သာယာဝတဳ၊ ဂျာန္နဝါရဳ ၁၈
ပ္ဍဲကဵုထံၚ်သာယာဝတဳ ရးဗဂေါ မဒယှ်ဒၟံၚ်နကဵုယၟုပရေံပရေံဂှ် ကောန်ထံၚ်ပရေၚ်ဍုၚ်ကွာန်မွဲတၠ ချိုတ်အာလဝ် ပ္ဍဲမွဲဖရေပ်မတ်ဂှ် ဂွံတီကေတ် နူဇာဇၞိက်ကောန်ထံၚ်ပရေၚ်ဍုၚ်ကွာန်ဍုၚ်ဗၟာ PPNM ရ။
ကောန်ထံၚ်ပရေၚ်ဍုၚ်ကွာန် ကိုဝ်တူရအံၚ် ဒးဒုၚ်ဖျေံစၟတ်လဝ်ဒဏ်ထံၚ် နကဵုၝောံပိုဒ်လွဟ်လက်နက် ပ္ဍဲကဵုဗ္ဒမ်မၞိဟ်တြုံ ထံၚ်သာယာဝတဳဂှ်ဝွံ တုဲကၠုၚ်ပ္ဍဲဂိတုဂျာန္နဝါရဳ ၅ တေံ ချိုတ်အာလဝ်ရ။
ကိုဝ်တူရအံၚ် အာယုက် ၃၂ သၞာံဂှ် ဒပ်ဗၠာဲသၟိၚ်ထိၚ်ရး ဥက္ကလာပသၟဝ်ကျာတံ ရပ်ဒက်လဝ် သၞာံတုဲကၠုၚ်တေံ ပ္ဍဲဂိတုဂျောန်ဂှ်တုဲ နကဵုၝောံပိုဒ်လွဟ်လက်နက် ၂၃ (က) ဂှ် ရုၚ်သၞောဝ်ဓဝ်ပၞာန် ဖျေံစၟတ်လဝ်ဒဏ်ထံၚ် ၃ သၞာံရ။
အခိၚ်ကိုဝ်တူရအံၚ် ဒးဒုၚ်ရပ်ဂှ် ယဲဘဲစပ်ကဵုယဲကောန်တၟအ်ဟွံမွဲ ဒှ်ညးထတ်ယိုတ်မွဲတုဲ လၟုဟ်ဂှ် ချိုတ်အာလဝ် နကဵုယဲကောန်တၟအ်ရောၚ် ဂလာန်သၟိၚ်တၠအဝဵုတံ ဟီုလဝ်ဂှ် ဍာံပြ၊ ဟွံဍာံပြဂှ် ဒးစၟဳတ်ရောၚ် PPNM သ္ဂးရ။
တုဲကၠုၚ် ပ္ဍဲဂိတုဂျာန္နဝါရဳ ၁၀ တေံဂှ်လေဝ် ပ္ဍဲထံၚ်ဒိုက်ဥူ ရးဗဂေါဂှ် ကောန်ထံၚ်ပရေၚ်ဍုၚ်ကွာန်မွဲတၠ ဟွံဂွံပရေၚ်မၚ်မွဲရံၚ်စံၚ်ပရေၚ်ထတ်ယုက် ဗွဲမရုမ်ဂပ်တုဲ ဒးချိုတ်အာလဝ် နကဵုယဲဂၠံၚ်ပဿဴတၟအ်တန်ရ။
အတိုၚ်တၚ်နၚ် PPNM ဂှ်မ္ဂး အပ္ဍဲသၞာံ ၂၀၂၄ ပွိုၚ်မွဲသၞာံတုဲကၠုၚ်တေံဂှ် ပ္ဍဲကဵုထံၚ်စာတ်အလုံဍုၚ်မွဲဂှ် ဟိုတ်နူကံၚ်ဇြဳပၞာန် ဂစိုတ်ဂယိုၚ်ကၠုၚ် ဟွံမွဲကဵုသၞောဝ်ကီု ဟိုတ်နူဟွံဂွံပရေၚ်လွဳလွတ်ဂဥုဲ ဗွဲမရုမ်ဂပ်တုဲ ကောန်ထံၚ်ပရေၚ်ဍုၚ်ကွာန် အပံၚ်ဖအိုတ် ၃၁ တၠ ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ