ကဏ္ဍ ဒး၊ ဗၠေတ်

ဗွဲကြဴဒပ်ပၞာန်သီအဝဵုတုဲ စပ်ကဵုပရေၚ်ချဳဒရာၚ် ပၠန်ဂတးညးဍုၚ်ကွာန်တံတုဲ ပရိုၚ်ဗၠေတ်၊ ပရိုၚ်ပ္တောံ မပြးဇးဒၟံၚ် လ္တူဇာဇၞိက်ပရေၚ်မၞိဟ်တံဂှ် နူကဵုအစဳဇန် ဒးဗၠေတ်ပိုယ်တံဏံ စၟဳစၟတ်ကဵုအာရောၚ်။

တ္ၚဲဏံ ပရိုၚ်ညးထံက်ဂလာန်ဒပ်ပၞာန်တံ မတြးဒၟံၚ် “ကောန်ဂကောံဗော် NLD တံ ဒဒှ်ရဒစဵုဒစး ပြဝပကီုပရာပ် NUG, CRPH ကေုာံ PDF တံတုဲ ထ္ၜးဆန္ဒ ဂတရုၚ် NLD မၞုံပွိုၚ်ဍုၚ်ဆာန်ဨတာဇြာန် မာန္တလေဝ် “ ဂှ် စၟဳစၟတ်ကဵုအာရောၚ်။

ပရူပရာဏံဂှ် ညးထံက်ဂလာန်ဒပ်ပၞာန်တံ စတြးကၠုၚ်လဝ် ပ္ဍဲဂိတုသေပ်တေမ်ဗာ (၂၁) တေံတုဲ နူကဵုအကံက် Telegram တံကဵု ဇာဇၞိက်ပရေၚ်မၞိဟ် နူ Myanmar Informer, ယာန်ညုၚ်အံၚ် ( ရန်ညိမ်းအောၚ်) , People media ဂမၠိုၚ် မလေပ်တြးကၠေံ ပရူပရာထံက်ဂလာန်ဒပ်ပၞာန်တံဂှ် စတြးကၠုၚ်လဝ်ရ။

မွဲကရောံကဵု က္ဍိုပ်လိက် “ပ္ဍဲဂတရုၚ် NLD ပွိုၚ်ဍုၚ်ဆာန်ဨတာဇြာန်၊ မာန္တလေဝ်ဂှ် ကောန်ဗော် NLD တံ ဒဒှ်ရဒစဵုဒစး ထ္ၜးဆန္ဒ ကုပြဝပကီုပရာပ် NUG, CRPH ကေုာံ PDF တံ” ဂှ် သီုကဵုဗီုဓာတ် မၞိဟ်မွဲဂကောံ လတက်လဝ်ကယျိုၚ်သာ်ဗ္ကေတ်တံဂှ် ချူတြးကၠုၚ်လဝ်ရ။

အကံက်ပ္တောံ ညးထံက်ဂလာန်ဒပ်ပၞာန်တံ မတြးဒၟံၚ်တံဂှ် ပံက်ဗဵုကေတ် အတိုၚ် Link ဗွဲသၟဝ်တေံမာန်ရ။

စပ်ကဵုပရူပရာ Post ဏံဂှ်တုဲ နူကဵုသြန်လောန်တိုၚ်(မ်) စၟဳစၟတ်စမ်ရံၚ်ဂှ် ဒဒှ်ရညးထံက်ဂလာန်ဒပ်ပၞာန်တံ တြးဒၟံၚ်ဝါဒဂှ် ဂွံဆဵုကေတ်ရ။

စပ်ကဵုလၟေၚ်ဒဒှ်ဏံတုဲ ဌာန်ပရိုၚ် The Irrawaddy Burmese ဂှ် ညးထ္ၜးဆန္ဒတံဝွံ ကောန်ဗော် NLD တံ ဟွံသေၚ်တုဲ ညံၚ်သိက္ခာဗော်ဂွံစှ်ေ ဒှ်ပေါဲထ္ၜးဆန္ဒ မဖန်ဗဒှ်လဝ်မွဲရောၚ် သာ်ဝွံ နိဿဲကေတ် ဂလာန်ဗွိုၚ်ဗော် NLD လ္တူဍုၚ်တံဂှ်တုဲ ချူထ္မံက်ထ္ၜးလဝ်ရ။

ဒၞါဲထ္ၜးဆန္ဒ ရုၚ်ဗော် NLD မၞုံဗ္ဒါဲဂၠံၚ်ဂေတ်ဍုၚ်ဂှ်ကဵု ဂၠံၚ်ဂၞန် (၃၅) ၊ ပွိုၚ်ဍုၚ်ဆာန်ဨတာဇြာန်၊ ဍုၚ်မာန္တလေဝ်ဂှ် ကြဴနူဒပ်ပၞာန်သီအဝဵုတုဲ ဒှ်ရုၚ်မဒးဒုၚ်ဖံက်ဗ္တိုဟ် ပလီုပလာ်လဝ်မွဲရ။

ပ္ဍဲဍုၚ်မာန္တလေဝ်ဂှ် ကောန်ဗော် NLD တံကဵု ညးထံက်ဂလာန်ဗော် လ္တူ (၁၀) တၠတံဝွံလေဝ် ဒးဒုၚ်ကၠတ်ဂစိုတ်လဝ်ကဵု ညးထံက်ဂလာန်ဒပ်ပၞာန်တံကီုရ။

အခိၚ်လၟုဟ်ဂှ် ညံၚ်ဂွံဗလးနူ အန္တရာယ်ကံၚ်ဇြဳပၞာန်ဂှ် ကောန်ဗော် NLD လ္တူဍုၚ်တံကဵု က္ဍိုပ်သ္ကိုပ်ဂမၠိုၚ် ဒးဂြိပ်ဒဴပါဲဒလေတ်ဒၟံၚ်တုဲ ပ္ဍဲသ္ၚိဒၟံၚ်တံဂှ်လေဝ် ညံၚ်သက်သဳ မဆက်စပ်ကဵု ဗော်တံ ဂွိုအ်မွဲဂှ် ဒးပလီုပလာ်ထောံလဝ်အိုတ်ရ။

ပ္ဍဲအကာဲအရာ မက္တဵုဒှ်ဒၟံၚ်သာ်ဏံဂှ် လ္တက်ကယျိုၚ်ဗော် NLD တုဲ ဒဒှ်ရဒစဵုဒစး ပွပကီုပရာပ် ထ္ၜးဆန္ဒသာ်ဏံဂှ်ဝွံ ဒှ်အရာသွက်သ္ဒးဂြိုၚ်ခိုဟ်ရဂှ် ဗွိုၚ်ညးလ္တူဍုၚ်တံ သ္ပတၚ်စၟတ်ဟီုလဝ်ကဵု ဌာန်ပရိုၚ် The Irrawaddy Burmese ရ။

ဌာန်ပရိုၚ် The Irrawaddy Burmese Edition ထ္မံက်ထ္ၜးလဝ်ဂှ်

Mandalay Free Press ထ္မံက်ထ္ၜးလဝ်ဂှ်

ဟိုတ်နူတၚ်နၚ်တံဏံတုဲ ပရိုၚ်ညးထံက်ဂလာန်ဒပ်ပၞာန်တံ မတြးဒၟံၚ် လ္တူဇာဇၞိက်ပရေၚ်မၞိဟ်တံ ပရိုၚ် “ကောန်ဂကောံဗော် NLD တံ ဒဒှ်ရဒစဵုဒစး ပြဝပကီုပရာပ် NUG, CRPH ကေုာံ PDF တံတုဲ ထ္ၜးဆန္ဒ ဂတရုၚ် NLD မၞုံပွိုၚ်ဍုၚ်ဆာန်ဨတာဇြာန် မာန္တလေဝ်” ဂှ်ဝွံ ဒှ်ဆပရိုၚ်ပ္တောံ ညးထံက်ဂလာန်ဒပ်ပၞာန်တံရဂှ် နူကဵုသြန်လောန်တိုၚ်(မ်) စၟဳစၟတ်ကဵုလဝ်ရ။

သြၚ်လောန်တိုၚ်(မ်)