မတ်မလီု၊ ဒဳဇြေမ်ဗာ ၃၁
ပ္ဍဲတွဵုရးဍုၚ်မန်ဂှ် အပ္ဍဲဂိတုဏံ ကံၚ်ဇြဳပၞာန် ထ္ၜးဟိုတ်နာနာသာ်တုဲ အခိၚ်ဗ္တံ ရပ်ဒက်ကၠုၚ်သၟတ်တံ ဆက်ကၠုၚ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုပရေၚ်ရပ်ဒက်ဂှ် ညးမကလိလောန် ဖံက်ပ္ကဝ်အမိၚ်ဒေသန္တရ၊ ညးတိတ်မ္ၚးအာကၠုၚ်အခိၚ်ဗ္တံတံသၟးဟွံက ထ္ၜးဟိုတ်ကဵုစရၚ်ကၟုဲတုဲ လုပ်စိုပ်ရပ်ဒက်ကၠုၚ် စဵုကဵုအပ္ဍဲသ္ၚိတံ နွံကၠုၚ်ရ။
အတိုၚ်သြၚ်လောန်တိုၚ်(မ်) ဂၠိုက်ဂၠါဲစၟဳတ်ဂွံဂှ်မ္ဂး ရပ်ဒက်ကၠုၚ်သာ်ဏံဂှ်ဝွံ က္တဵုဒှ်ဒၟံၚ် ပ္ဍဲတွဵုရးဍုၚ်မန် သီု ၁၀ ပွိုၚ်ဍုၚ်ဂှ်ဏောၚ်တုဲ ပ္ဍဲကဵုဏံ ပ္ဍဲကဵုခရိုၚ်သဓီု ပန်ပွိုၚ်ဍုၚ်ဂှ် ဒးဒုၚ်ရပ်လဝ်ဂၠိုၚ်အိုတ်ရ။
ညးဒေသသဓီုမွဲတၠဂှ်တှ်ေ ကၠာတေံ နူကဵုရပ်ဒက်ကၠုၚ် ရဲတိတ်မ္ၚးအခိၚ်ဗ္တံတံသၟးဂှ် ဗွဲကြဴဏံ နကဵုဟိုတ်စရၚ်ကၟုဲဂှ် လုပ်စိုပ်ရပ်ဒက်ဒၟံၚ် စဵုကဵုအပ္ဍဲသ္ၚိတံ နွံဒၟံၚ်ရောၚ် ဟီုရ။
“ကၠာတေံဂှ်တှ်ေ တိတ်ဗ္တံတုဲ ရပ်ကၠုၚ်ဒၟံၚ်ရ။ လက္ကရဴဏံဂှ် ဗီုဏံဟွံသေၚ်ရပုဟ်။ စၟဳတ်စရၚ်ကၟုဲဏောၚ်ဂးတုဲ လုပ်စၟဳတ်။ ပ္ဍဲသ္ၚိစၟဳတ်စရၚ်ကၟုဲဂှ် သၟတ်ညးမလုပ်အဝေါၚ် ပ္ဍဲသၞောဝ်ယိုက်လျိုၚ်ပၞာန်ဏံ နွံတှ်ေ ကော်ဏာလဝ် မွဲတဲဓဝ်” သာ်ဝွံ သ္ဂးရ။
သၟတ်ဒးဒုၚ်ရပ်ဗွဲမဂၠိုၚ်ဂှ် လ္ပာ်ကံၚ်ဇြဳပၞာန် ကလေၚ်ဗလးကဵုလဝ်ဂှ်ဟွံမွဲ၊ ရပ်ဒက်ပကောံပကၠုၚ်ကောန်ပၞာန်တံဂှ် နွံဒၟံၚ်တုဲ ရဲကဵုလှုဲမာန်တံဂှ်တှ်ေ ကဵုလှုဲတုဲ ကလေၚ်ဗၠးကၠုၚ်ဂှ် ညးဒေသတံ ဟီုရ။
မိမမွဲတၠ နူပွိုၚ်ဍုၚ်ပံၚ် မကဵုကၠုၚ်ပရိုၚ်ဇရေၚ်သြၚ်လောန်တိုၚ်(မ်) ဂှ်တှ်ေ ကောန်ဗၠာဲညး အခိၚ်အာပေါဲဂှ် ဒးဒုၚ်ရပ်လဝ်ဗွဲအဓမ္မတုဲ လအ်ကၠုၚ်စဵုကဵုပွိုၚ် ၁၀ တ္ၚဲကီုလေဝ် ဟွံဂွံအဆက်ဏီပုဟ်ဂှ် ဟီုရ။
ညးဒေသမုဟ်ဍုၚ်မွဲတၠဂှ်လေဝ် အခိၚ်ဗ္တံ လ္ပာ်ကံၚ်ဇြဳပၞာန်တံ ရပ်ဒက်ဗွဲအဓမ္မ တံၚ်ရပ်ပဝ်တာ ပကောံဒၟံၚ်ကောန်ပၞာန်ဂှ်တုဲ အခိၚ်ဗ္တံ မၞိဟ်တိတ်မ္ၚးအာကၠုၚ်တံ စဵုကဵုဟွံမွဲ အောန်အာယျဂှ် ဟီုရ။
“ ဒှ်ဒၟံၚ် ပ္ဍဲအရာပ်လ္တူဍုၚ်မုဟ်ဍုၚ်ပိုယ်တံ။ ဒၞါဲမၞိဟ်ပိုတ်ဂှ် သ္ပအဓိက မၚ်ရပ်ဒၟံၚ်။ တ္ၚဲတုဲကၠုၚ်တေံဂှ် သၟတ် ၜိုတ် မသုန်တြဴတၠ ဒးဒုၚ်ရပ်လဝ်။ လက္ကရဴဏံ အခိၚ်ဗ္တံတှ်ေ ညးမွဲမှ ဟွံဂံၚ်တိတ်မ္ၚးရပုဟ်” သာ်ဝွံ သ္ဂးရ။
အခိၚ်ဗ္တံ သၟတ်တံ ဒးဒုၚ်ရပ်ပပဝ်တာ ဒးဒုၚ်ရပ်ဒၟံၚ်ကီုလေဝ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန်ဂှ်တှ်ေ ပ္ဍဲကဵုပရေၚ်ပရူက္တဵုဒှ်သာ်ဏံ ၁၀ ဂှ် ၜိုတ် ၉ ဂှ်တှ်ေ ဟွံဍာံပြပုဟ်ဂှ် တုဲကၠုၚ်ဟွံလအ်ဂှ် ခၠေဝ်ပလန်ကၠုၚ်လဝ်ရ။
ဆ္ဂး အတိုၚ်ဂလာန်ညးမစုက်လုက်ကဵုကံၚ်ဇြဳပၞာန်တံဂှ်မ္ဂး လ္ပာ်ကံၚ်ဇြဳပၞာန် ဂွံပံက်ကၠုၚ်တန်ဗ္တောန်ကွတ်ပၞာန် ဇၟာပ်ဂိတုမာန်ဂှ် ရဲဝးပ္ကဝ်အမိၚ်ဒေသန္တရတံကဵု ရဲယၟုပါလဝ်သ္ဂောံယိုက်လျိုၚ်ပၞာန်တံဂှ် သွက်ဂွံရပ်ဒက် ပကောံအာကောန်ပၞာန်တံဂှ် စၞောန်ပ္ညုၚ်လဝ်ရ။
ညးဒေသၜဳကလေၚ်မွဲတၠဂှ်လေဝ် လ္ပာ်ကံၚ်ဇြဳပၞာန်ဂှ် မ္ၚးနူကဵုရဲတိတ်မ္ၚးအခိၚ်ဗ္တံတံဂှ် သီုရပ်ဒက်တံၚ်ရပ်လဝ်ပဝ်တာတံ နွံကၠုၚ်တုဲ အပ္ဍဲဒေသ ပရေၚ်ဒှ်ဓဝိၚ်တံ သၠုၚ်တိုန်ကၠုၚ်ရောၚ် ဟီုရ။
“ကောန်ၚာ်တက်ဝိုၚ်သုၚ်စ အခိၚ်ဗ္တံတံ ဗ္တံ ၜိုတ် ၁၀ နာဍဳ ၁၁ နာဍဳ ကောန်ၚာ်နွံမံၚ်မ္ၚးတံဂှ် ဆဵုတှ်ေ ကော်ဏာဟဂှ်ရ။ တုဲပၠန် ရပ်ကၠုၚ် ညံၚ်ကဵုရပ်ပပဝ်တာဂှ်လေဝ် နွံ။ ညးဒေသတံဂှ်တှ်ေ ဒးဂွိၚ်ဒၟံၚ်ကဵု အကာဲအရာတိုန်ကေတ်သ္ၚိ ဗွဲအနိၚ်အပိုၚ်တုဲ တံၚ်ရပ်တံဂှ်ရဏောၚ်” သာ်ဝွံ သ္ဂးရ။
ကံၚ်ဇြဳပၞာန် ရပ်ဒက်ကၠုၚ်ဒၟံၚ် ညးသၟတ်အပ္ဍဲဒေသတံ သာ်ဏံဂှ်တုဲ အကြာညးဍုၚ်ကွာန်တံ ဒးဂွိၚ်ဒၟံၚ်နွံဒၟံၚ်တုဲ အာဂၠံၚ်တှ်ေ ဒးဒှ်ဒၟံၚ်အကာဲအရာ ဂီုကၠီုဟွံမွဲတံရဂှ် ညးဒေသတံ ဟီုရ။
ပ္ဍဲတွဵုရးဍုၚ်မန်ဂှ် နူတန်ဗ္တောန်ကွတ်ပၞာန် လၟေၚ် ၁ စဵုကဵု လၟေၚ် ၈ ဂှ် သၟတ်ဟွံအောန်နူကဵု ၁၇၀၀ ကံၚ်ဇြဳပၞာန်တံ ရပ်ပကောံပလဝ်ကောန်ပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−CJ