မတ်မလီု၊ ဂျာန္နဝါရဳ(၅)
တၚ်ကော်ဘိက်ကံၚ်ဇြဳပၞာန် ပ္ဍဲကာလသီအဝဵုဏံ သွက်ကောန်ဍုၚ်ဗၟာ ပါဲဓလေတ်ဒၟံၚ် ပ္ဍဲတိဍာ်ဂကောံရပ်လွဟ်ကောန်ဍုၚ်အရၚ် EAOနွံတံကဵု ပ္ဍဲဍုၚ်သ္အာၚ်တံ သွက်သ္ဂောံကလေၚ်စဴကၠုၚ်ဂှ် သ္ဇက်သ္ဂောံပတှ်ေ ဟွံမွဲရဂှ် ညးဍုၚ်ကွာန်တံဟီုရ။
ကံၚ်ဇြဳပၞာန် ဇြဟတ်ဍိုန်လျမံၚ်တုဲ ဒးဆောံလေၚ်ဒၟံၚ် တိဍာ်အုပ်ဓလီုဗွဲမဂၠိုၚ်ဂၠေၚ်ဂှ် ပ္ဍဲအကာဲအရာသြဇာဟွံတန်ဒၟံၚ်တံဂှ် ညးစိုပ်ဒၟံၚ်ဒၞါဲစၟအ်အ်တံ နကဵုဟိုတ်နာနာသာ်တံ သ္ဂောံကလေၚ်စဴကၠုၚ်အိုတ်ဂှ် လလောၚ်ပ္တိတ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ(၃)ဂှ်ရ။
သ္ပတံနူ ဒပ်ပၞာန်သီကေတ်လဝ်အဝဵုကၟိန်ဍုၚ် ပ္ဍဲသၞာံ ၂၀၂၁၊ ဂိတုဖေဖဝ်ဝါရဳ၊ စၟတ်တ္ၚဲ(၁)ဂှ်တုဲ ကွးဘာတံ၊ သၟတ်တံ၊ ညးယိုက်ဝန်တံကဵု ညးဍုၚ်ကွာန်တံဂှ် ဒးပါဲဓလေတ်ဒၟံၚ်ဒၞါဲ EAO နွံတံကဵု ဍုၚ်သ္အာၚ်တံရဂှ် ကံၚ်ဇြဳပၞာန် သ္ဂးရ။
ဣဏံဂှ် ဟိုတ်နူပွဘပဠထ္ပက်ပါ်ထ္ကးဆီ ညးထံက်ဂလာန် ကောန်ဂကောံ NLDတံ၊ CRPHတံ ကဵု NUGတံ မပါလုပ် ပူဂ္ဂိုလ်ပ္ဍဲဍုၚ်မ္ၚးဍုၚ်တံကဵု ဂကောံတံတုဲ ဂွိၚ်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် စောတ်စောဲပ္တိုန်လဝ်ဒုဟ် ပ္ဍဲတၚ်လလောၚ်တြးဂှ်ရ။
ညးယိုက်ဝန်CDM စိုပ်ဒၟံၚ် ပ္ဍဲတိဍာ်ထိၚ်ဒဝ်ဒပ်ပၠန်ဂတးတံ မွဲတၠဂှ် ဟိုတ်နူဖေက် ပွရပ်ဒက်ဟွံဗဗွဲဓရ် ကံၚ်ဇြဳပၞာန်တံကဵု ဖေက်ဒးယိုက်ဂၠေၚ်တာလျိုၚ်ပၞာန်တုဲ ပါဲဓလေတ်ဒၟံၚ်ဂှ်ရ ရံၚ်အာပွကမၠောန်တံမ္ဂး ပတှ်ေကေတ်ဟွံမာန်ရဂှ် ဟီုရ။
” ညးနွံဒၟံၚ်ဌာန်သ္ၚောဲတံဂှ်ရ ကော်တုဲတှ်ေ သၟတ်ကၠောန်စဒၟံၚ်ပ္ဍဲဍုၚ်လၟေၚ်တ္ၚဲတံသၟးဟွံက ညးအဝဲလဵုဟွံဟီု နကဵုသၞောဝ်ယိုက်ဂၠေၚ်တာလျိုၚ်ပၞာန်ဂှ် ဒးဂဗမံၚ်ကဵု ပွဒးဒုၚ်ရပ်ဗွဲအဓမ္မတံ လၟေၚ်ဒဒှ်တ္ၚဲရ။ ကၠာတေံဂှ် ၜိုတ်လ္တူဍုၚ်သၟးရ။ လက္ကရဴဏံ ညးအာရာန်ဖျာ၊ ညးအာကမၠောန်၊ ကွဳစက်ကာ၊ ကွဳလိုန်ဓါတ် နူကဵုကွာန်ဂြိုပ်တံ ဒးဒုၚ်ရပ်မံၚ်တံဂှ် လ္ပာ်ရးတံ ဂွံမိၚ်ကေတ်ဒၟံၚ်ဂှ်ရ ပွကမၠောန်ဂှ် ထ္ၜးမံၚ်သက်သဳရ။ ပါၚ်ဂှ် ၜိုန်ရဟီုမံၚ်ဗီုဏံကီုလေဝ် ပွကမၠောန်တံဂှ် ကၠောန်ဒၟံၚ် စဵုကဵုဒးက္ဍုဟ်မၠေံရ။ ရံၚ်ပွကမၠောန်ဍေံတုဲ နကဵုညးဍုၚ်ကွာန်မွဲ လောန်ၜက်အာနူ ၁၀၀% တုဲ ပတှ်ေကေတ်ဟွံမာန်ဏီရ၊ ဓရ်ပတှ်ေ ညိဟွံမွဲလးလးရ” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ ညးပါဲဓလေတ်ဒၟံၚ်တံဂှ် ဒၞါဲမစိုပ်ဒၟံၚ်တံဂှ် ဟိုတ်နူဒဂဗဒၟံၚ်ကဵု ပွကေတ်လျိုၚ်ပရေၚ်ဂီုကၠီုဟွံမွဲတံ၊ ဘဝပရေၚ်ပိုန်ဒြပ် ပရေၚ်မၞိဟ်ခက်ခုဲမံၚ်တံဂှ်တုဲ ဆန္ဒမိက်သ္ဂောံစဴဒၟံၚ် ဌာန်ဒၟံၚ်ဇကုစၟအ်အ်တံ မံက်ဒၟံၚ်ရဂှ် တြးလဝ်ဝါဒ ပ္ဍဲတၚ်လလောၚ်တြးဂှ်ရ။
ဣဏံဂှ် နကဵုတၚ်ရန်တၟံ မိက်သ္ဂောံကၠောန်သ္ပ ညံၚ်ဂၠးတိဂွံတီ ဒဒှ်ရ ကဵုမံၚ်အရီုဗၚ် ကုကောန်ဍုၚ် ဒှ်ဒၟံၚ်အခက်ခုဲ ပ္ဍဲဍုၚ်သ္အာၚ်တံဂှ်တုဲ ထ္မံက်ဒၟံၚ်ရုပ်ရဴ ညံၚ်ဂွံစိုပ်အကာဲအရာ ညးဍုၚ်ကွာန်တံ ဂွံစဴကဵုမာဲမာန်ရဂှ် ထံက်ထ္ၜးလဝ်အိုတ်ရ။
ပ္ဍဲပရေၚ်သီအဝဵုဏံ မ္ၚးနူညးပါလုပ်လဝ် ပ္ဍဲပရေၚ်ချဳဒရာၚ်ဂကောံပၠန်ဂတးတံ နကဵုသြန်လှုဲကဵုဒှ်၊ နကဵုနဲကဲတၞဟ်ကဵုဒှ် ပါလုပ်လဝ်ဇြိုဟ်ဟ်နက်က်နဇိုၚ်နတဲတံတုဲ ညးယိုက်ဝန်၊ တၠၠပညာတံ၊ ပူဂ္ဂိုလ်နူကဏ္ဍနာနာတံ၊ ညးဍုၚ်ကွာန်တံ ဟိုတ်နူဂွိၚ်တုဲ ညးပါဲဓလေတ်ဒၟံၚ်တံသီုဖအိုတ်ဂှ် ဖအောန်ဖျေံကဵုဗွဲမညှာတာရောၚ်ဂှ် ကံၚ်ဇြဳပၞာန် သ္ဂးရ။
သၟတ်စိုပ်ဒၟံၚ် ပ္ဍဲတိဍာ်ထိၚ်ဒဝ် ဂကောံရပ်လွဟ်ကောန်ဍုၚ်အရၚ်မွဲတၠဂှ် ဟိုတ်နူဒှ်ဗီုပြၚ် ဇၟာပ်ကံၚ်ဇြဳပၞာန်ကြေပ်ဂြတ်မ္ဂး ကၠောန်ဒၟံၚ်လၟိုန်ဂှ်ရ ဟွံပတှ်ေရဂှ် သ္ဂးရ။
“အကာဲအရာလဵုစိုပ်ပ် ကဵုစကစဂှ်တှ်ေ ဓရ်ပတှ်ေဟွံမွဲရ။ ဟွံမွဲပုဟ်ဟီုဂှ် ကၠာတေံလေဝ် ဒးဂဗကၠုၚ်အခက်အခုဲဗီုဏံမ္ဂး ဍေံဂှ် နဲဂွံဂှ် ဂၠာဲပၞော်တိတ်ရ။ နကဵုနဲဂွံမာန် နဲကဲၚံက်က်စၞာဲစၞာဲတံဂှ် ဂၠါဲပၞော်တိတ် ညံၚ်သ္ဂောံဂွံတုဲ ကၠောန်သ္ပမံၚ် ညံၚ်တံၚ်ဂြဲညးဍုၚ်ကွာန်တံဂှ် ခန်လ္ၚတ်တုဲတုဲကၠုၚ်တေံလေဝ် နွံကၠုၚ်လဝ်ရ” သာ်ဝွံ သ္ဂးရ။
စပ်ကဵုကံၚ်ဇြဳပၞာန် လလောၚ်ပ္တိတ်ကၠုၚ် တၚ်လလောၚ်တြးသာ်ဏံတုဲ ညံၚ်ပရေၚ်ကၠးဖ္ဍးသ္ဂောံနွံဂှ် တုဲတဴကဵု တၚ်ဒုၚ်လျိုၚ် လ္တူသၞောတ်ဂၠးတိဒုၚ်တဲမာန်တံ နွံဟၟဲဂှ်တုဲ ညးဍုၚ်ကွာန်တံ တီကေတ်ကၠးကၠးဖ္ဍးဖ္ဍးမာန်မံၚ်ရဂှ် ညးဆက်ဟီုရ။
မ္ၚးနူညးကလိလောန်လဝ်ဒုဟ်ဒဏ်တံဂှ်တုဲ ဟိုတ်နူဂွိၚ်ဂွါဲတုဲ ညးဒးပါဲဓလေတ်မံၚ်တံဂှ် ယဝ်ခါရ မိက်ဂွံကလေၚ်လုပ်ဒၞါဲဇကုပၠန်မ္ဂး ဆက်စၠောံကု ကံၚ်ဇြဳအုပ်ဓုပ်ခရိုၚ်၊ စုက်လုက်ကဵုပွိုၚ်ဍုၚ်တံတုဲကဵုဒှ် ညးစိုပ်မံၚ်ဍုၚ်သ္အာၚ်တံဂှ် ကုရုၚ်ကလုတ်ဆက်စပ်တံ၊ ရုၚ်ဝန်ကဵုအရီုဗၚ်တံကဵုဒှ် ဆက်စၠောံမာန်မံၚ်ရဂှ် ကဵုလဝ်သမ္တီရ။
လ္ဂောံကဵု တၚ်နွံပၟိက်ဇြဟတ်ဒပ်တံတုဲ ဟိုတ်နူသၞောဝ်ယိုက်ဂၠေၚ်တာလျိုၚ်ပၞာန် ကံၚ်ဇြဳပၞာန်ပၠုပ်လဝ်လမျီု သၞာံတုဲကၠုၚ်တေံဂှ်တုဲ သၟတ်တံ နကဵုဇြဟတ်လၟိဟ်ဗွဲမဂၠိုၚ်ဂၠေၚ် နူကဵုဂၠံၚ်တရဴနာနာသာ်ဂှ် အသိၚ်တိတ်မံၚ်ဍုၚ်သ္အာၚ်တံသၠုၚ်တိုန်ကၠုၚ်မံၚ်ရ။
အတိုၚ်စရၚ် ဗော်ညဳသၟဟ်ဂကူ NUG၊ ဌာနဝန်ဇၞော်အခေါၚ်အရာမၞိဟ် တံဂှ်မ္ဂး ဟိုတ်နူသၞောဝ်ယိုက်ဂၠေၚ်တာလျိုၚ်ပၞာန်ဂှ်တုဲ ပွဖံက်ပ္ကဝ်အခေါၚ်အရာမၞိဟ်အပံၚ် (၁၁၆၀) နွံလဝ်တုဲ ညးဒးဒုၚ်ရပ် အပံၚ် (၂၂၇၆၀)တၠပြၚ် နွံမံၚ်ရဂှ် လလောၚ်ပ္တိတ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ(၁) ဂှ်ရ။
ပရိုၚ်-သြၚ်လောန်တိုၚ်မ်
ဗီု−Social Media