ္အာၚ်နူဂှ်ပၠန် ဗွဲမစိုပ်တရဴ ဂွံလုပ်ပေါဲဗ္တိုက်မာန်ဂှ်လေဝ် ပ္ကတ်ပ္ကေၚ်ကဵုနဲကဲဗျူဟာ မကိတ်ညဳကဵု အကာဲအရာတံဂှ်ကီု၊ ကုကောန်ဒပ်တံဂှ်လေဝ် သွက်ဂွံရပ်စပ်စကာအာ ပ္ဍဲကဵုတာလျိုၚ်ဂီုကၠီုတိဍာ် ကေုာံ တာလျိုၚ်ကာစဵုဒၞါ၊ တာလျိုၚ်ဗလးမုက်ပၞာန်တံဂှ် နွံရ။
ဟိုတ်ဂှ်ရ ဂကောံပၠန်ဂတးရပ်လွဟ်မန်တံ ကဵုလဝ်သတိ ကုညးပံၚ်တောဲပါလုပ် ပ္ဍဲဂကောံဂီုကၠီုညးဍုၚ်ကွာန် ကေုာံ ဗ္တိုက်သရိုဟ်ပွပကီုပရာပ်ဂှ် ကေတ်အာအရေဝ် ပိုတ်တ်သ္ကုတ်တ်ဏောၚ် မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−MOI