ရေဝ်၊ ဂျာန္နဝါရဳ ၁၆
ပ္ဍဲတွဵုရးဍုၚ်မန် ပွိုၚ်ဍုၚ်ရေဝ် ဒေသကြုၚ်လံၚ်ကဵု ကွာန်လ္ပာ်အပ္ဍဲဂမၠိုၚ် ဒၞါဲပရေၚ်ပၞာန်ၜါလ္ပာ်ကြံၚ်မ္ၚိုဟ်ဒၟံၚ်ဂှ် ကံၚ်ဇြဳပၞာန် ကၟာတ်လဒဵုလဝ် အခေါၚ်ဖ္ဍိုက်ပ္တိုန်ဗၞိက်စၞစသုၚ်သ္ဇိုၚ်တံကဵု ကၠေၚ်စက်တံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် နွံဒၟံၚ် ပ္ဍဲသၞေဟ်ကၚ်စၟဳတ်ကြုၚ်လံၚ်ဂှ်ဝွံ စနူဂိတုဂျာန္နဝါရဳ ၁၂ တုဲ ကၟာတ်လဒဵုလဝ် အခေါၚ်ဖ္ဍိုက်ဏာနၚ် ဗၞိက်စၞစသုၚ်သ္ဇိုၚ်တံဂှ်တုဲ ပ္ဍဲဂိတုဂျာန္နဝါရဳ ၁၄ ဂှ် ကၟာတ်လဝ် သီုကဵုအခေါၚ်ဖ္ဍိုက်ကၠေၚ်စက်တံရ။
ဟိုတ်နူကံၚ်ဇြဳပၞာန် ကၟာတ်လဒဵုလဝ်တုဲ အပ္ဍဲဒေသဂှ် ကၠေၚ်စက်ပိုတ်အိုတ်ကၠုၚ်တံ နွံကၠုၚ်တုဲ စနူကဵုဗၞိက်စၞစသုၚ်သ္ဇိုၚ် ပါလုပ်သီုကဵုသ္ၚုတံ ၚုဟ်က္ဍၚ်တိုန်ကၠုၚ်ဂှ် ညးဒေသတံ ဟီုရ။
အခိၚ်လၟုဟ် ကၠေၚ်စက်မွဲလဳတာဂှ် ဒှ်အာၚုဟ် ၄၀၀၀ ဒ္ကေဝ်၊ သ္ၚုမွဲရိုက် ၁၂ ကဠတ်ဂှ် ၚုဟ်သၠုၚ်တိုန်ကၠုၚ် စဵုကဵုမွဲကိုဋ်ပြၚ်တုဲ ဗၞိက်စၞစသ္ဇိုၚ်တံဂှ်လေဝ် တန်တဴကဵုဂကူဍေံတုဲ ၚုဟ်ဗက်တိုန်ကၠုၚ်ရ။
ဒေသကြုၚ်လံၚ် ဒၞါဲဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ်ဂှ် တုဲကၠုၚ်ပ္ဍဲဂိတုဂျာန္နဝါရဳ ၈ တေံ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်ဂှ် ဒပ်ကံၚ်ဇြဳပၞာန် ဒးဂိလဝ်ဂှ်ဝွံ ရပ်စပ်ဗျူဟာထပိုတ်ပန်ထပိုတ်တုဲ ပ္တိတ်ကၠုၚ်ဇြဟတ် သွက်ဂွံထပိုတ်ဇွောံမ ဒပ်ပၠန်ဂတးတံရ။
ပေါဲဗ္တိုက်ကြုၚ်လံၚ်ဝွံ ပ္ဍဲဂိတုဂျာန္နဝါရဳ ၁၅ ဂှ် ဒှ်ဒၟံၚ်အကာဲအရာပၞာန်ၜါလ္ပာ် ဆေၚ်လဝ်မုက်တုဲ ကံၚ်ဇြဳပၞာန်ဂှ်လေဝ် ထပ်ဗလးလဝ် ကရောၚ်ပၞာန်အရီုတံရ။
ဟိုတ်နူပေါဲဗ္တိုက်ၜါလ္ပာ်တုဲ ညးဒေသ နူကဵုကွာန်ကြုၚ်လံၚ်၊ ကွာန်အကျာံ၊ (အိုင်ပုတ်)တံ မပါလုပ် ကွာန်ဗ္ဒါဲဗ္ဒါဲတံ ၁၀၀၀ ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲကဵုကွာန် နွံပ္ဍဲတိဍာ်ထိၚ်ဒက်ဗော်ဍုၚ်မန်တၟိရ။
ပရိုၚ်−သြၚ်လောန်တိုၚ်(မ်)
ဗီု−CJ