ကအ်သံၚ်၊ ဂျာန္နဝါရဳ ၁၅
ပ္ဍဲရးတၞၚ်သဳ ပ္ဍဲပွိုၚ်ဍုၚ်ကအ်သံၚ်ဂှ် အရာပ်ဂမၠိုၚ် သွက်ဂွံကဵုမၞိဟ်ယိုက်လျိုၚ်ပၞာန်တံဂှ်ကီု ယဝ်ဟွံကဵုမ္ဂး တံၚ်ရပ်ပဝ်တာဏောၚ်ဂှ် ဒဒှ်ရကံၚ်ဇြဳပၞာန် ဘပဠလဝ်ဂှ် ညးဒေသတံ ဟီုကၠုၚ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုအရာပ်ကွာန် နွံပ္ဍဲပွိုၚ်ဍုၚ်ကအ်သံၚ်တံဂှ် နူကဵုသ္ကိုပ်အုပ်ဓုပ်ကံၚ်ဇြဳပၞာန်မွဲကဆံၚ် မွဲအရာပ်မ္ဂး မၞိဟ်တြုံ အကြာၜါတၠ စဵုကဵုမသုန်တၠ သွက်ဂွံယိုက်လျိုၚ်ပၞာန်ဂှ် အပ္ဍဲဂိတုဂျာန္နဝါရဳ သတ္တာဟဒုတိယတေံ စၞောန်ကၠုၚ်ရ။
ပ္ဍဲကဵုဏံ ပ္ဍဲကဵုပွိုၚ်ဍုၚ်ကအ်သံၚ် ဂကောံကွာန်(ဆယ်မိုၚ်) ဂှ်တှ်ေ သွက်ဂွံယိုက်လျိုၚ်ပၞာန်ဂှ် ဒးပလံၚ်ဗစိုပ်ကဵု မၞိဟ်တြုံမသုန်တၠဏောၚ် ပ္ဍဲဂိတုဂျာန္နဝါရဳ ၈ တေံ ကံၚ်ဇြဳပၞာန် ကဵုကၠုၚ်စၞောန် ဇရေၚ်သ္ကိုပ်အုပ်ဓုပ်ကွာန်ဂှ်ရောၚ် သ္ဂးရ။
ပ္ဍဲပွိုၚ်ဍုၚ်ကအ်သံၚ်ဂှ် အရာပ်နွံ ၂၀ပြၚ်တုဲ အရာပ်ဇၞော်ဇၞော်ဂှ် နွံဒၟံၚ် ဟွံအောန်နူကဵု ၅ တုဲ အရာပ်သှ်ေတံဂှ်တှ်ေ ဒှ်အရာပ်အဇာဒေါဝ်ကဵု အရာပ်အဇာဍောတ်တံရ။
ဟိုတ်နူတၚ်စၞောန် ဒးပလံၚ်ဗစိုပ်ကဵု ညးယိုက်လျိုၚ်ပၞာန် သွက်အရာပ်ညးကဵုညးဂှ်တုဲ ညးသၟတ်ဒေသဂမၠိုၚ် ပါဲဒလေတ်ဒၟံၚ်တုဲ ညးသၟတ်လ္ၚဵုတံဂှ်လေဝ် အခိၚ်ဗ္တံဟွံတိတ်မ္ၚးတုဲ မံၚ်ဒၟံၚ်အိုတ်ဂှ် သ္ဂးရ။
ပ္ဍဲဍုၚ်ကအ်သံၚ်ဂှ် ကၠာတေံ ညးသၟတ်ကောန်ဍုၚ်ဗၟာဗွဲမဂၠိုၚ် မဒးဒုၚ်ပလံၚ်ဖျဴ နူကဵုဍုၚ်သေံ ဍုၚ်ရနံၚ်ဂှ် ဒပ်ကံၚ်ဇြဳပၞာန်ကဵု ဂကောံလဝကတံ ပံၚ်တောဲတုဲ သွက်ဂွံယိုက်လျိုၚ်ပၞာန်ဂှ် ပကောံကၠုၚ်လဝ်ဗွဲအတေၚ်အဓမ္မတံ နွံလဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၈ တေံဂှ်လေဝ် ပ္ဍဲအရာပ်(ကြေးနန်တိုၚ်) ဂှ် ကံၚ်ဇြဳပၞာန် လုပ်စၟဳတ်စရၚ်ကၟုဲတုဲ ရပ်ဒက်ဏာ ညသၟတ်တံ နွံဂှ် ဂွံတီကေတ် အတိုၚ်ဂလာန် ညးဒေသတံကဵု ဂကောံဇြဟတ်ပၠန်ဂတးတံရ။
ပ္ဍဲပေါဲဗ္တိုက်ဗလးတိတံဂှ် ကံၚ်ဇြဳပၞာန် သီုကဵုကျဒၟံၚ် သီုကဵုဒးဆေၚ်ဒၟံၚ်မုက်ကဵု ဇြဟတ်ဒပ်လေၚ်ဒိုက်ဂှ်ဝွံ ဟိုတ်နူနွံပၟိက်ကဵုဇြဟတ်တုဲ ဂယိုၚ်ပ္တိုန်လမျီု သၞောဝ်ယိုက်လျိုၚ်ပၞာန်ဂှ်တုဲ ပံက်လဝ်တန်ဗ္တောန်ကွတ်ပၞာန် နူလၟေၚ် (၁) စဵုစိုပ် လၟေၚ် (၈) ရ။
အတိုၚ်တၚ်နၚ် ဂကောံလ္ၚတ်ကေၚ်ကာဗမာ ကေုာံ ပဋိပက္ခ BACS ဂှ်မ္ဂး ကောန်ဒပ်စှ်ေလဝ်တန်ဗ္တောန်ကွတ်ပၞာန် နူလၟေၚ် (၁) စဵုကဵု လၟေၚ် (၃) လၟိဟ် ၁၃၀၀၀ ပြၚ်ဂှ် ဒးဒုၚ်ပလံၚ်လဝ်မုက်ပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−Social Media