မတ်မလီု၊ ဂျာန္နဝါရဳ ၁၈
ပ္ဍဲတွဵုရးဍုၚ်မန် ဂကောံအုပ်ဓုပ်အရာပ် ကေုာံ ဂကောံအုပ်ဓုပ်ကွာန် သၟဝ်တဲကံၚ်ဇြဳပၞာန်တံ ပကောံဒၟံၚ်မၞိဟ်တၟိ သွက်တန်ဗ္တောန်ကွတ်ပၞာန် လၟေၚ် (၉) ဂှ် ညးမစုက်လုက်ကဵု ဂကောံအုပ်ဓုပ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံအုပ်ဓုပ်တံဝွံ ပလေဝ်ပလေတ်ဒၟံၚ် သ္ဂောံကော်ညးသၟတ်တံ သွက်တန်ဗ္တောန်ကွတ်ပၞာန် လၟေၚ် (၉) ဂှ်နွံတုဲ ပ္ဍဲအရာပ်လ္ၚဵုတံဂှ်တှ်ေ သွက်ဂွံလိၚ်စုတ်မၞိဟ်ဂးတုဲ ကံက်ဒၟံၚ်လှုဲတံ နွံဒၟံၚ်ရ။
သ္အာၚ်နူဂှ်ပၠန် ရပ်ဒက်ညးသၟတ်တိတ်မ္ၚး အခိၚ်ဗ္တံတံဂှ်တုဲ ပကောံကၠုၚ်ဒၟံၚ်မၞိဟ်တၟိတံ နွံတုဲ ဂၠံၚ်လုပ်တိတ်ဍုၚ်တံဂှ်လေဝ် နကဵုဟိုတ်ယိုက်လျိုၚ်ပၞာန်ဂှ် ရပ်ဒက်ကော်ဏာလဝ်တံ နွံရောၚ် ညးဒေသတံ ဟီုရ။
ညးဒေသမတ်မလီုမွဲတၠဂှ်လေဝ် သွက်တန်ဗ္တောန်ကွတ်ပၞာန် လၟေၚ် (၉) ဂှ် ပ္ဍဲအရာပ်လ္ၚဵုတံဂှ်တှ်ေ ကံက်ဒၟံၚ်လှုဲတံ နွံဒၟံၚ်တုဲ ပ္ဍဲအရာပ်လ္ၚဵုတံဂှ်တှ်ေ ရပ်ဒက်ဒၟံၚ်ကြာန်န်တုဲ အခိၚ်ဗ္တံမ္ဂး မၞိဟ်တိတ်မ္ၚး အောန်စှ်ေကၠုၚ်ရောၚ် ဟီုရ။
“ပ္ဍဲတိဍာ်လ္ၚဵုတံဂှ်တှ်ေ ကံက်လှုဲ။ လ္ပာ်အရာပ် (ဒေါင်းမင်း) တံမုတံဂှ်တှ်ေ မွဲသ္ၚိ မူစိဂးတုဲ ကံက်ဒၟံၚ်လှုဲရ။ လ္ပာ်အရာပ်ဒိုက်ဝန်ဂှ်တှ်ေ ဍေံတံတံၚ်ရပ်ဒၟံၚ် အခိၚ်ဗ္တံ။ ဒးကဵုမၞိဟ်ဏောၚ်ဂးတုဲ တိတ်ကၠုၚ်နကဵုအမိၚ်ကဵုပါၚ် အတိုၚ်ဏံဂှ်လေဝ် နွံ။ လၟုဟ်တှ်ေ ၜိုတ်ဗ္တံ ၇ နာဍဳ ၈ နာဍဳမ္ဂး မၞိဟ်တံ တိတ်မ္ၚး အောန်စှ်ေအာယျ” သာ်ဝွံ သ္ဂးရ။
ညးသၟတ်ကံၚ်ဇြဳပၞာန်တံ ရပ်ဒက်ဏာလဝ်ကၠာတေံဂှ် ကဵုလှုဲကဵုစှော်ကိုဋ်တုဲ ကလေၚ်နုက်ဂွံကီုလေဝ် ဗွဲကြဴဏံ ၜိုတ်မၞိဟ်မစုက်လုက်ကဵုကံၚ်ဇြဳပၞာန်တံရဟေၚ် ကလေၚ်နုက်ဂွံတုဲ မၞိဟ်သှ်ေတံဂှ်တှ်ေ ပလံၚ်ဏာဒၟံၚ် တန်ဗ္တောန်ကွတ်ပၞာန်တံ နွံဂှ် ညးဆက်ဟီုရ။
ညးဒေသဍုၚ်ရေဝ်မွဲတၠဂှ်လေဝ် ပ္ဍဲဒၞါဲလုပ်တိတ်ဍုၚ်တံဂှ် စၟဳတ်ဒၟံၚ် သွက်ဂွံယိုက်လျိုၚ်ပၞာန််တံဂှ်တုဲ ရပ်ဒက်ဒၟံၚ်တုဲ စပ်ကဵုတာဒၞါစၟဳတ်ကၠုၚ်ဂှ်တုဲ ယဝ်ဟွံဒေါအ်မ္ဂးလေဝ် ဒဵုကဵုရပ်ဒက်ပန်ပှော်ကၠုၚ်တံ နွံဂှ် ဟီုရ။
“ဍေံတံဂှ်တှ်ေ ဟွံပြေပြံၚ်တှ်ေ တံၚ်ရပ်ဏာဂှ်လေဝ်နွံ။ လ္ပာ်ဂၠံၚ်တိတ်နူရေဝ်ကဵု သၞေဟ်ကာတံ ဂၠံၚ်တိတ်နူရေဝ်ကဵု အစေန်တံ တုဲတှ်ေ ဂၠံၚ်တိတ်နူရေဝ်−မတ်မလီုတံ လ္ပာ်(မြို့တော်ဥ◌ီး) တံ တုဲတှ်ေ သီုလ္ပာ်(အဏ္ဏဝါ) တံ မဒှ်ရ။ အဓိကဂှ်တှ်ေ ဒၞါဲလုပ်တိတ်ဍုၚ်တံဂှ် ဍေံတံရပ်ဒက်ဒၟံၚ်။ လ္ၚဵုတံဂှ်တှ်ေ အာဂှ်အာဒၟံၚ်ရဏောၚ်။ ဟွံဆဵုတှ်ေ မုဟွံဒှ်ပုဟ်။ ဆဵုတှ်ေ ယဝ်ဗဒေါအ် ဟွံဒေါအ်ပုဟ်ဟီုမ္ဂး ပန်တုဲရပ်၊ ဒဵုကဆံၚ်ဏံလေဝ် နွံ” သာ်ဝွံ သ္ဂးရ။
ဒၞါဲပကောံကောန်ပၞာန်တံဂှ်လေဝ် ပါဲနူကဵုညးသၟတ်အာယုက်ဟွံပေၚ်ဏီတံဂှ် ရဲဇၞော်ဇၞော် ၜက်အာနူကဵုအာယုက်ဍေံတံ မစၟတ်လဝ်ဂှ်လေဝ် ရပ်ဒက်ဒၟံၚ်ဗွဲအဓမ္မတုဲ ပလံၚ်ဗစိုပ်ကၠုၚ် တန်ဗ္တောန်ကွတ်ပၞာန်တံ နွံကၠုၚ်ဂှ် ညးဒေသတံ ဟီုရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) စၟဳတ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် သွက်တန်ဗ္တောန်ကွတ်ပၞာန် လၟေၚ် (၁) စဵုစိုပ် လၟေၚ် (၈) ဂှ် ညးဒးဒုၚ်ပကောံပကၠုၚ်ကောန်ပၞာန် နွံကၠုၚ်ဒၟံၚ် ဟွံအောန််နူကဵု ၁၇၀၀ တၠရ။
ပရိုၚ်−သြၚ်လောန်တိုၚ်(မ်)
ဗီု−MOI