ၜဳကလေၚ်၊ အံက်တဝ်ဗာ (၄)
ပ္ဍဲပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် စနူတ္ၚဲအကြာတံဏံတုဲ ညးထံက်ဂလာန်ဗော် NLD တံ မပါလုပ် သီုကဵု ညးဒေသကောန်အရာပ်တံ ဒးဒုၚ်ရပ်ဒၟံၚ်အဆက်က်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် အပ္ဍဲဂိတုအံက်တဝ်ဗာ (၂) တေံ ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာ ညးထံက်ဂလာန်ဗော် NLD နူကွာန် (ဇုတ်သုတ်) ၊ ပွိုၚ်ဍုၚ်ၜဳကလေၚ် ဥူဟုၚ်ဇြဝ်လာတ် ကဵု ဥူပွေတ်ဥူတံ (၂) တၠ ပ္ဍဲသ္ၚိဒၟံၚ်ညးတံရ။
ဒပ်ကံၚ်ဇြဳပၞာန်ဂှ် နကဵုတၚ်စောတ်စောဲ ညးတံၜါတၠ ထံက်ပၚ်ကဵုဒၟံၚ်သြန် ဇရေၚ်ဂကောံဒပ်စဵုဒၞါညးဍုၚ်ကွာန် PDF တံဂးတုဲ ကၠုၚ်စိုပ်ရပ်ဒက်လဝ်ရ။
တုဲကၠုၚ် ပ္ဍဲဂိတုသေပ်တေမ်ဗာ သတ္တာဟလက္ကရဴအိုတ်ဂှ်လေဝ် ဒပ်ကံၚ်ဇြဳပၞာန် ရပ်ဒက်ဏာလဝ် မ္ၚးနူဥူမျဵုဝေန် ညးထံက်ဂလာန်ဗော် NLD မမံၚ်ဒၟံၚ် ပ္ဍဲကွာန်ဇြေန်သု၊ ပွိုၚ်ဍုၚ်ၜဳကလေၚ်ဂှ် ကောန်ၚာ်အာယုက်ဟွံပေၚ်တံ မပါလုပ် သီုကဵုကောန်ဂကောံသ္ၚိကၟိန် (၄) တၠတံဂှ်ကီုရ။
သ္အာၚ်နူဂှ်ပၠန် မံၚ်အံၚ်ဇြေန်ဖျဵု ကေုာံ မဝသုန်သဵု (ခ) မအေသန္တာသဵု ကောဒေံညးၜါတၠ နူကွာန်အာလူကျဳ၊ ပွိုၚ်ဍုၚ်ၜဳကလေၚ် မကၠုၚ်ကၠောန်တၞးကာဒ်ကောန်ဍုၚ် ပ္ဍဲရုၚ်လဝက ပွိုၚ်ဍုၚ်ၜဳကလေၚ်ဂှ်လေဝ် ဒပ်ကံၚ်ဇြဳပၞာန် ရပ်ဒက်လဝ်ရ။
ကုညးမရပ်ဒက်လဝ်တံဂှ် ဒပ်ကံၚ်ဇြဳပၞာန် ရပ်ထိၚ်လဝ် ဒၞါဲလဵုရောဟီုဂှ် ဟွံဂွံတီကေတ်ဏီတုဲ ကုကောန်ဂကောံသ္ၚိကၟိန်တံလေဝ် ဟွံဂွံအဆက်ဏီပုဟ်ဂှ် ညးဒေသတံ သ္ဂးရ။
ဟိုတ်နူ ဗ္ဒိုပ်ဒပ်ကံၚ်ဇြဳပၞာန် မၞုံအပ္ဍဲပွိုၚ်ဍုၚ်ၜဳကလေၚ်တံ၊ ရုၚ် နူဌာနမဆေၚ်စပ် သၟဝ်တဲကံၚ်ဇြဳပၞာန်တံ၊ ဂကောံပျူသဝ်ထဳတံ ကေုာံ ညးကဵုပရိုၚ်ကေတ်မုက်တံ ဒးဒုၚ်ပသောၚ်ပန်ပှော်ဒၟံၚ် မွဲဏှမွဲဏှဂှ်ရ ကံၚ်ဇြဳပၞာန်တံ ကၠောန်သ္ပရပ်ဒက်ကၠုၚ် ညးမဒှ်သံသယတံ အဆက်က်ရ။
ပရိုၚ်−သြၚ်လောန်တိုၚ်(မ်)