ဗေကျေန်၊ ဂျာန္နဝါရဳ ၁၈
နကဵုဍုၚ်မလုပ်ဂကောံ အာဇြဳယာန်ဂမၠိုၚ် သွက်ဂွံဗ္တိုက်သရိုဟ် ကမၠောန်ဝေၚ်ၛၚ်လပှ်ကျာတံကဵု ကမၠောန်လီဠာန်ပရေၚ်ဆက်စၠောံတံဂှ် သွက်ဂွံဖျေံစၟတ်ကၠောန်အာ အစဳဇန်ဒြဟတ်ခိုဟ်ဟ်တံဂှ်ကီု၊ နကဵုဍုၚ်မဆေၚ်စပ်ဂမၠိုၚ် လျိုၚ်ဇကု ဇကုဂွံကေတ်အိုတ်ဂှ် ဝန်ဇၞော်ကာဍုၚ်သ္အာၚ်ကြုက် ဝါန်ယိ ဖ္တိုက်ဖ္အောဝ်လဝ် ပ္ဍဲဂိတုဂျာန္နဝါရဳ ၁၆ တေံရ။
မွဲဒမြိပ်ပယျဵု သေံ−ဗၟာဂှ် ပရေၚ်ဝေၚ်ၛၚ်လပှ်ကျာတံကဵု ပရေၚ်လီဠာန်ပရေၚ်ဆက်စၠောံ ဗွဲမဂၠိုၚ်ဂၠေၚ်ဂှ် ဘပဠဒၟံၚ် ကောန်ဍုၚ်ကြုက်တံကဵု ကောန်ဍုၚ်တၞဟ်သ္အာၚ်ဂမၠိုၚ်တုဲ ကဵုဒၟံၚ်ဘဲရောၚ် နိဿဲကေတ် ဂလာန်ဝန်ဇၞော်ဝါန်ယိဟီုဂးဂှ်တုဲ ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနဝန်ဇၞော်ကာဍုၚ်သ္အာၚ်ဍုၚ်ကြုက်ဂှ်ရ။
သွက်ဂွံခၞံဗဒှ်ကဵုအကာဲအရာ ညံၚ်မၞိဟ်နူဍုၚ်နာနာ ဂွံအာကၠုၚ်တရဴ ဗွဲမဗၠးၜးမာန်ဂှ် နကဵုကြုက် ဒဒှ်ရမိက်ဂွံသၠုၚ်ပ္တိုန် ပရေၚ်ပံၚ်တောဲရေၚ်တၠုၚ် ကုအာဇြဳယာန် သွက်ပရေၚ်ဂီုကၠီု ကေုာံ ပရေၚ်ကောပ်ကာဲသၞောဝ်တံဂှ် အပ္ဍဲဆဵုဂဗကဵု ညးစၞးဒေသမဆေၚ်စပ်တံဂှ် ဝန်ဇၞော် ဝါန်ယိ ဟီုဂးကၠုၚ်ရ။
သွက်ဂွံသၠုၚ်ပ္တိုန် ပရေၚ်ပံၚ်တောဲရေၚ်တၠုၚ် ပရေၚ်ဂီုကၠီုဂှ် ကြုက် မကဵုကၠုၚ်ဒမြိပ်အရေဝ်ဂှ်ဝွံ ပ္ဍဲအာယှဒိုဟ်အဂၞဲဏံ စပ်ကဵုပရေၚ်လီဠာန်ပရေၚ်ဆက်စၠောံတံကဵု ပရေၚ်သွံရာန်မၞိဟ်တံ ဂၠိုၚ်ကၠုၚ်ဂှ်တုဲ ဒဒှ်ရအလဵုအသဳကြုက် ဒှ်ဓဝိၚ်ဂၠိုၚ်ကၠုၚ်ဂှ် ထ္ၜးပျးဒၟံၚ်ရောၚ် မဒှ်ရ။
ကၠာယဲကပ်ကဝ်ဝေဒ်ဟွံဂွံဒှ်တံ ညးအာတရဴကောန်ဍုၚ်ကြုက် မရပ်စပ်ကၠုၚ်လဝ်ဒဝ်ဠာကဵုဗဳလျာန် လၟေၚ်ၚ်သၞာံ အပ္ဍဲဒေသဂှ်ဝွံ သွက်ကၟိန်ဍုၚ်အာယှဒိုဟ်အဂၞဲ ဍုၚ်ဇိုၚ်ဝုတ်ဒိုဟ်တံဂှ်တှ်ေ ဒှ်တမ်ရိုဟ်သြန်လုပ်ခိုဟ်မွဲရ။
ဆ္ဂး ဟိုတ်နူပရိုၚ် ဂိုန်ရာဇဝတ်တံ တံၚ်ရပ်ဒၟံၚ်မၞိဟ် ဗွဲတၟေၚ် ညးအာတရဴ မပြးထၞာန်ဒၟံၚ် ပ္ဍဲမဳဒဳယျာပရေၚ်မၞိဟ် နကဵုပရေၚ်သွံရာန်ဒၟံၚ်မၞိဟ်တံဂှ်တုဲ ကောန်ဍုၚ်ကြုက်ဂမၠိုၚ်ဝွံ ဂွံတိတ်တရဴ အပ္ဍဲဒေသရဂှ် ဒးချပ်ကၠုၚ်အိုတ်ရ။
အပ္ဍဲကဵုပရေၚ်ဒဒှ်မၞိဟ်တီဂၠိုၚ်မွဲ ညးထ္ၜးရုပ်ကောန်ဍုၚ်ကြုက် ဝါန်ယှေန်ဝွံ ပ္ဍဲဂိတုဏံ ကြဴနူကၠေံအာ ပ္ဍဲပယျဵုသေံ−ဗၟာတုဲဂှ် ဂွံဂၠါဲကလေၚ်ဆဵုလဝ် ပ္ဍဲဍုၚ်ဗၟာရ။
ညးဝွံ ဒှ်ညးဒးဒုၚ်သွံရာန်လဝ်မၞိဟ် ဒဒှ်ရစှ်ေစိုတ်ဂှ် ဒပ်ဗၠာဲသၟိၚ်သေံ ဟီုကၠုၚ်လဝ်ရ။
အပ္ဍဲအကြာဏံ ကောန်ဍုၚ်ကြုက်တံ ကၠေံအာတုဲ စပ်ကဵုအာနွံဒၟံၚ် ပ္ဍဲကဵုကမၠောန်မၞိဟ်လီဠာန်တံဂှ်တုဲ ပ္ဍဲဂိတုဂျာန္နဝါရဳ ၁၇ တေံ ဒပ်ဗၠာဲသၟိၚ်သေံ ကဵု ဒပ်ဗၠာဲသၟိၚ်ကြုက်တံ ဒဒှ်ရရပ်ဂွံလဝ် မၞိဟ်ဒှ်သံသယ အမှုရာဇဝတ်အပ္ဍဲဍုၚ်ကဵု ဍုၚ်သ္အာၚ်တံ ၁၂ တၠဂှ် လလောၚ်တြးလဝ်ရ။
ကမၠောန်မၞိဟ်လီဠာန်လပှ်ကျာဂှ်ဝွံ ရပ်စပ် AI တုဲ ပ္တိတ်ကၠုၚ်ဇြဟတ် သီုသ္ဂောံလီဠာန် သ္ကိုပ်ဝန်ဇၞော်သေံဂှ် သ္ဂးရ။
ပ္ဍဲကဵုပရေၚ်ဒဒှ်ဂှ်တှ်ေ မၞိဟ်လီဠာန်တံဂှ် ဖန်ဗဒှ်ညံၚ်ရဴဗီုပြၚ်က္ဍိုပ်သ္ကိုပ်ဍုၚ်သ္အာၚ်မွဲတၠ နကဵု AI တုဲ ပ္တိတ်ကၠုၚ်ဇြဟတ် သွက်ဂွံလီဠာန် သ္ကိုပ်ဝန်ဇၞော်သေံ ဗဴဓေါန်ဓါန် ယှေန်နာဝတ်ရ။
ကေတ်အခေါၚ်ခိုဟ်ကဵု ပရေၚ်ဍုၚ်ကွာန်ဟွံညိၚ်ဝတ် အပ္ဍဲဍုၚ်ဗၟာဂှ်တုဲ ကမၠောန်မၞိဟ်လီဠာန်လပှ်ကျာတံဝွံ ကၠာတေံဂှ် ချဳဒရာၚ်ဖျေံလဝ်သ္ဇိုၚ် ပ္ဍဲရးသေံသ္ကုတ်သၟဝ်ကျာကီုလေဝ် ကြဴနူဂကောံမဟာမိတ်ကောဒေံတံ ဗ္တိုက်သရိုဟ်လၞိန်ဗပိန်တုဲဂှ် ပြံၚ်စိုပ်အာ လ္ပာ်ပယျဵုသေံ−ဗၟာဂှ် ဂွံတီကေတ်ရ။
ပ္ဍဲကဵုကမၠောန်မၞိဟ်လီဠာန်လပှ်ကျာ ပ္ဍဲဍုၚ်ဗၟာတံဂှ် ကောန်ဍုၚ်မဒးဒုၚ်စကာဒၟံၚ်ကမၠောန် ဗွဲအဓမ္မ ညံၚ်ရဴဍိက်ပၠက်တံဂှ် နွံဒၟံၚ်မဂၠိုၚ်ဂၠေၚ်တုဲ ပါလုပ်ဒၟံၚ်သီုကဵုကောန်ဍုၚ်အဖရိကတံဂှ် ဂွံဆဵုကေတ်ရ။
ကမၠောန်ကဵုသြန်ဂိတုခိုဟ်ဟ်ဏောၚ် မကဵုကၠုၚ်ဒၟံၚ်မက်ဂၠက် နူကဵုလပှ်ကျာတံဂှ် လ္ပလုပ်ကတောဝ်အိုတ်ညိဂှ် အရာမဖ္တိုက်ဖ္အောဝ်ဒၟံၚ်တံ မံက်တိတ်ဒၟံၚ်ရ။
Ref: Bangkokpost