မတ်မလီု၊ မာတ် ၂၁
ပပ္တံနူဂိတုမာတ်သတ္တာဟဒုတိယဏံတုဲ ၚုဟ်ထဝ်ဂၠးတိ သၠုၚ်တိုန်ကၠုၚ်တုဲ ၚုဟ်ထဝ်အပ္ဍဲဍုၚ်လေဝ် ဗက်သၠုၚ်တိုန်ကၠုၚ်လဝ်ရောၚ် တၠကမၠောန်ထဝ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်အပ္ဍဲဂိတုမာတ် သတ္တာပထမတေံ ၚုဟ်ထဝ်ဂၠးတိဂှ်တှ်ေ ထဝ်မွဲ(အံက်သ) ၚုဟ်နွံကၠုၚ် ပွဳပွူၜိုတ် ၂၈၅၀ အမေရိကာန်ဒဝ်ဠာတုဲ တ္ၚဲဏံ ပ္ဍဲဂိတုမာတ် ၂၀ ဂှ်တှ်ေ ထဝ်မွဲ(အံက်သ) ၚုဟ်သၠုၚ်တိုန်ကၠုၚ် စဵုကဵု ၃၀၅၀ ဒဝ်ဠာအမေရိကာန်ရ။
ဟိုတ်နူၚုဟ်ထဝ်တိုန်ကၠုၚ်သာ်ဏံတုဲ ပ္ဍဲကဵုၚုဟ်ထဝ်အပ္ဍဲဍုၚ်ဂှ် ၚုဟ်ထဝ်မဳဠေန် မွဲဒ္ကေဝ် နူကဵု ၆၅ ကိုဋ်ဒ္ကေဝ်ဂှ် သၠုၚ်တိုန်ကၠုၚ် စဵုကဵု ၆၉ ကိုဋ်ဒ္ကေဝ်ရ။
ဟိုတ်နူပြဒ္ဒညာ မက္တဵုဒှ်ဒၟံၚ် အကြာအမေရိကာန်ကဵု ယဳမေန်တံဂှ်တုဲ ၚုဟ်ထဝ်ဂၠးတိ သၠုၚ်တိုန်ကၠုၚ်ဒၟံၚ်တုဲ ၚုဟ်ထဝ်အပ္ဍဲဍုၚ်လေဝ် သၠုၚ်တိုန်ကၠုၚ်လဝ်ရောၚ် တၠကမၠောန်ဆေၚ်ထဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ် ဒှ်မံၚ်ဂှ်တှ်ေ ၚုဟ်ထဝ်ဂၠးတိဂှ် မွဲအံက်သ တိုန်အာ စဵုကဵု ၃၀၀၀ ပြၚ်ရ။ မုပရောဟီုတှ်ေ နူကဵုယဳမေန်တံ ပန်နၚ် က္ၜၚ်ဒပ်ဍာ်အမေရိကာန်တံတုဲ လ္ပာ်အမေရိကာန်တံဂှ်လေဝ် ပြဟ်ဟ်ဏံ အာထောံလဝ်မခတိုဟ်ကီုရ။ ပရေၚ်တံဏံ က္တဵုဒှ်လဝ်တုဲ ၚုဟ်ထဝ်ဂၠးတိ တိုန်အာလဝ်ရ။ ဟိုတ်ဂှ်ရ ၚုဟ်ထဝ်ဍုၚ်ဗၟာလေဝ် ဗက်တိုန်အာကီုရ” သာ်ဝွံ သ္ဂးရ။
သ္အာၚ်နူဂှ်ပၠန် ၚုဟ်ထဝ်အပ္ဍဲဍုၚ်ဝွံ ဟိုတ်နူတန်တဴဒၟံၚ်ကဵုၚုဟ်ထဝ်ဂၠးတိကဵု ၚုဟ်ဒဝ်ဠာအပ္ဍဲဍုၚ် တိုန်စှ်ေဂှ်ရ ၚုဟ်ဒဝ်ဠာလၟုဟ်ညိၚ်ဒၟံၚ်တုဲ ၚုဟ်ဍေံတိုန်ကၠုၚ်လဝ် ၜိုတ်ဏံရဂှ် ညးဆက်ဟီုရ။
ဟိုတ်နူၚုဟ်ထဝ်လၟုဟ် သၠုၚ်တိုန်ကၠုၚ်ဒၟံၚ် အဆက်က်တုဲ အပ္ဍဲဗွဝ်ဖျာ ပရေၚ်သွံရာန်အောန်ဒၟံၚ်တုဲ ဌာနမဆေၚ်စပ်သၟဝ်တဲကံၚ်ဇြဳပၞာန်တံလေဝ် ကၠုၚ်စိုပ်မၚ်ရံၚ်ဒၟံၚ်တံ နွံဒၟံၚ်ဂှ် တၠကမၠောန်ဆေၚ်ထဝ်ဂမၠိုၚ် ဟီုရ။
မွဲလ္ပာ်ဂှ်ပၠန် သွက်ဂွံထိၚ်ဒက်ၚုဟ်ထဝ်အပ္ဍဲဍုၚ်ဂးတုဲ ပ္ဍဲသၞာံ ၂၀၂၄ ဂိတုအံက်တဝ်ဗာ ၂၄ တုဲကၠုၚ်တေံ ကံၚ်ဇြဳပၞာန် ဒက်ပ္တန်လဝ် ကမ္မတဳခုတ်ပ္တန်ၚုဟ်ထဝ်တံဂှ်တုဲ ခုတ်ပ္တန်ကဵုဒၟံၚ် ၚုဟ်နှေန်ထဝ်တံ လၟေၚ်ဒဒှ်တ္ၚဲရ။
အတိုၚ်တၚ်လလောၚ်တြး ကမ္မတဳခုတ်ပ္တန်ၚုဟ်ထဝ် ကံၚ်ဇြဳပၞာန်ဂှ်မ္ဂး ပ္ဍဲဂိတုမာတ် ၂၀ ဏံ ထဝ်မွဲဒ္ကေဝ် ၅၅၈၀၀၀၀ ဒ္ကေဝ်နွံရောၚ် လလောၚ်ပ္တိတ်လဝ်ကီုလေဝ် နတဲဏံ ရာန်ကေတ်နကဵုၚုဟ်ဏံ ဟွံဂွံရ။
ပ္ဍဲဍုၚ်ဗၟာဏံ လက်ထက်အလဵုအသဳ NLD တုဲကၠုၚ်တေံဂှ် ၚုဟ်ထဝ်ဂှ်တှ်ေ ထဝ်ဒကောၚ် မွဲဒ္ကေဝ် နွံလဝ် ၁၃ ကိုဋ်ဒ္ကေဝ်တုဲ ကြဴနူကံၚ်ဇြဳပၞာန် သီအဝဵုတုဲဂှ် ၚုဟ်ဍေံ သၠုၚ်တိုန်ကၠုၚ်လဝ် စဵုကဵု ၅ ဆတုဲ ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ