လ္ဂုၚ်၊ သေပ်တေမ်ဗာ (၂၆)
သ္ကိုပ်ဗိုလ်ဒေါအ်ဇူ ကံၚ်ဇြဳပၞာန် ဥုံတွေန် ကဵု ကောန်ခမာန်ညး ဗိုလ်ဇၞော်ဒေါအ်ဇူ ယျေဝ်တေသ တံဂှ် ဂကောံဒမၠုက် လ္တူဍုၚ်လ္ဂုၚ် Inya Urban Force ကဵု ဂကောံပံၚ်ကောံတံ ပ္ဍဲဂိတုသေပ်တေမ်ဗာ (၂၄) ဇိုၚ်သဝ်တ္ၚဲ ၜိုတ် (၃) နာဍဳဂှ် ပန်ပှော်ပသောၚ်လဝ်ရ။
ပန်ပှော်လဝ် ပ္ဍဲသ္ၚိဒၟံၚ်ညးတံ မၞုံဂၠံၚ် (သဘာဝရိပ်ငြိမ်) ၊ အရာပ် (၁၂) ပွိုၚ်ဍုၚ်လှာၚ် ဍုၚ်လ္ဂုၚ်ဂှ်တုဲ သီုၜါတၠ ချိုတ်အာလဝ် လွဲာဂှ်ရ။
သ္ကိုပ်ဗိုလ် ဥုံတွေန် မဒးချိုတ်အာဂှ်ဝွံ ဒှ်ညးစှ်ေနူ တက္ကသိုလ်ပၞာန် DSA လၟေၚ် (၁၅) တုဲ သီုဒှ်အ္စာ ဒုက္ဍိုပ်သ္ကိုပ် ကံၚ်ဇြဳပၞာန်ရောၚ် နူဌာန်ပရိုၚ်အပ္ဍဲဍုၚ်မွဲ သာ်ဝွံထ္မံက်ထ္ၜးလဝ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ပ္ဍဲအခိၚ်ဒပ်ပၞာန် သီအဝဵုကၟိန်ဍုၚ်ဂှ်လေဝ် ကၠောန်သ္ပပ္တိုန်လဝ်ဂုဏ်စရာဲတံတုဲ နူအပ္ဍဲသၞောဝ်သ္ဇိုၚ် ၂၀၀၈ ဂှ် ဟွံဒးသီအဝဵုမွဲသာ် ထိၚ်ဂွံဒၟံၚ်ရောၚ် ရဴဝွံ ချူလိက်စံၚ်တုဲ ဒှ်ညးကေၚ်ပလံၚ်ဗစိုပ်လဝ်လိက် ကုက္ဍိုပ်သ္ကိုပ်ပၞာန်တံဂှ် ဂွံတီကေတ်ရ။
သ္ကိုပ်ဗိုလ်ဒေါအ်ဇူ ဥုံတွေန်ဂှ်ဝွံ ဒှ်ညးမကေၚ်ယိုက်ဂၠေၚ်လဝ် တာလျိုၚ် နဒဒှ်အမာတ်ကလုတ် သဳရိလၚ်္ကာ၊ အမာတ်ကလုတ် ဗေန်ဂလာဒေတ်၊ အမာတ်ကလုတ် မဝ်(လ်) ဒိုက် ကေုာံ အမာတ်ကလုတ် အာဖရိကသၠုၚ်ကျာ စပ်ကဵုကၟိန်ဍုၚ်ဗၟာတံဂှ် ဂွံတီကေတ်ရ။
ကၠာဂွိုအ်ပြဟ်လလုဲဂှ် ကၠောန်ဒၟံၚ်ကမၠောန် နဒဒှ်မၞိဟ်ဖျေံတန်ဗ္တောန် ပ္ဍဲတက္ကသိုလ်ပရေၚ်စဵုဒၞါဒပ်ပၞာန် (National Defence Collage -NDC) ကဵု ကောန်ဂကောံနာယက ဂကောံသၞာဲဒဴပၞာန်တြေံ မဒှ်ဂကောံကဵုအထံက်အရီု ဒပ်ပၞာန်တံဂှ် ဂွံတီကေတ်ရ။
ဟိုတ်နူဂကောံ Inya Urban Force ပန်ပှော်ပသောၚ်လဝ်ဂှ်ရ မွဲကရောံကဵု သ္ကိုပ်ဗိုလ်ဒေါအ်ဇူ ဥုံသွေန်ဂှ် ကောန်ခမာန်ညး ဗိုလ်ဇၞော်ဒေါအ်ဇူ ယျေဝ်တေသဝွံလေဝ် ဒးချိုတ်အာလဝ်ရောၚ် ပရိုၚ်အပ္ဍဲဒေသတံ ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)