မာၚ်တဝ်၊ သေပ်တေမ်ဗာ (၂၄)
နကဵုတၚ်ထ္ၜးဟိုတ် ပရေၚ်ဂီုကၠီုဂှ် ကောန်ဂကောံဒပ်ကံၚ်ဇြဳပၞာန်တံ ကၟာတ်လဝ်အခေါၚ်တတ်ကၠောံအာကၠုၚ် ပွိုၚ်ဍုၚ်ဗွဲမဂၠိုၚ် မၞုံတွဵုရးရခေၚ်တံဂှ်ရ အပ္ဍဲဒေသ ဒးဆေၚ်ဒၟံၚ်မုက်ကဵု ဇွောံမစၞစပိုတ်အိုတ်တံရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဂျူလာၚ်တုဲကၠုၚ်တေံတုဲ ဒပ်ပၞာန်ရခေၚ် (AA) ကဵု ဒပ်ကံၚ်ဇြဳပၞာန်တံဝွံ ပ္ဍဲသ္ကုတ်သၟဝ်ကျာ တွဵုရးရခေၚ်ကဵု ပ္ဍဲပွိုၚ်ဍုၚ်ပလက်ဝ၊ တွဵုရးချေၚ်တံဂှ် နူကဵုပေါဲဗ္တိုက်ကလေၚ်ဒှ် မွဲဝါပၠန်ဂှ် အခိၚ်လၟုဟ် ပရေၚ်ပၞာန်ၜါလ္ပာ် သာတုဲကြံၚ်မ္ၚိုဟ်ကၠုၚ်ရ။
အခါလၟုဟ်ဂှ် ဒပ်ကံၚ်ဇြဳပၞာန်ဝွံ ပ္ဍဲပွိုၚ်ဍုၚ်မာၚ်တဝ်၊ ယတေအ်ဒံၚ် ကေုာံ ပွိုၚ်ဍုၚ်ဗူတဳဒံၚ် မၞုံတွဵုရးရခေၚ်တံဂှ် ကၟာတ်ဒၞါဗၞတ်ဗ္ၜတ်လဝ် ဂၠံၚ်ဍာ်၊ ဂၠံၚ်တိုက်တံတုဲ အခေါၚ်အာကၠုၚ် ညးဍုၚ်ကွာန်တံဂှ်လေဝ် ပတေၚ်ဂြတ်လဝ်ရ။
ဟိုတ်နူကံၚ်ဇြဳပၞာန် ဗၞတ်ဗ္ၜတ်လဝ် အခေါၚ်အာကၠုၚ်တံဂှ်ရ ညးဍုၚ်ကွာန် နူသ္ကုတ်သၟဝ်ကျာ ပွိုၚ်ဍုၚ်မာၚ်တဝ်တံဝွံ ဇွောံမစၞစပိုတ်အိုတ်တုဲ ညးဍုၚ်ကွာန်ရေၚ်သ္ကအ် ဒးကလေၚ်ပါ်ပရအ်တုဲ စသုၚ်ဒၟံၚ်အိုတ်ရဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ၜိုတ်ပိုယ်တီဂှ်တှ်ေ ပ္ဍဲသ္ကုတ်ဇွောံမစၞစဂှ်မ္ဂး စၞစတံဂှ် ကွာန်လ္ပာ်တေံ လ္ပာ်ဏံ ပါ်ပရအ်တုဲ ဒးစသုၚ်ဒၟံၚ်ဍာ်အိုတ်ရ၊ နူကဵုပွိုၚ်ဍုၚ်တံဂှ် ယဝ်ရထံက်ပၚ် ရဲကွာန်တံ၊ ညးပါဲဒလေတ်ဘဲပၞာန်တံဂှ်မ္ဂး ဒဒှ်မကၟာတ်လဝ်ဂၠံၚ်တံ၊ ကၟာတ်လဝ်ပရေၚ်ဆက်စၠောံတံ အဆံၚ်ၚ်နွံတုဲ ဒးအာကၠုၚ် ခက်အာညိညရ၊ မၞိဟ်မိက်ဂွံထံက်ပၚ်တံဂှ် ထံက်ပၚ်ဟွံဂွံ ဒှ်ဒၟံၚ်ဍာ်ဏံရ” ဂှ် ညးသ္ဂးရ။
သ္အာၚ်နူဂှ်ပၠန် ပ္ဍဲသ္ကုတ်သၟဝ်ကျာ ပွိုၚ်ဍုၚ်မာၚ်တဝ်ဂှ်လေဝ် စနူတ္ၚဲအကြာတံဏံတုဲ ဒပ်ပၞာန်ရခေၚ် (AA) ကဵု ဒပ်ကံၚ်ဇြဳပၞာန်တံ က္တဵုဒှ်ဒၟံၚ် ပေါဲဗ္တိုက်တုဲ ညးပါဲဒဴဘဲပၞာန်တံ ထပ်ဂၠိုၚ်ကၠုၚ်တုဲ ပ္ဍဲကွာန်လ္ၚဵုတံဂှ် ဒးဒုၚ်ကၟာတ်ဒၞါလဝ်ကဵု သၞေဟ်ကၚ်စၟဳစၟတ်ကံၚ်ဇြဳပၞာန်တံဂှ်ရ ဒှ်ဒၟံၚ်အခက်အခုဲ ပရေၚ်အာကၠုၚ်တံရဂှ် ညးဒေသတံ သ္ဂးအိုတ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၁၆) တေံဂှ်လေဝ် ရုၚ်ကုလသမဂ္ဂ မၞုံပ္ဍဲပွိုၚ်ဍုၚ် မာၚ်တဝ်၊ ဗူတဳဒံၚ်၊ ယတေအ်ဒံၚ်၊ မျံက်ဥူ၊ မေန်ပျာ ကေုာံ မျေဗမ်တံ မပါလုပ် သီုကဵု ဂကောံဗွိုၚ်မှာဇန် (NGO/INGO) တံဂှ် ကံၚ်ဇြဳပၞာန်စၞောန်ပ္ညုၚ်လဝ် သွက်ဂွံဒေါအ်ဒေၚ်ကဵု ပွမကဵုအရီုဗၚ် စပ်ကဵုပရေၚ်ဗ္စာရဏာမၞိဟ်တံကီု သီုအခေါၚ်အာကၠုၚ်တရဴတံကီုရ။
အရာပ်လ္တူဍုၚ်တံဟွံသၟေဟ် ဟိုတ်နူကံၚ်ဇြဳပၞာန် ပတေၚ်ဂြတ်လဝ် အခေါၚ်အာကၠုၚ်တရဴတံ၊ ပွမကၟာတ်ဆိုအ်တံဂှ်ရ ပ္ဍဲဗ္ဒိုပ်ပါဲဒဴဘဲပၞာန် မၞုံအပ္ဍဲပွိုၚ်ဍုၚ်တံဂှ် ဇွောံမစၞစပိုတ်အိုတ်တုဲ က္တဵုဒှ်ကၠုၚ် စဵုကဵုအကာဲအရာ ဒးစဒၟံၚ်ပုၚ်ၜိုဟ်တံအိုတ်ရဂှ် ညးဒေသမျံက်ဥူမွဲတၠ ဟီုရ။
“စနူတ္ၚဲဏေံတေံတုဲ ပ္ဍဲဗ္ဒိုပ်ပါဲဒဴဘဲပၞာန်ဍုၚ်မျံက်ဥူဂှ် ဇွောံမစၞစပိုတ်အာအိုတ်တးတုဲ ဒှ်ဒၟံၚ်အကာဲအရာ ဒးစဒၟံၚ်ပုၚ်ၜိုဟ်အိုတ်ရ၊ ပ္ဍဲညးပါဲဒဴဘဲပၞာန် မၞုံပွိုၚ်ဍုၚ်တၞဟ်ဟ်တံလေဝ် ဇွောံမစၞစတံ ပိုတ်အိုတ်ဒၟံၚ်ယျ” သာ်ဝွံ ညးဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပွိုၚ်ဍုၚ်မျံက်ဥူဂှ် ဗ္ဒိုပ်ပါဲဒဴဘဲပၞာန် ဟွံအောန်နူကဵု (၂၈) ဗ္ဒိုပ် မၞုံဒၟံၚ်တုဲ လၟိဟ်မၞိဟ် ၜါဠက်ပြၚ် မၞုံဒၟံၚ်ဂှ်ရ ဟွံဂွံအခေါၚ်အာစိုပ် ကဵုရီုဗၚ် အရီုဗၚ်ပရေၚ်ဗ္စာရဏာမၞိဟ် ကုညးပါဲဒဴဘဲပၞာန်တံဂှ်ရ ညးပါဲဒဴဘဲပၞာန်တံ သာတုဲစိုပ်ဒဒိုက်မာန်ရောၚ် သ္ဂးရ။
မွဲလ္ပာ်ဂှ်လေဝ် ပ္ဍဲပွိုၚ်ဍုၚ်မိုၚ်တဝ်၊ ဗူတဳဒံၚ်၊ ယတေအ်ဒံၚ်၊ ကျံက်ဒဝ်၊ မျံက်ဥူ နူအပ္ဍဲတွဵုရးတံဂှ် ကဵု ပ္ဍဲပွိုၚ်ဍုၚ်ပလက်ဝ တွဵုရးချေၚ်တံဂှ် အခိၚ်ပေါဲဗ္တိုက်ၜါလ္ပာ် အသိၚ်သ္ကာတ်မြဟ်ကၠုၚ်မံၚ်ဂှ် လိက်အမိၚ် နူသ္ကိုပ်ရးသ္ကုတ်ပလိုတ် သ္ကိုပ်ဗိုလ်ထေန်လက်ဥူ စၞောန်လဝ်မွဲဂှ်လေဝ် တိတ်ကၠုၚ်လဝ်ရ။
ပ္ဍဲလိက်စၞောန်အမိၚ်ဂှ် အိုဿီုကဵုသၞေဟ်ကၚ်စၟဳစၟတ်တံ စက်ယာဉ်လဵုဒှ်ဒှ် ညံၚ်ဂွိုအ်ကဵု အခေါၚ်တတ်ကၠောံအာကၠုၚ်ကီု၊ သွက်ဂွံစၟဳစၟတ်အာ ဗွဲမစှ်ေကဵုသၞောတ် ကုသၞေဟ်ကၚ်စၟဳစၟတ် သီုဂၠံၚ်ဍာ် ဂၠံၚ်တိုက်တံဂှ်ကီု၊ ကော်ကောံဓရီု ကုတၠကမၠောန် ပရေၚ်ပိုန်ဒြပ်တံ၊ သၞာဲဒဴတံတုဲ ယဝ်ရဆက်စၠောံကဵု AA မ္ဂး ကေတ်အာအရေဝ် ဗွဲမစိုပ်တရဴရောၚ် ထ္မံက်ထ္ၜးလဝ်ရ။
ပ္ဍဲတွဵုရးရခေၚ် ပေါဲဗ္တိုက်ကလေၚ်မွဲဝါပၠန်တံ မသ္ကာတ်မြဟ်ကၠုၚ်ဒၟံၚ်ဂှ် ဒပ်ပၞာန်ရခေၚ် (AA) သီဂိုၚ်ဂွံလဝ် ဗ္ဒိုပ်ဒပ်မၚ်ပယျဵုကံၚ်ဇြဳပၞာန် တိုၚ်သမ္တီ (၄၀) ကဵု ဗ္ဒိုပ်တိုက် (၂) ဗ္ဒိုပ် တမ်ဒပ် ခမရ (၃၅၂) ကံၚ်ဇြဳပၞာန်တံရ။
ပရိုၚ်−သြၚ်လောန်တိုၚ်(မ်)