နေဗျဳဒဝ်၊ မေ ၂
ကံၚ်ဇြဳပၞာန်သီကေတ်လဝ်အဝဵုကၟိန်ဍုၚ်ဂှ် အပ္ဍဲဂိတုဒဳဇြေမ်ဗာကၠုၚ်စိုပ်ဏံ သွက်ဂွံကၠောန်ဗဒှ်ပေါဲရုဲမာဲဒဳမဝ်ကရေဇြဳဗော်ဇဳမာန်ဂှ် စဳဇန်ဒၟံၚ်တုဲ ကလေၚ်သီကေတ်အာ ဍုၚ်မဒးဗလးလဝ်တဲတံဏောၚ်ဂှ် ဟီုကြီုဒၟံၚ်ရ။
အပ္ဍဲဂိတုဒဳဇြေမ်ဗာကၠုၚ်စိုပ်ဏံ ညံၚ်ဂွံကၠောန်ဗဒှ်ပေါဲရုဲမာဲ ဗၠးၜးဗဗွဲဓဝ်မွဲမာန်ဂှ် ဖန်ဇန်ရေၚ်တၠုၚ်ဒၟံၚ်ရောၚ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုစုတ်လဝ် ပ္ဍဲကောံဓရီုတၟေၚ် ဂကောံညးယိုက်လျိုၚ်ပၞာန်တြေံ ဍုၚ်ဗမာ ပ္ဍဲဂိတုဨပရဴ ၃၀ တေံရ။
မွဲလ္ပာ်ဂှ်ပၠန် ပ္ဍဲဂိတုဨပရဴ ၂၇ တေံ သ္ကိုပ်ကောပ်ကာဲပ္ညဳပ္ညပ် ဒပ်တိုက်၊ ဒပ်ဍာ်၊ ဒပ်ကျာ သ္ကိုပ်ဗိုလ်ဇၞော်ကျဝ်ဇြဲလေန်ဂှ် ဟီုဏာလဝ် ပ္ဍဲကောံဓရီုစပ်ကဵုပရေၚ်ပၞာန် ဒဒှ်ရမွဲတ္ၚဲ ကလေၚ်သီထ္ၜးအာ ဍုၚ်မ္ဒးဗလးလဝ်တဲဂမၠိုၚ် မွဲဍုၚ်ဟွံကဵုသှ်ေ မဒှ်ရ။
ဆ္ဂး နဗီုပြၚ်သာ်လဵု ဖျေံစၟတ်လဝ်ဒဵုအခိၚ်လဵုတုဲ ကလေၚ်သီကေတ်အာဏောၚ်ဟီုဂှ် ဟွံဟီုဏာလဝ်ပုဟ်ဂှ် နိဿဲကေတ် ဂလာန်တမ်ရိုဟ်ပရိုၚ်နေဗျဳဒဝ်တုဲ ဌာန်ပရိုၚ် DVB ထ္မံက်ထ္ၜးလဝ်ရ။
ညးခါတ်အကာဲပရေၚ်ပၞာန်ဂမၠိုၚ်ဂှ်တှ်ေ ဒဒှ်မဟီုကၠုၚ် သီထ္ၜးအာဍုၚ်သီုဖအိုတ်ဏောၚ်ဟီုဂှ်ဝွံ လ္တူနူကဵုအစဳဇန်ပရေၚ်ပရေၚ်ပၞာန် ထ္မံက်ရုပ်ရဴမာန်ဂှ် ဒှ်သဘဴဝေၚ်စိုတ်ဓာတ်ဏောၚ်တုဲ ဟီုဒၟံၚ် ညံၚ်က္ဍိုပ်သ္ကိုပ်ပၞာန် ဂွံဒးဂၞပ်ဏောၚ်ဂှ် ပါ်ပါဲလဝ်ရ။
ဗိုလ်ဇၞော် ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ ပ္ဍဲကဵုပွိုၚ်ဍုၚ်လ္ၚဵု နူရးသက်ကိုၚ်၊ ရးမဂွဵု ကေုာံ ရးမာန္တလေဝ်တံဂှ် နဒဒှ်ပၞာန်ဗ္တိုက်ထ္ၜးစဂှ် သၠုၚ်ပ္တိုန်အသိၚ် ကၠောန်ကၠုၚ်မာန်ရောၚ် သ္ၚဳဂၠိပ်လဝ်ရ။
“ ကံၚ်ဇြဳပၞာန် ဟီုသာ်ဏံတုဲတှ်ေ သၠုၚ်ပ္တိုန်အသိၚ်ပၞာန်တိုက် မထ္ၜးစညိညဂှ် ကၠောန်ကၠုၚ်ဏောၚ်။ ဗွဲတၟေၚ် ပ္ဍဲရးသက်ကိုၚ် ဒှ်မာန်ဏောၚ်။ လ္ပာ်(သပိတ်ကျင်း၊ မတ္တရာ၊ စဥ◌့်ကူး) ပ္ဍဲရးမာန္တလေဝ်ဂှ် ဂွံထ္ပက်ကၠုၚ်ပၞာန်ဗလးတိဂှ် ဒှ်မာန်ဂၠိုၚ်အိုတ်ရောၚ် ချိၚ်ကေတ်ရ။ လ္ပာ်ရးသေံသၠုၚ်ကျာ၊ ကရေၚ်ဍာဲ၊ တိဍာ်မဆက်စပ်ဂမၠိုၚ်တံဂှ်တှ်ေ ၜိုတ်စမ်ၜတ်တုဲ ဆက်ကၠောန်ကၠုၚ်မာန်ရ။ ညံၚ်ဆက်အာဂတဟွံဂွံ ထိၚ်ဒက်တတုဲ ၜိုတ်ပၞာန်ဒုၚ်ရ နွံဏောၚ်” သာ်ဝွံ သ္ဂးရ။
အတိုၚ်တၚ်နၚ် BNI-Myanmar Peace Monitor ဂှ်မ္ဂး အပ္ဍဲမသီလဝ်အဝဵု ပွိုၚ်ပန်သၞာံဏံ ဂကောံပၠန်ဂတး ကေုာံ ဂကောံရပ်လွဟ်ကောန်ဍုၚ်အရၚ်တံ သီဂွံလဝ် ၉၇ ဍုၚ်ရ။
ပ္ဍဲကဵုဍုၚ် ကံၚ်ဇြဳပၞာန် ဒးဗလးလဝ်တဲဂမၠိုၚ် ပ္ဍဲကဵုရးသေံသၟဝ်ကျာ ကေုာံ ပ္ဍဲရးရခေၚ် မဒးဆောံလေၚ်လဝ် ဌာန်ဂအုပ်ပၞာန်ရးၜါဂှ် ဒးဆောံလေၚ်လဝ် တိဍာ်အုပ်ဓလီု ဗွဲမဂၠိုၚ်ဂၠေၚ်ရ။ ဆ္ဂး ဟိုတ်နူအလဵုအသဳကြုက် ကရေပ်ဓရတ်ကၠုၚ်တုဲ ပ္ဍဲဂိတုဨပရဴ ၂၁ တုဲကၠုၚ်တေံ ကံၚ်ဇြဳပၞာန် ကလေၚ်ဂွံလဝ် ဍုၚ်လာယှိုဝ် ဒပ်ကဝ်က MNDAA မထိၚ်ဒက်ဂွံလဝ်ဂှ်ရ။
ပ္ဍဲအကာဲအရာသာ်ဏံဂှ် စဵုကဵုအခိၚ်ဟွံဂွံကၠောန်ပေါဲရုဲမာဲဏီ မဒှ်ပၞော်တိတ်ပရေၚ်ဍုၚ်ကွာန် သွက်ကံၚ်ဇြဳပၞာန်ဂှ် သွက်ဂွံကလေၚ်ကေတ်ဍုၚ် ၉၀ ဍုၚ် မဒးဗလးလဝ်တဲဂှ် ယဝ်ဝေၚ်အာပၞာန်မ္ဂး ဂွံအခိၚ် ၜိုတ် ၇ ဂိတုရဏောၚ် မဒှ်ရ။
ဟွံသေၚ်မ္ဂး နူကဵုအလဵုအသဳကြုက်မွဲကဆံၚ် ကဵုဓရတ်ကၠုၚ် ကောန်ဂကောံမဟာမိတ်ကောဒေံ TNLA ကဵု AA တံ ညံၚ်ဍုၚ်လာယှိုဝ်ဂှ်တုဲ ပ္ညဳပ္ညပ် နကဵုပရေၚ်ဒေါအ်ပန်ပှော်တုဲ သွက်ဂွံကလေၚ်ကေတ် ဍုၚ်ဒးဗလးလဝ်တဲတံဂှ် ကံၚ်ဇြဳပၞာန် ပ္တိတ်ကၠုၚ်ဇြဟတ်မာန်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ် သ္ၚဳဂၠိပ်လဝ်ဂှ်တှ်ေ ညံၚ်ရဴလၟေၚ်ဒဒှ်လာယှိုဝ်ဂှ် ပ္ဍဲ TNLA, AA တံ ဂွံဒှ်ကၠုၚ်တိုက်ရိုက်ဂှ် ဒှ်ဟွံမာန်ပုဟ်ဂှ် ဟီုရ။
“ ဗီုပြၚ် MNDAA ဂှ် ဂွံဒှ်ကၠုၚ် လ္ပာ် TNLA, AA တံဂှ် ဒှ်ဟွံမာန်ပုဟ်။ အကာဲအရာ ဂွံဒှ်ကၠုၚ်တိုက်ရိုက် ဟွံမွဲပုဟ်ဂှ် မ္ဒးသ္ၚဳဂၠိပ်ကေတ်ရ။ ဟိုတ်ဂှ်ရ ကံၚ်ဇြဳပၞာန်ဝွံ ဒၞါဲ TNLA, AA တံ ပံက်လဝ်မုက်ပၞာန်ဂှ် နကဵုပရေၚ်ပၞာန်ဂှ် နူကဵုပၞာန်ကျာကီု နူကဵုကရောၚ်ပၞာန်ဗလးတိကီုဂှ် သုၚ်စောဲကၠုၚ်ဂှ် ဂွံဆဵုကေတ်ရ” သာ်ဝွံ သ္ဂးရ။
နူသီအဝဵုတုဲဂှ် ကံၚ်ဇြဳပၞာန် မဟီုကြီုလဝ် ကၠောန်ဗဒှ်အာပေါဲရုဲမာဲဏောၚ်ဂှ် သၞာံဏံ နူဂိတုဒဳဇြေမ်ဗာ သတ္တာဟတတိယ စဵုကဵုယးသၞာံ ဂိတုဂျာန္နဝါရဳ သတ္တာဟဒုတိယ အပ္ဍဲပွိုၚ်မွဲဂိတုဂှ် ရန်လဝ် သွက်ဂွံကၠောန်ဗဒှ်ပေါဲရုဲမာဲရ။
ဟိုတ်ဂှ်ရ ဂိတုမေ ၉ စွံလက္ကရဴအိုတ်တုဲ သွက်ဂွံအာတ်ပ္တိုန်လဝ် ကမၠောန်ဒက်ပ္တန်ဗော်ပရေၚ်ဍုၚ်ကွာန် ကေုာံ ကမၠောန်အာတ်ပ္တိုန်စရၚ်တံဂှ် လ္ပာ်ကမ္မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန် မခါန်ကၞက်ပ္တိုန်လဝ်ဂှ် လလောၚ်ပ္တိတ်လဝ်ပရိုၚ်ရ။
မွဲလ္ပာ်ဂှ်ပၠန် ပေါဲဗ္တိုက်ပၠန်ဂတးသၞောတ်တၠအဝဵုပၞာန် အလုံဍုၚ်မွဲဂှ်လေဝ် ဆက်နွံဒၟံၚ်တုဲ ဟိုတ်နူအကာဲအရာပရေၚ်ဂီုကၠီုတုဲ တန်တဴကဵုဒေသတိဍာ်တုဲ ကံၚ်ဇြဳပၞာန် ကၠောန်အာပေါဲရုဲမာဲ မွဲဒကုတ်တုဲမွဲဒကုတ်မာန်ဏောၚ် မဒှ်ရ။
ဒံက်တာသဳရိမန်ဆာန် ဥက္ကဌ ကမ္မတဳက္ဍိုက်ပ်ပရေၚ်ဍုၚ်ကွာန် ပရေၚ်ပၞာန် ဒပ်စဵုဒၞါညးဍုၚ်ကွာန်မန် MSDF ဂှ် ဟိုတ်နူအကာဲအရာပရေၚ်ပၞာန်တုဲ ဒေသဂကောံပၠန်ဂတးတံ ချဳဒရာၚ်ဂှ်ကီု သီုကဵုဍုၚ်မဒးဗလးလဝ်တဲတံဂှ် ကံၚ်ဇြဳပၞာန် ဂွံကလေၚ်ကေတ်ဂှ် ဝါတ်ဂါတ်ညိဏောၚ် သ္ၚဳဂၠိပ်လဝ်ရ။
“ အတိုၚ်အကာဲအရာပၞာန်လၟုဟ်မ္ဂး တော်ဆကဵုဇြဟတ်ပရေၚ်ပၞာန် ဂကောံဇြဟတ်ပၠန်ဂတးသီုဖအိုတ် ပါလုပ်သီုကဵု EAO တံကဵု ဇြဟတ်ပရေၚ်ပၞာန်ကံၚ်ဇြဳပၞာန်တံဂှ်တုဲ ဒးသ္ၚဳဂၠိပ်မ္ဂး သွက်ဂွံကလေၚ်သီကေတ် ဍုၚ်ကံၚ်ဇြဳပၞာန် မ္ဒးဗလးလဝ်တဲတံဂှ် ဝါတ်ဂါတ်တၟာဂလိုၚ်ဏောၚ်။ အလုံဍုၚ်မွဲ နကဵုအကာဲအရာပရေၚ်ဍုၚ်ကွာန် ပရေၚ်ပၞာန်လၟုဟ်ဂှ် ဂကောံဇြဟတ်ပၠန်ဂတးသီုဖအိုတ် ပါလုပ်သီုကဵု EAO တံ ဟွံကေတ်တၚ်တုပ်စိုတ် ဒေါအ်ပန်ပှော် ကုကံၚ်ဇြဳပၞာန်တုဲ ယဝ်ဗ္တိုက်ဒၟံၚ်မွဲအခိၚ်ဓဝ်မ္ဂး ပ္ဍဲတွဵုရးဍုၚ်မန်ဂှ် ဒၞါဲဗ္ဒိုပ်ဒပ် ဒၞါဲဒပ်ပၠန်ဂတးတံ ချဳဒရာၚ်တံဂှ် ဗ္တိုက်အာမာန်ဟွံသေၚ်ပုဟ်” သာ်ဝွံ သ္ဂးရ။
အတိုၚ်တၚ်နၚ် ဂကောံသုတေသန ဗၠးၜးတံဂှ်မ္ဂး အလုံဍုၚ်မွဲ ပ္ဍဲကဵုပွိုၚ်ဍုၚ် နွံ ၃၃၀ ဂှ် ပ္ဍဲ ၂၄၀ ပွိုၚ်ဍုၚ်ဂှ် ပေါဲဗ္တိုက်နွံဒၟံၚ်ဂှ်ရ လၟိဟ်လၟေၚ်ဒဒှ်ပဋိပက္ခပရေၚ်ပၞာန် ဟွံမွဲဏီတံဂှ်ဝွံ သှ်ေဒၟံၚ် ၜိုတ် ၉၀ ဍုၚ်ဓဝ်ရ။
နကဵုကံၚ်ဇြဳပၞာန် ကၠောန်ဗဒှ်ပေါဲရုဲမာဲတုဲမှဟေၚ် ကလိဂွံအာအကာဲအရာ ဂွံပၞော်တိတ်ဏောၚ်ဂှ်ရ အတိုၚ်စဳဇန်လဝ် ယဝ်ဟွံဒှ်ကၠုၚ်မ္ဂးလေဝ် ပပဵုပ္တိုန်ကၠုၚ်အာယုက် ကာလကာတၟေၚ် ၆ ဂိတုဂှ် ဂၠိုၚ်ၚ်ကဵုဝါတုဲ ပ္တိတ်အာဇြဟတ် သွက်ဂွံကၠောန်ဗဒှ်ပေါဲရုဲမာဲမာန်ဏောၚ်ဂှ် ညးလ္ၚတ်ဂမၠိုၚ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− SAC