နေဗျဳဒဝ်၊ ဂျာန္နဝါရဳ ၁၆
လာၚ်ဇြေန်ဗွဲမလုပ်သၞောဝ်ဟွံမွဲမွဲသာ် နကဵုတၚ်စောဲစပ် ကၠောန်ကမၠောန်လှာဲသြန်ဍုၚ်သ္အာၚ်ဂှ် ပံက်လဝ်ဂဗုတ် ကုမၞိဟ်ကၠောန်ကလောန်လှာဲသြန်ဟောန်ဒဳ ၁၅ တၠဂှ် တိုက်သြန်ဗဟဵုကံၚ်ဇြဳပၞာန် လလောၚ်ပ္တိတ်ကၠုၚ် ပ္ဍဲဂိတုဂျာန္နဝါရဳ ၁၄ တေံရ။
ၚုဟ်သြန်ဍုၚ်သ္အာၚ် သၠုၚ်တိုန်ကၠုၚ်တုဲ တိုက်သြန်ဗဟဵုကံၚ်ဇြဳပၞာန်ကဵု ဂကောံပံၚ်ကောံ ဌာနအပ္ဍဲဍုၚ်တံဝွံ စၟဳတ်လဝ် စရၚ်တိုက်သြန် ညးမဒယှ်ဒၟံၚ် ဒဒှ်ရကၠောန်ကမၠောန်ဟောန်ဒဳတံကဵု စၟဳတ်လဝ် ဒဒှ်မလှာဲလဝ်သြန် မရပ်စပ်လဝ်သၞောတ်ဗာန်တံဂှ် သ္ဂးရ။
ပ္ဍဲအရာစၟဳတ်သာ်ဏံဂှ် မၞိဟ်ဒ္စိတ်တၠ သွံရာန်လှာဲဂတးဒၟံၚ် သြန်ဍုၚ်သ္အာၚ်ဟွံလုပ်သၞောဝ်တံဂှ် ဒပ်ဗၠာဲသၟိၚ် ပံက်ဂဗုတ်တုဲ တြဴတၠဂှ် စောဲလဝ်ဂဗုတ် ပ္ဍဲရုၚ်သၞောဝ်ဓဝ်မဆေၚ်စပ်တံရောၚ် လလောၚ်ပ္တိတ်လဝ်ရ။
သ္အာၚ်နူဂှ်ပၠန် နူကဵုမုက်လိက်ဇာဇၞိက်ပရေၚ်မၞိဟ်တံမွဲကဆံၚ် မလှာဲဂတးသွံရာန်ဒၟံၚ်သြန်ဍုၚ်သ္အာၚ် ဟွံလုပ်သၞောဝ်ဂှ် Facebook group ၁၂ ၊ Facebook Page ၅ ကဵု မ္ၚးနူကဵုမၞိဟ်ဂှ် တၠအကံက် Facebook ၁၀ တၠဂှ်လေဝ် ဂွံကေတ်အရေဝ်မာန်ဂှ် စၟဳတ်ထ္မံက်ပ္တိတ်ဒၟံၚ်ရောၚ် သ္ဂးလဝ်ရ။
တၠကမၠောန်ပရေၚ်ပိုန်ဒြပ် ဟွံမိက်ထ္မံက်ယၟုမွဲတၠဂှ်တှ်ေ တၠကမၠောန်ပရေၚ်ပိုန်ဒြပ် ဝေၚ်ဒၟံၚ်သြန်ဍုၚ်သ္အာၚ်ဗွဲမဂၠိုၚ်ဝွံ ကဵုလာပ်ကုကောန်ရဲသၟဝ်တဲကံၚ်ဇြဳပၞာန်တံတုဲ ဝေၚ်ဒၟံၚ်ၚုဟ်တုဲ ဒဒှ်မရပ်ဒက်ကေတ်အရေဝ် ခိုဟ်ဟ်ဟွံမွဲဂှ်ရ ၚုဟ်ထပ်တိုန်ဒၟံၚ်ဏီဏောၚ်ဂှ် ဟီုရ။
“တၠကမၠောန်ပရေၚ်ပိုန်ဒြပ် အဓိကဗွဲမဂၠိုၚ်ဂှ်လေဝ် အခိၚ်ဏံဂှ် ကၠောန်ပရေၚ်ပိုန်ဒြပ်ခိုဟ်အိုတ်ရဏောၚ်။ ခိုဟ်အိုတ်ဟီုဂှ် ကၠာဟွံဂွံစိုပ်ပေါဲရုဲမာဲဏံဂှ် ဍေံတံလေဝ် ဂွံဝေၚ်ၚုဟ်ဂှ် ကဵုလာပ်တုဲဂ္စါန်အာဏောၚ်။ အေ ဂှ်တှ်ေ ရဲဝေၚ်ၚုဟ်တံဂှ်လေတ် ပြဟ်ဟ်ဏံ ၜိုတ်ဝေၚ်ဂွံဂှ်ဝေၚ်တုဲ ဂၠါဲအာဒတုဲဖဵုသွက်ဍေံတံဏောၚ်။ ရဲရပ်တံဂှ်လေဝ် ပွမရပ်ဒက်တံကေတ်အရေဝ်တံဂှ် ဟွံကၠောန်ချိုတ်တ်ပၠိုတ်တ်ပုဟ် စဒၟံၚ်လာဘ်ဏောၚ်။ ပ္ဍဲအကာဲအရာသာ်ဏံဂှ် ဟိုတ်နူဝေၚ်ၚုဟ်တုဲ တိုန်ဒၟံၚ်ရ” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ သွံရာန်လှာဲဂတးသြန်ဍုၚ်သ္အာၚ် ဟွံလုပ်သၞောဝ်ဂးတုဲ ရဲညးတံ မရပ်လဝ်ဗွဲမဂၠိုၚ်ဂှ်ဝွံ ဒှ်ရဲကၠောန်ဒၟံၚ်ၜိုတ်ဂွံစသုၚ်ရဏောၚ်တုဲ ယဝ်ဟွံရပ်ဒက် တၠကမၠောန်ဇၞော်ဇၞော် ကၠောန်ဒၟံၚ်အဓိကတံဂှ်ပုဟ်ဟီုမ္ဂး ဒဒှ်မဝေၚ်ဒၟံၚ်ၚုဟ်တံ ကၠေံအာဟွံမာန်ပုဟ်ဂှ် ညးဆက်ဟီုရ။
သြန်ဍုၚ်သ္အာၚ်အပ္ဍဲဍုၚ် မပ္တံကဵုသြန်ဒဝ်ဠာအမေရိကာန်တံဂှ်တှ်ေ ၚုဟ်ဍေံဂှ်ဝွံ အပ္ဍဲဂိတုဂျာန္နဝါရဳ သတ္တာဟပထမဂှ် မွဲဒဝ်ဠာ နွံဒၟံၚ်အကြာ ၄၃၀၀ ဒ္ကေဝ်ကဵု ၄၇၀၀ ဒ္ကေဝ်၊ သြန်ၝာတ်သေံဂှ်လေဝ် မွဲဒဝ်ဠာဂှ် အကြာ ၁၂၀ ဒ္ကေဝ်ကဵု ၁၄၀ ဒ္ကေဝ် ၚုဟ်သၠုၚ်တိုန်ကၠုၚ်သၟးဟွံက ၚုဟ်သြန်ဍုၚ်သ္အာၚ်တၞဟ်ဟ်တံလေဝ် သၠုၚ်တိုန်ဒၟံၚ်ရ။
တိုက်သြန်ဗဟဵုကံၚ်ဇြဳပၞာန်ဂှ်တှ်ေ ညံၚ်ၚုဟ်သြန်ဍုၚ်သ္အာၚ်ဂွံညိၚ်၊ ညံၚ်ဟွံဂွံဝေၚ်ၚုဟ်သြန်တံဂှ် ကုသွက်တၠကမၠောန်ဗၞိက်ပၠောပ်တံဂှ် သွံတြးကဵုဒၟံၚ်သြန်ဍုၚ်သ္အာၚ် မနွံပၟိက်တံ နူကဵု Online Trading Platform တံမွဲကဆံၚ်ကီု၊ အာလွဳယဲ၊ အာကတ်ဗ္တောန်ပညာ၊ အာလ္ၚောဝ်ကျာ် ကေုာံ ညးမတိတ်ကၠောန်ကမၠောန် ဍုၚ်သ္အာၚ်တံဂှ်တှ်ေ သွံတြးကဵုဒၟံၚ် သြန်ဍုၚ်သ္အာၚ်တံ ပ္ဍဲကဵုတိုက်သြန်ပုဂ္ဂလိကတံရောၚ် သ္ဂးရ။
သ္အာၚ်နူဂှ်ပၠန် လာၚ်ဇြေန်နူကဵုတိုက်သြန်ဗဟဵု ပ္တိတ်ကဵုလဝ်ဗွဲမလုပ်သၞောဝ်တံ ဟွံမွဲမွဲသာ် နကဵုတၚ်ရန်တၟံနွံနွံ မၞိဟ်ပူဂဵု ကေုာံ ဂကောံ မရာန်သွံလှာဲဂတးဒၟံၚ် သြန်ဍုၚ်သ္အာၚ်တံဂှ် ပွမကေတ်အာအရေဝ် ဗွဲမစိုပ်တရဴတံဂှ် သၠုၚ်ပ္တိုန်အသိၚ်တုဲ ရေၚ်တၠုၚ်အာဏောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ