မတ်မလီု၊ ဂျာန္နဝါရဳ ၁၆
လၟေၚ်ကမၠောန်လှဲပ္တိုန် ဗွိုၚ်ပရေၚ်ဍုၚ်ကွာန် အပ္ဍဲဍုၚ်တံဂှ် သွက်ဂွံသၠုၚ်ပ္တိုန်ရေၚ်တၠုၚ်အာဂှ် ဆက်ပ္တိတ်အာဇြဟတ်ဏောၚ် နူကဵုကောံဓရီုက္ဍိုက်ပ် ဂကောံရပ်လွဟ်ကောန်ဍုၚ်အရၚ်ဒေါအ်ပန်ပှော် မဟာမိတ် ၇ ဂကောံတံ ကဵုကၠုၚ်သမ္တီရ။
ပ္ဍဲကဵုကောံဓရီု မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၁၄ ဂှ် သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ပိုန်ဒြပ် မက္တဵုဒှ်ဒၟံၚ်လၟုဟ်တံကဵု ဒဒိုက်ပရေၚ်မၞိဟ် ညးဍုၚ်ကွာန်တံ မဒးဆေၚ်ဒၟံၚ်မုက်လၟေၚ်တ္ၚဲတံဂှ်တုဲ လလောၚ်ပ္တိတ်ကၠုၚ် လၟေၚ်ကမၠောန်လ္ၚဵုတံရ။
ပ္ဍဲကဵုဏံ အပ္ဍဲသၞာံ ၂၀၂၅ ဏံ ဗွဲမဗဗွဲကဵုအကာဲအရာပရေၚ်ဍုၚ်ကွာန် မက္တဵုဒှ်ကၠုၚ်မာန်တံဂှ် ညံၚ်ဂွံရေၚ်တၠုၚ်မာန် ဒစးဒုၚ်သွက်ဂွံပလေဝ်ပလေတ်လဝ်ဂှ်ကီု ညံၚ်ပရေၚ်ဆဵုဂဗသဳကၠဳပရေၚ်ဍုၚ်ကွာန် ညးမဆေၚ်စပ်သီုဖအိုတ်ပါလုပ်ဂွံဒှ်ကၠုၚ်တံ ပါလုပ်ရ။
သ္ကိုပ်ဗိုလ်ဇၞော် သဝ်ကျဝ်ညောအ် ညးမၞုံအခေါၚ်ဟီုဂး ဂကောံမဟာမိတ်ဒေါအ်ပန်ပှော် ၇ ဂကောံဂှ် ပ္ဍဲအရာသဳကၠဳဟီုဂး သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳဂှ် မိက်ဂွံသ္ဂး ကုဂကောံဗော်သွး မၞိဟ်ပူဂဵုထေက်ကဵုပါလုပ်တံသီုဖအိုတ်ဂှ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နကဵုပိုယ်ကၠိုဟ်ကေတ်လဝ်ဂှ်တှ်ေ မၞိဟ်ပါလုပ်ထေက်တံဂှ်တှ်ေ ပ္ဍဲအရာဟီုဂး သ္ဂောံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳဂှ် ဂကောံဗော်သွး မၞိဟ်ပူဂဵု ထေက်ကဵုပါလုပ် လ္ပာ်ဒဳမဝ်ကရေဇြဳတံသီုဖအိုတ်ဂှ် ဒးပါဏောၚ်တုဲ ဟီုဏာဖေဝ်ဒရာမ္ဂး ဂကောံရပ်လွဟ်ကောန်ဍုၚ်အရၚ် ဗော်ပရေၚ်ဍုၚ်ကွာန်ကောန်ဍုၚ်အရၚ်တံ ဒးပါဏောၚ်တုဲ မွဲအဆက်ဓဝ် ဂွံတတ်ၜက် အခက်အခုဲအကြေပ်အဂြတ်လၟုဟ်တံမာန်ဂှ် ဂကောံဗော်သွး ပူဂဵု ဟွံဟီုဟွံတုဲ ဟွံဆဵုဟွံဂွံ ဟွံပါဟွံဒှ် ထေက်ကဵုပါလုပ်သီုဖအိုတ်တံဂှ် နကဵုပိုယ် မိက်ဂွံသ္ဂးရ”သာ်ဝွံ သ္ဂးရ။
သွက်ပရေၚ်ဆဵုဂဗသဳကၠဳတံ ဂွံဒှ်ဂှ် စၟတ်သမ္တီလဝ် အခိၚ်ကာလဟွံမွဲတုဲ သီုၜါလ္ပာ် မ္ဒးပံၚ်တောဲပါလုပ်ဏောၚ်တုဲ ဂွံထ္မံက်ရုပ်ရဴကဆံၚ်တုပ်သၟဟ်မာန်ဂှ် စနူကဵုဒၞါဲသဳကၠဳမာန်တံဒှ်တမ် အဂျာန်ဒါတံကဵု အခိၚ်ကာလဂှ်ဝွံ တန်တဴကဵုလ္တူတၚ်တုပ်စိုတ်ဒစးဒုၚ်ပ္ညဳပ္ညပ်တံတုဲ ဒှ်ကၠုၚ်မာန်ဏောၚ်ဂှ် ညးဆက်ဟီုရ။
ပ္ဍဲကဵုလၟေၚ်ကမၠောန်သှ်ေတံဂှ်တှ်ေ ဂွံထ္မံက်ပရေၚ်ၜိုဟ်လလမ်တံကီု ပရေၚ်ပံၚ်တောဲရေၚ်တၠုၚ်ပ္ညဳပ္ညပ် အပ္ဍဲ EAO တံ ဂွံဂၠိုၚ်ကၠုၚ်ဂှ်ကဵု သွက်ဂွံသၠဲပ္တိုန်ဗွိုၚ်ပရေၚ်ဍုၚ်ကွာန် အပ္ဍဲဍုၚ်တံဂှ် သဳကၠဳလဝ်ရ။
ပ္ဍဲအရာသၠဲပ္တိုန်ဗွိုၚ်ပရေၚ်ဍုၚ်ကွာန်ဂှ် သွက်ဂွံပလေဝ်လဝ် မူသ္ဇိုၚ်ဖေဝ်ဒရာ အကြာဂကောံမဟာမိတ်ဒေါအ်ပန်ပှော် ၇ ဂကောံတံဂှ်ကဵု တွဵုရးညးကဵုညး ညံၚ်သၞောဝ်သ္ဇိုၚ်ဒက်ပ္တန်တံ ဂွံမံက်ဂတဝ်ကၠုၚ်မာန်ဂှ် ဒးပ္တိတ်ဇြဟတ်ဏောၚ်တုဲ ညံၚ်ဂွံသၠုၚ်ပ္တိုန် လၟေၚ်ကမၠောန်ပရေၚ်ဗ္စာရဏာမၞိဟ်တံမာန်ဂှ်လေဝ် ဒးဂၠါဲနဲကဲဏောၚ်ဂှ် သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။
သ္အာၚ်နူဂှ်ပၠန် ဂွံပံၚ်တောဲကၠောန်ၜိုတ်အာ ကရောံဂကောံရပ်လွဟ်ကောန်ဍုၚ်အရၚ် ဂကောံဇြဟတ်ပၠန်ဂတးတံမာန်ကီု ကဵုဂကောံအာဇြဳယာန်တံဂှ်လေဝ် ညံၚ်ဂွံဆက်ဆောံမာန် နကဵုဂကောံမဟာမိတ်ဒေါအ်ပန်ပှော် ၇ ဂကောံတံ ပ္တိတ်အာဇြဟတ်ဏောၚ်ဂှ် ညးဆက်ဟီုရ။
“မွဲအဆက်ဓဝ် နကဵုကမၠောန်မ္ဒးကၠောန်အာ ကုဂကောံဇြဟတ်လ္ပာ်မ္ၚးတံဂှ်တှ်ေ နကဵုပိုယ်တံ ပံၚ်တောဲကဵုဂကောံရပ်လွဟ်ကောန်ဍုၚ်အရၚ်ကောဒေံ တၞဟ်ဟ်တံတုဲ ဂွံပံၚ်တောဲကၠောန်အာမွဲစွံမာန်ဂှ် ပိုယ်တံ မ္ဒးပ္တိတ်ဇြဟတ်ဏောၚ်။ ညအ်ဂှ်လေဝ် ဒှ်လၟေၚ်ကမၠောန်မွဲရ။ မွဲပၠန်ဂှ် ဂွံတတ်ၜက်အကြေပ်အဂြတ်ကၟိန်ဍုၚ်ပိုယ်တ္ၚဲဏံဂှ်ဟီုမ္ဂး အရီုဗၚ်ထံက်ပၚ် ဍုၚ်သ္အာၚ်တံဂှ်လေဝ် ဟွံသ္ပကာဟွံဂွံ ကၠိုဟ်လဝ်သာ်ဏံတုဲ ခြာဟွံလအ် ဂွံဆက်ဆောံဆဵုဂဗအာကဵု က္ဍိုပ်သ္ကိုပ်ဍုၚ်အာဇြဳယာန်တံ ပါလုပ်သီုကဵုသ္ကိုပ်ဝန်ဇၞော်မလေဝ်ယှာ မဒှ်ကၠုၚ်ဥက္ကဌဒးအလန်အာဇြဳယာန်ဂှ်မာန်ဂှ် ပိုယ်တံ မ္ဒးဂ္စါန်ဒၟံၚ်ရ” သာ်ဝွံ သ္ဂးရ။
ကဵုက္ဍိုပ်သ္ကိုပ်ဍုၚ်ဇိုၚ်ဝုတ်ဒိုဟ် ဍုၚ်ကြုက်၊ ဍုၚ်အိန္ဒိယ ကေုာံ ဍုၚ်သေံတံ ကဵုဂကောံဂမၠိုၚ်တံဂှ်လေဝ် ဆက်ဆောံတုဲ ဂွံတတ်ၜက်အာ အကြေပ်အဂြတ်ဍုၚ်ဗၟာဏံမာန်ဂှ် ဖျေံစၟတ်လဝ် နဒဒှ်လၟေၚ်ကမၠောန် မ္ဒးပံၚ်တောဲရေၚ်တၠုၚ်အာဏောၚ် မဒှ်ရ။
ပ္ဍဲဍုၚ်ဗၟာ ဗွိုၚ်ပၞာန်မလှဲလးကၠုၚ်ဒၟံၚ်ဂှ် ဂွံလှဲပ္တိုန်ဗွိုၚ်ပရေၚ်ဍုၚ်ကွာန်ဂှ် ဂကောံမဟာမိတ် ဂကောံရပ်လွဟ်ကောန်ဍုၚ်အရၚ်ဒေါအ်ပန်ပှော် ထပှ်ဂကောံဝွံ ညံၚ်ပေါဲသဳကၠဳဆဵုဂဗ လ္ဂောံကဵုပရေၚ်ဍုၚ်ကွာန်တံဂွံဒှ်ဂှ် ပ္တိတ်ကၠုၚ်ဒၟံၚ်ဇြဟတ်အဆက်က်ရ။
လအာတုပ်သာ်ဂှ်ကီု ကံၚ်ဇြဳပၞာန်ဂှ်လေဝ် သွက်ဂွံဆဵုဂဗသဳကၠဳဂၠါဲသွဟ် ပြသၞာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ဂှ် ကော်ဘိက်ကၠုၚ်ဒၟံၚ် သီုကဵုအဝဵုတံ မွဲဏှမွဲဏှကီုလေဝ် ပ္တဝ်အာက္ဍိုပ် ဇရေၚ်ဝိုၚ်သဳကၠဳ သီုညးဖအိုတ်မပါလုပ်မွဲမာန်ဂှ် ဟွံမာန်ဏီရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် ဟီုဂးဒၟံၚ် ဂွံလှဲပ္တိုန်ဗွိုၚ်ပရေၚ်ဍုၚ်ကွာန်ဂှ်ဝွံ ဒှ်ပရေၚ်ချဳဒရာၚ် မသ္ၚောဲဒၟံၚ်ကဵုတၚ်ပ္တဝ်က္ဍိုပ် ပၠန်ဂတးဂှ်တုဲ ညးဍုၚ်ကွာန်တံ ဒုၚ်တဲဟွံသေၚ်ပုဟ်ဂှ် သ္ၚဳဂၠိပ်လဝ်ရ။
“နူကဵုဂကောံဏံ ဟီုကၠုၚ် ဂွံလှဲပ္တိုန်ဗွိုၚ်ပရေၚ်ဍုၚ်ကွာန် ပ္ဍဲကဵုအကာဲအရာဗွိုၚ်ပရေၚ်ပၞာန် မလှဲလးကၠုၚ်ဒၟံၚ်ဏံဂှ်ဝွံ ဍာံဍာံဂှ် ထံက်ဂလာန်ကဵုဒၟံၚ်ဇြဟတ် ကုကံၚ်ဇြဳပၞာန်ဏောၚ်။ ဟိုတ်ဂှ်ရ ကဵုတိုၚ်ပ္ကဴပၠန်ဂတးက္ညၚ်ညးဍုၚ်ကွာန် မပ္တိတ်ဒၟံၚ်ဇြဟတ် ဂွံပလီုကၠေံ ကံၚ်ဇြဳပၞာန်ဂှ်တှ်ေ ဒှ်ပရေၚ်ချဳဒရာၚ်ပရေၚ်ဍုၚ်ကွာန် ဂကောံဗက်ဍာ်သာတံဂှ်ရ ညးဍုၚ်ကွာန်တံဂှ်တှ်ေ ဟွံထံက်ဂလာန်ပုဟ်ဂှ် ကဵုအဲဂွံဟီုညိ” သာ်ဝွံ သ္ဂးရ။
ပ္ဍဲဂိတုဂျာန္နဝါရဳမံက်ဏံ ပ္ဍဲကဵုတၚ်တုပ်စိုတ်ၚိုဲသံၚ် ဂကောံဇြဟတ်ပရေၚ်ဍုၚ်ကွာန်အပ္ဍဲဍုၚ် မမံက်တိတ်ကၠုၚ်တံဂှ်တှ်ေ ဖ္ဍိုက်ဖ္အောဝ်ကၠုၚ် ဒေါအ်ကၠေံပေါဲပၞာန် မက္တဵုဒှ်ဒၟံၚ်အလုံဍုၚ်မွဲတံဂှ်တုဲ သွက်ဂွံသဳကၠဳပရေၚ်ဍုၚ်ကွာန်ဂှ် ဂွံဆဵုကေတ်ရ။
အလဵုအသဳဍုၚ်သ္အာၚ်တံဂှ်လေဝ် ပ္ဍဲဍုၚ်ဗၟာ ပတုဲဒှ်ကၠေံပွပကီုပရာပ်တံတုဲ ညံၚ်ဂွံကၠောန်ပေါဲသဳကၠဳ သီုညးဖအိုတ်ပါလုပ် မၞုံကဵုသဘဴပလေဝ်တံဂှ် ဖ္တိုက်ဖ္အောဝ်လဝ် ကံၚ်ဇြဳပၞာန်ကဵု ဂကောံရပ်လွဟ်တံသီုဖအိုတ်ရ။
ပ္ဍဲကဵုဂကောံမဟာမိတ်ဒေါအ်ပန်ပှော် ၇ ဂကောံဂှ် ကံၚ်ဇြဳကလေၚ်ဒက်ပ္တန်ဍုၚ်သေံ၊ ဗော်ဍုၚ်မန်တၟိ၊ ဗော်ဗၠးၜးဍုၚ်ရခေၚ်၊ ဒပ်ပၞာန်ကရေၚ် ဒတုဲဖဵုဒဳမဝ်ကရေဇြဳ၊ ကံၚ်ဇြဳပရေၚ်ၜိုဟ်လလမ်ကရေၚ်၊ ဗော်သွးဒဳမဝ်ကရေတ်တေတ်လာဟူ ကေုာံ ဂအုပ်ဂကောံဗၠးၜးကောန်ဂကူပအိုဝ်တံ ပါလုပ်ရ။
ပရိုၚ်−သြၚ်လောန်တိုၚ်(မ်)
ဗီု−EAOs