နေဗျဳဒဝ်၊ မာတ် ၂၁
ပရေၚ်ဒပ်ပၞာန်ဗၟာ ကလိလောန်ပကီုပရာပ်ကၠုၚ်လဝ် လ္တူညးဍုၚ်ကွာန်တံဂှ်ကဵု ဟိုတ်နူပဋိပက္ခ မက္တဵုဒှ်ဒၟံၚ် ဒၟါနူပရေၚ်ပၞာန်သီအဝဵုတံဂှ် နကဵုအာဇြဳယာန် သွက်ဂွံဘိုၚ်သောၚ်ကလးကဵုဂှ် အလဵုအသဳညဳသၟဟ်ဂကူ NUG ဖ္တိုက်ဖ္အောဝ်လဝ်ရ။
စပ်ကဵုဒပ်ပၞာန်ဗၟာ ကလိလောန်ကၠုၚ် ပွပကီုပရာပ် လ္တူညးဍုၚ်ကွာန်ဍုၚ်ဗၟာတံ ဂၠိုၚ်တိုန်ကၠုၚ်ဂှ်တုဲ ဌာနဝန်ဇၞော်ကာဍုၚ်သ္အာၚ် NUG လလောၚ်ပ္တိတ်လဝ် တၚ်လလောၚ်တြး ပ္ဍဲဂိတုမာတ် ၁၉ တေံရ။
နကဵုအာဇြဳယာန် ဖျေံစၟတ်အာလၟေၚ်ကမၠောန် မစိုပ်တရဴတံဂှ်တုဲ သ္ဂောံမၚ်မွဲကတိကဝတ် မစွံကၠုၚ်လဝ် လ္တူဂီုကၠီုအပ္ဍဲဒေသ ကေုာံ အခေါၚ်အရာမၞိဟ် နူကဵုသၟဝ်ပၠတရဴ ဍုၚ်မလေဝ်ယှာ နဒဒှ်ဥက္ကဌဂှ် ဖ္တိုက်ဖ္အောဝ်လဝ်ရ။
အတိုၚ်အခေါၚ်အဝဵု နူကဵုလိက်ပဋိညာန်အာဇြဳယာန် မပအပ်ကဵုလဝ်ဂှ်မ္ဂး အာဇြဳယာန်ဝွံ သွက်ဂွံထံက်ပၚ်ရီုဗၚ် ပရေၚ်ညိၚ်ဝတ် ကေုာံ ပရေၚ်ၜိုဟ်လလမ် အဓာန်ဇမၠိၚ်ဂှ် ပရေၚ်ကေတ်ဒုဟ်ဒဏ် မဍိုက်ပေၚ်ကဵုအဓိပ္ပာယ်တံဂှ် အခေါၚ်ကၠောန်နွံရောၚ် NUG သ္ဂးရ။
အတိုၚ်စၟတ်သမ္တီ ဌာနဝန်ဇၞော်အခေါၚ်အရာမၞိဟ်ဂှ်မ္ဂး နူသၞာံ ၂၀၂၃ စဵုကဵုသၞာံ ၂၀၂၅ ဂိတုမာတ် ၁၆ ဂှ်မ္ဂး ဂကောံပၞာန်တံ ဗ္တိုက်ကၠုၚ်ပၞာန်ကျာ ဒၞါဲညးဍုၚ်ကွာန်ကောန်အရာပ်တံ မံၚ်တန်တဴဒၟံၚ်ဂှ် ၂၁၉၀ ဝါတုဲ ကောန်ၚာ်သၟတ် ၃၇၂ တၠ ဒးဆောံလေၚ်အာလဝ်လမျီုရ။
ဣဏံဝွံ ဖံက်ပ္ကဝ်ဒၟံၚ်သၞောဝ်ဗ္စာရဏာမၞိဟ်ဍုၚ်နာနာသၟးဟွံက သီုကဵုဒှ်အာ ညံၚ်ရဴဝးပ္ကဝ်ကၠေံ လိက်ကသုက်ဂျဳနဳဗာ စပ်ကဵုအခေါၚ်အရာကောန်ၚာ်သၟတ် မဒုၚ်လဝ်လျိုၚ်ကဵု အခေါၚ်ကောန်ၚာ်သၟတ်ဂမၠိုၚ် ဂွံဂျိုၚ်လမျီု၊ အခေါၚ်ဂွံဖောအ်ဗြေဝ်တောတက်၊ အခေါၚ်ဂွံပါလုပ် ကေုာံ အခေါၚ်ဂွံဒုၚ်ပရေၚ်မၚ်မွဲစဵုဒၞါတံဂှ်ဏောၚ်ဂှ် သ္ဂးရ။
သွက်ဂွံစဵုဒၞါမၚ်မွဲ ညးဍုၚ်ကွာန်ဍုၚ်ဗၟာ ကေုာံ သွက်ဂွံထိၚ်ဒဝ် သ္ဇိုၚ်မူစပ်ကဵုပရေၚ်ဗ္စာရဏာမၞိဟ်ဍုၚ်နာနာတံဂှ် နွံပၟိက်ဒၟံၚ်ကဵု ဍုၚ်သ္အာၚ်တံ ဂွံခၠေဝ်ရေၚ်တၠုၚ်ကၠုၚ် မွဲဟာန်ကေုာံပရေၚ်ညဳသာသၟဟ်သၟန်တံ ဗွဲမဇၞော်ကဵုဇြဟတ်ရ။
နကဵုဂကောံအာဇြဳယာန် အခိၚ်လၟုဟ် လောန်ၜက်နူတၚ်တုပ်စိုတ် ၅ သာ်ဂှ်တုဲ သွက်ဂွံထံက်ပၚ်ရီုဗၚ်ကဵု လၟေၚ်ကမၠောန်ဗၟာတံသ္ကိုပ်သ္ကတုဲ မကိတ်ညဳကဵုဆန္ဒညးဍုၚ်ကွာန်ဍုၚ်ဗၟာတံဂှ် ပ္ဍဲကဵုညးတံ အခေါၚ်အဝဵုဂွံဖျေံစၟတ် ကမၠောန်ပိုတ်သ္ကုတ်တံ နွံဒၟံၚ်ရောၚ် NUG သ္ဂးရ။
အခါလၟုဟ်ဂှ် ဒှ်အခိၚ်မ္ဒးရေၚ်တၠုၚ် ကမၠောန်မကလေၚ်ထ္မံက်ကဵုရုပ်ရဴ ပရေၚ်ဗဗွဲဓဝ် သွက်စၟအ်ကောန်ဍုၚ်ဗၟာ၊ သွက်ပရေၚ်ၜိုဟ်လလမ် ကေုာံ သွက်ဂုန်သိက္ခာညးတံ ပိုတ်တ်သ္ကုတ်တ်ဏောၚ်ဂှ် ဖ္တိုက်ဖ္အောဝ်လဝ် အာဇြဳယာန်ရ။
ပရိုၚ်−သြၚ်လောန်တိုၚ်(မ်)
ဗီု−NUG