မတ်မလီု၊ ဂျာန္နဝါရဳ ၁၃
ပ္ဍဲတွဵုရးဍုၚ်မန် ဍုၚ်မတ်မလီုဂှ် ဒပ်ဗၠာဲသၟိၚ်ထိၚ်ယာန် သၟဝ်တဲကံၚ်ဇြဳပၞာန်တံ စၟဳတ်ကၠုၚ်ယာန်ကွဳစက်တံ သောဲသောဲဗြောဲဗြောဲတုဲ အာတ်မိက်ကၠုၚ်ဒၟံၚ်သြန်တံဂှ် ကၠောန်သ္ပကၠုၚ်ဒၟံၚ်အဆက်က်ရောၚ် ညးဒေသလ္တူဍုၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ဗၠာဲသၟိၚ်ထိၚ်ယာန်ဂမၠိုၚ်ဝွံ ဒၞါဲမၞိဟ်ကောံဂၠိုၚ် ဗီုဂၠံၚ်ပိပန်သွာၚ်တံ၊ ဗီုဒၞါဲပၟတ်ထိၚ်ယာန်ချဳဒရာၚ်တံဂှ် ရပ်စပ်ကၠုၚ်ဇြဟတ်ဗွဲမဂၠိုၚ်ဂၠေၚ်တုဲ စၟဳတ်ကၠုၚ်လာၚ်ဇြေန်ကွဳစက်တံ၊ လာၚ်ဇြေန်ဒဳယာန်တံတုဲ ယာန်ကွဳစက်ဖ္ဍိုက်ဗၞိက်လ္ၚဵုတံမ္ဂး စၟဳတ်ကၠုၚ်ဒၟံၚ် စနူကျာကွဳစက်ရ။
သ္အာၚ်နူဂှ်ပၠန် ကွဳလိုန်ဓာတ်တံဂှ်လေဝ် စနူကဵုဂၞန်ကွဳလိုန်ဓာတ်၊ ဒ္ၚေါဝ်၊ ခၟံက်၊ လာၚ်ဇြေန်ကွဳလိုန်ဓာတ်၊ လာၚ်ဇြေန်ဒဳယာန်တံဒှ်တမ် စၟဳတ်တုဲ အာတ်မိက်ဒၟံၚ်သြန် နကဵုနဲကဲနာနာသာ်ရ။
အတိုၚ်ဂလာန် ညးဒးဒုၚ်ရပ်စၟဳတ်တံဂှ်မ္ဂး တၚ်နၚ်မဖျေံစၟတ်လဝ်တံဂှ် ယဝ်ရဟွံဍိုက်ပေၚ်မ္ဂး မွဲဂဗုတ်မ္ဂး ဒးကဵုဒၟံၚ်ပိဠက်ဘာ်ဒ္ကေဝ်တုဲ ကွဳလိုန်ဓာတ်လ္ၚဵုတံမ္ဂး ဒးကဵုဒၟံၚ်သြန်ဂၠိုၚ်ကဵုကိုဋ်ရ။
ညးဒေသဟွံမိက်ထ္မံက်ယၟုမွဲတၠဂှ်တှ်ေ ပြဝဗၠာဲသၟိၚ်ထိၚ်ယာန်တံဂှ်ဝွံ ဒှ်ပြဝဂၠါဲဒၟံၚ်သြန် လ္တူပရေၚ်တိဍာ်ညိၚ်ဝတ်တံဂှ်ရောၚ် ပါ်ပါဲလဝ်ရ။
“ဗၠာဲသၟိၚ်ထိၚ်ယာန်တံ စၟဳတ်တေၚ်ကၠုၚ်ကွေံကွေံ။ လၟုဟ်တှ်ေ ဒှ်ကၠုၚ်ဒၞါဲတၟာဂလိုၚ်ရ။ ကၠာတေံတှ်ေ ယဝ်ရဓလဝ်လဝ်ခၟံက်၊ ဒ္ၚေါဝ်နွံမ္ဂး ဟွံကော်ပုဟ်။ လၟုဟ်ဂှ် ကော်စၟဳတ်ကၠုၚ်ဒၟံၚ်ဖအိုတ်။ တုဲတှ်ေ ဍေံတံစၟဳတ်ဒၟံၚ် မွဲဟွံသေၚ်မွဲ။ သာ်လဵုဂွံဟီုမ္ဂး ဒှ်ဒၟံၚ်ဂၠါဲဒၟံၚ်လှုဲကွေံကွေံဏောၚ်’ သာ်ဝွံ သ္ဂးရ။
အခိၚ်စၟဳတ်ယာန်ကွဳစက်တံဂှ် ယဝ်ရရပ်ဂွံကွဳလိုန်ဓာတ်လာၚ်ဇြေန်ဟွံမွဲတံဂှ်မ္ဂး တန်တဴကဵုဂကူကွဳလိုန်ဓာတ်တုဲ အာတ်မိက်ကၠုၚ်ဒၟံၚ်သြန် ဂၠိုၚ်ကဵုဆတံ နွံဒၟံၚ်တုဲ ယဝ်ရဟွံကဵုလှုဲမ္ဂး သီဂိုၚ်ကၠုၚ်ဒၟံၚ် သီုကွဳလိုန်ဓာတ်တံ နွံဒၟံၚ်ရ။
ဗၠာဲသၟိၚ်ထိၚ်ယာန်တံ ထ္ၜးဟိုတ်နာနာသာ်တုဲ ရပ်စပ်အာတ်မိက်ကၠုၚ်ဒၟံၚ်သြန် သာ်ဏံဂှ်ရ ပပ္တံနူကဵုအာကမၠောန် စဴကမၠောန်ဂှ် ဒးပဒၟံၚ်သတိတုဲ ဒးဒုၚ်ရပ်မ္ဂးလေဝ် နကဵုကောန်ကလောန်စလိၚ်ကဵုတ္ၚဲတံမ္ဂး ဂွံစသုၚ်ရဂှ် အခက်အခုဲနွံကၠုၚ်ဂှ် ညးဒေသတံ ဟီုရ။
ပရိုၚ်−သြၚ်လောန်တိုၚ်(မ်)
ဗီု− CJ