ၜဳကလေၚ်၊ ဂျာန္နဝါရဳ ၁၈
ဒပ်ကံၚ်ဇြဳပၞာန် ဗ္တိုက်လဝ်ဘာတန်လဒေါဝ် ကွာန်တဂေလံၚ် ပွိုၚ်ဍုၚ်ၜဳကလေၚ် တွဵုရးဍုၚ်မန် နကဵုဒရုၚ်ဒုၚ်ချိုတ်ၜါမတုဲ စမြိုၚ်ဘာလ္ၚဵု လီုလာ်အာလဝ်ရောၚ် KNU ဗဟဵု လလောၚ်ပ္တိတ်လဝ်ပရိုၚ်ရ။
တုဲကၠုၚ် ပ္ဍဲဂိတုဂျာန္နဝါရဳ ၁၆ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် ဒပ်ကံၚ်ဇြဳပၞာန်ဝွံ ပန်လဝ် ပ္ဍဲကွာန်တဂေလံၚ် နကဵုဒရုၚ်ဒုၚ်ချိုတ်ၜါတုဲ မွဲမဂှ်တှ်ေ ဒတုံဗ္တိုဟ်ထ္ကးအာလဝ် လ္တူကၟဳဘာဗ္တောန်လိက်တုဲ မွဲမဂှ်တှ်ေ ဒတုံဗ္တိုဟ်ထ္ကးအာလဝ် မ္ၚးကွာန်ရ။
အခိၚ်ဒရုၚ် ဒတုံဗ္တိုဟ်ထ္ကးအာလဝ် လ္တူဘာဗ္တောန်လိက်ဂှ်ဝွံ ဒှ်အခိၚ်ဗလးဘာတုဲ ဇီုကပိုက်ကလိဂွံဝပ် ဟွံမွဲပုဟ်ဂှ် ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ပဒိုဝ်သဝ်အေနာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကဵုပရေၚ်ဒရုၚ် ဗ္တိုက်ထ္ကးအာဂှ် မၞိဟ်ဇီုကပိုက်ကလိဂွံဝပ် ဟွံမွဲကီုလေဝ် ကၟဳဘာကဵု ဗ္တၚ်တြၚ်တံ လီုလာ်အာလဝ်ရ။
ဟိုတ်နူဘာဗ္တောန်လိက် ဒးဒုၚ်ဗ္တိုက်လဝ်ဂှ်တုဲ ပ္ဍဲဂိတုဂျာန္နဝါရဳ ၁၇ ဂှ် ကၟာတ်လဝ်ဘာတုဲ ရဲကွာန်ဗွဲမဂၠိုၚ်ဂှ်လေဝ် ဖေက်ဂၟံက်ဒၟံၚ်အိုတ်ရောၚ် သ္ဂးရ။
ဘာဗ္တောန်လိက် ဒးဒုၚ်ဗ္တိုက်ကဵု ဒရုၚ်ဒုၚ်ချိုတ်ဂှ်ဝွံ ဒှ်ဘာ KNU ပံက်လဝ်တုဲ ဗ္တောန်ဒၟံၚ် နူတန် KG စဵုစိုပ် G9 တုဲ ကွးဘာ ၃၀၀ ပြၚ် တိုန်စိုပ်ကတ်ဗ္တောန်ဒၟံၚ်ရ။
အပ္ဍဲဂိတုမာတ်သၞာံတုဲတေံဂှ်လေဝ် ဟိုတ်နူဒပ်ကံၚ်ဇြဳပၞာန် ထောံမခတိုဟ်ဗ္တိုက်ကၠုၚ် နကဵုက္ၜၚ်ကျာ ပ္ဍဲကွာန်တဂေလံၚ်ဂှ်တုဲ စမြိုၚ်ဘာဗ္တောန်လိက်လ္ၚဵုတံ လီုလာ်အာလဝ်တုဲ ကြဴနူဂှ်တုဲ ကလေၚ်ပလေဝ်ပလေတ်တုဲ ကလေၚ်ပံက်လဝ်ဘာရ။
ပရိုၚ်−သြၚ်လောန်တိုၚ်(မ်)
ဗီု−KNU