သဵု(လ်) ၊ သေပ်တေမ်ဗာ (၂၇)
ပရေၚ်ဓဇက်ဂြိပ်ကွဳပၟတ် ပလံၚ်ဗစိုပ်ဗၞိက် မတတ်ကၠောံပယျဵု အကြာကြုက်ကဵု ကိုဝ်ရဳယျာသၟဝ်ကျာ မဒေါအ်ဒေၚ်လဝ် လလအ်ပွိုၚ် (၅) ဂိတုဂှ် ကလေၚ်စဒၟံၚ်ယျဂှ် ဌာန်ပရိုၚ်ယောန်ဟက် ကိုဝ်ရဳယျာသၠုၚ်ကျာ ထ္မံက်ထ္ၜးလဝ် ပ္ဍဲဂိတုသေပ်တေမ်ဗာ (၂၆) တေံရ။
ကွဳပၟတ်ဖ္ဍိုက်ဗၞိက် နူဍုၚ်ဒါန်ဒံၚ် မွဲဖ္ဍိုက်ဝွံ တတ်ကၠောံဒဒန်တတ်ပယျဵုဂှ်တုဲ အာလဝ်ဍုၚ်သေန်ယူဂျူ ကၟိန်ဍုၚ်ကိုဝ်ရဳယျာသၟဝ်ကျာဂှ်ရောၚ် ဌာန်ပရိုၚ်ဂှ် လလောၚ်ပ္တိတ်လဝ်ရ။
ပ္ဍဲဍုၚ်ဒါန်ဒံၚ် ကၟိန်ဍုၚ်ကြုက် မစုက်ဒၟံၚ်ကဵု ကိုဝ်ရဳယျာသၟဝ်ကျာဂှ်ဝွံ က္တဵုဒှ်လဝ် ပရေၚ်ကၠောံထၞာန်ကဝ်ဝေဒ်−၁၉ တုဲ ကြဴနူကၠောန်သ္ပပ္ညဳပ္ညပ်တုဲဂှ် ဒေါအ်ဒေၚ်လဝ် ပရေၚ်ဓဇက်ဂြိပ်ကွဳပၟတ် မွဲအံၚ် နူစဂိတုဨပရဴ (၂၉) တေံရ၊ အပ္ဍဲကာလခြာဟွံလအ်ကၠုၚ်ဏီဂှ် ကိုဝ်ရဳယျာသၟဝ်ကျာဝွံ ဒဒှ်ရပရေၚ်ကၠောံထၞာန်ကဝ်ဝေဒ် လပှ်ပထမတုဲဒှ်ဂှ် လလောၚ်တြးလဝ်ရ။
ဟိုတ်ဂှ်ရ ပွမကၟာတ်ဆိုအ်ဗ တိဍာ်ပယျဵုဒၞက် မစၞောန်ပျးလဝ် သွက်ဂွံစဵုဒၞါ စၟယဲကိုဝ်ရိုဝ်နာ ပ္ဍဲသၞာံ ၂၀၂၀ ပြဟ်ဟ်တေံဂှ် ကိုဝ်ရဳယျာသၟဝ်ကျာ ဖအောန်ဖျေံကဵုလဝ်ရ။
ဂကောံမကဵုအရီုဗၚ် စပ်ကဵုဂၠးတိတံဂှ်ဝွံ အစဳဇန်ပယျဵုဒၞက် ကိုဝ်ရဳယျာသၟဝ်ကျာ မဖျေံစၟတ်လဝ် သွက်ဂွံထံက်ပၚ်ဇွောံမစၞစ မၞိဟ်ဂၠိုၚ်ကဵု ပြကောဋိကိုဋ်တံဂှ်ကဵု ပရေၚ်ပိုန်ဒြပ် မဟွံပြေပြံၚ် ပရေံကၠုၚ်မံၚ်တံဂှ် ပ္တိုန်ဒုဟ်ပါ်ပါဲလဝ်ရ။
ပ္ဍဲဂိတုလောန်ကၠုၚ်တေံ က္ဍိုပ်သ္ကိုပ်ကေန်ဂျုၚ်အာန်ဝွံ ဒဒှ်ရဂွံဇၞးလဝ် ကဝ်ဝေဒ်−၁၉ ယျဂှ် လလောၚ်တြးလဝ်တုဲ ကိုဝ်ရဳယျာသၟဝ်ကျာဝွံ စေဝ်ပၞောန်ပသဲက္ဍိုၚ် စပ်ကဵုပရေၚ်ဗ္တိုက်သ္အးယဲကပ်တံဂှ် ဆက်တုဲဒးထိၚ်ဒက်အာရောၚ် ၜိုန်ရဟီုဂးလဝ်ကီုလေဝ် သွက်ဂွံရုပ်သီ အစဳဇန်ဗ္တိုက်သ္အးယဲကၠောံထၞာန် မဖျေံစၟတ်လဝ် ပ္ဍဲဂိတုမေတေံဂှ် ကဵုလဝ်အမိၚ်ရ။
ကိုဝ်ရဳယျာသၟဝ်ကျာဝွံ သွက်ဂွံစမ်ၜတ် ပရေၚ်ကၠောံထၞာန်ကဝ်ဝေဒ်−၁၉ သၠဲသၠဲလးလးဂှ် နဲကဲဟွံမွဲဒၟံၚ်တုဲ လ္တူလၟိဟ်မၞိဟ် ဍေံတံ လလောၚ်ပ္တိတ်လဝ် မသ္ပဒတန်ဟွံမာန်တံဂှ် လၟိဟ်မၞိဟ်ဗၞတ်ဗ္ၜတ် ၜိုတ်လဵုဒးဒုၚ်ကၠောံထၞာန်လဝ်ဂှ် ညးစဳကၠးဆိုက်ဗ္ဒက်တံ သံသယနွံကၠုၚ်လဝ်ရ။
Ref: CNA