မတ်မလီု၊ ဂျာန္နဝါရဳ (၇)
အပ္ဍဲညးဂွံအခေါၚ် ဗၠးနူဒုဟ်ဒဏ်တံဂှ် ကောန်ထံၚ်ပရေၚ်ဍုၚ်ကွာန် ပါလုပ်ဒၟံၚ် ဗ္ဒါဲ(၆၀၀)ရဂှ် ကံၚ်ဇြဳပၞာန် ဟီုဂးမံၚ်ကီုလေဝ် ပ္ဍဲဗလးတိဏံဂှ် ၜိုတ်(၃၀၀)ပြၚ်ဓဝ်ဟေၚ်ရ ဗၠးတိတ်ကၠုၚ်လဝ်ရဂှ် ကောန်ယက်ကောန်ထံၚ်ပရေၚ်ဍုၚ်ကွာန်အလုံကၟိန်ဍုၚ် PPNM လလောၚ်ပ္တိတ်လဝ်ပရိုၚ် ပ္ဍဲဂိတုဂျာန္နဝါရဳ စၟတ်တ္ၚဲ(၆)ဂှ်ရ။
နဒဒှ်စၟတ်သမ္တီ တ္ၚဲဗၠးၜး ဂိတုဂျာန္နဝါရဳ စၟတ်တ္ၚဲ(၄)ဂှ်တုဲ ပ္ဍဲညးဂွံအခေါၚ်ဗၠးတိတ်တံဂှ် ကောန်ထံၚ်ပရေၚ်ဍုၚ်ကွာန် ဒးဒုၚ်ဒၟံၚ်ထံၚ် နကဵုရာဇာသာတ်ဇၞော် ၝောံပိုဒ် (၅၀၅) မဒှ်ၝောံပိုဒ်ပရေၚ်ဍုၚ်ကွာန်တံ ပါလုပ်ဒၟံၚ် ဗ္ဒါဲ(၆၀၀)ရဂှ် ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန် သ္ဂးရ။
ဆ္ဂး PPNM ဂှ် ပ္ဍဲအရာကံက်ကေတ်စရၚ် ပ္ဍဲထံၚ်စာတ်(၄၀)ပြၚ်တံဂှ် ကောန်ထံၚ်ပရေၚ်ဍုၚ်ကွာန်တြုံ (၂၀၈)တၠ၊ ကောန်ထံၚ်ပရေၚ်ဍုၚ်ကွာန်ဗြဴ (၁၃၁)တၠ၊ အပံၚ်ကောန်ထံၚ်ပရေၚ်ဍုၚ်ကွာန် (၃၄၄)တၠဓဝ်ဟေၚ် ဗၠးတိတ်ကၠုၚ်လဝ်ရ။
အတိုၚ်တၚ်နၚ် PPNMဂှ်မ္ဂး ပ္ဍဲကောန်ထံၚ်တြုံဗြဴတံဂှ် နကဵုတၟံကၠံမ္ဂး ကောန်ထံၚ်ပရေၚ်ဍုၚ်ကွာန် ၜိုတ်(၂)တၟံကၠံဓဝ်ဟေၚ် ပါလုပ်ရ။
ညးမၞုံအခေါၚ်ဟီုဂး PPNM ကိုဝ်တိုက်ထောန်ဥူဂှ် တၚ်လဟီုကံၚ်ဇြဳပၞာန်တံဂှ် ဗၠေတ်ဒၟံၚ်ကဵုအကာဲအရာဗလးတိဏံ တၟာဂလိုၚ်ရဂှ် ဟီုကဵုသြၚ်လောန်တိုၚ်မ်ရ။
အတိုၚ်ကောန်ထံၚ်ပရေၚ်ဍုၚ်ကွာန်တံ ဗၠးတိတ်ကၠုၚ်လဝ်တံဂှ်မ္ဂး အောန်နူကဵုလၟိဟ်ဂၞန် ကံၚ်ဇြဳပၞာန်လလောၚ်ပ္တိတ်လဝ်တံ ဗွဲမဂၠိုၚ်ဂၠေၚ်ဂှ် ဂွံဆဵုကေတ်တုဲ သွက်ဂွံဂြောပ်လဒဵု စရၚ်ကောန်ထံၚ်ပရေၚ်ဍုၚ်ကွာန်ဗၠးတိတ်တံတုဲ လ္ပာ်ကံၚ်ဇြဳပၞာန်တံ ဟီုလဝ်နကဵုတၚ်ရန်တၟအ်နွံနွံရဂှ် သ္ဂးရ။
ကံၚ်ဇြဳပၞာန်ဂှ် နဒဒှ်စၟတ်သမ္တီ တ္ၚဲဗၠးၜး မရနုက်ကဵု(၇၇)ဝါတုဲ ကဵုကၠုၚ်အခေါၚ်ဗၠးတိတ် ကုကောန်ထံၚ် တြုံ၊ဗြဴ ဗၞတ်(၅၈၆၄) တၠ ဒးဒၟံၚ်ထံၚ် ပ္ဍဲထံၚ်စာတ်၊ ထံၚ်အချုက် ကေုာံ ဗ္ဒိုပ်ကမၠောန် မွဲအလုံကၟိန်ဍုၚ်တံဂှ်ရ။
ပရိုၚ်-သြၚ်လောန်တိုၚ်မ်
ဗီု−BBC