သဵု(လ်) ၊ မေ ၂၇
ကြဴနူဒးဂဗကဵုပြဒ္ဒညာပရေၚ်ဍုၚ်ကွာန်တုဲ ကၠာဟွံဂွံကၠောန်ပေါဲရုဲမာဲအကြာ ပ္ဍဲဂိတုဂျောန် စၟတ်တ္ၚဲ ၃ ဏံဂှ် ကိစ္စသဳကၠဳကယျာန်ဓဝါန်ဒၟံၚ် သွက်ဂွံကလေၚ်ပလေဝ် အဝဵုအာဏာသမ္မတ ဗွဲမဗဗွဲကဵုသၞောဝ်သ္ဇိုၚ်ဂှ် ဗော်ကိုဝ်ရဳယျာသၠုၚ်ကျာ သီုၜါဗော် အာတ်မိက်လဝ်ရ။
အပ္ဍဲဂိတုဒဳဇြေမ်ဗာ သၞာံတုဲကၠုၚ်တေံ သမ္မတတြေံ ယောန်သက်ယော လလောၚ်တြးကၠုၚ်လဝ် သၞောဝ်အုပ်ဓုပ်ပၞာန် ဟွံထေၚ်လဝ်မွဲသာ်ဂှ်တုဲ စပ်ကဵုပရေၚ်ဏံတုဲ စောဲစပ်ပ္တိုန်ဒုဟ်ကုညးတုဲ နုက်ပတိတ်လဝ်နူကဆံၚ်ဒၞါဲညးတုဲဂှ် ကော်ကေတ်လဝ်ပေါဲရုဲမာဲရ။
အလံၚ်ညးစၞးဗော်အဓိကဂမၠိုၚ်ဂှ်တှ်ေ ပ္တိတ်အာဇြဟတ် သ္ဂောံပလေဝ်သၞောဝ်သ္ဇိုၚ်ဒက်ပ္တန်ဂှ်ဏောၚ် ဟီုကြီုလဝ်ရ။
အကာဲအရာပရေၚ်ပလေဝ်သၞောဝ်သ္ဇိုၚ် ဂွံအံၚ်ဇၞးဂှ်ဝွံ တၟံကၠံဂၠိုၚ်နူကၠာတေံဏောၚ်ဂှ် ပါမောက္ခ ချေဂျေန်ဝါန် နူအေန်သတဳကျုတ် ပရေၚ်အုပ်ဓုပ်ညးဍုၚ်ကွာန် တက္ကသိုလ်ခေါန်ဟဳ ဟီုရ။
သွက်ဂွံကၠောန်ဗဒှ်ပေါဲရုဲမာဲသမ္မတတိုက်ရိုက် ကေုာံ သွက်ဂွံယိုက်ဂၠေၚ်တာလျိုၚ် မွဲဝါဓဝ် ပွိုၚ် ၅ သၞာံဂှ် သၞာံ ၁၉၈၇ တေံ ပလေဝ်လဝ် သၞောဝ်သ္ဇိုၚ် အလန်လက္ကရဴအိုတ်ရ။
သဳကၠဳကၠုၚ်လဝ် ပရေၚ်ပြံၚ်လှာဲတအ်ဏံ လအ်ကွေံယျကီုလေဝ် မွဲလှ်ေမှ ဟွံဂွံထ္မံက်လဝ်ရုပ်ရဴရ။
လဳဂျေမျံၚ် မဒှ်နူဗော် လေဝ်ဗရဴဒဳမဝ်ကရေတ်တေတ် ဂြိပ်ဒၟံၚ်ဂတ ပ္ဍဲပေါဲရုဲမာဲဂှ် သွက်သမ္မတ မစကေတ်အာတာလျိုၚ် ပ္ဍဲသၞာံ ၂၀၃၀ တအ်ဂှ် သွက်ဂွံယိုက်ဂၠေၚ်တာလျိုၚ် ပွိုၚ်ပန်သၞာံ ၜါဝါ၊ သွက်ဂွံဒ္ဂေတ်လ္ၚတ်အာ သၞောတ်ကၠောန်ဗဒှ်ပေါဲရုဲမာဲသမ္မတ ၜါအလန် ကေုာံ နူကၠတ်ထဝ် သွက်ဂွံပၠောပ်ပ္တိုန်စရၚ်ယၟုသ္ကိုပ်ဝန်ဇၞော်ဂှ် ပ္တိုန်လဝ်စရၚ်ရ။
ညံၚ်ပရေၚ်ဒုၚ်လျိုၚ်နူသမ္မတ ဇြဟတ်ဂွံခိုဟ်ကၠုၚ်ဂှ် ဒးကၠောန်ဏောၚ်တုဲ အဝဵုအခေါၚ်ကၠောန်တအ်ဂှ်တှ်ေ ညံၚ်ဗဟဵုထိၚ်ဒက်ဟွံဂွံ ဒးကၠောန်ဏောၚ်ဂှ် ပ္ဍဲဂိတုမေ ၁၈ တေံ ညးဟီုလဝ်ရ။
ကေန်မန်သူ မပ္တိုန်လဝ်စရၚ်ယၟု သွက်ပေါဲရုဲမာဲသမ္မတ နူကဵုဗော်ဂွံအဝဵုညးဍုၚ်ကွာန် ကောန်သာဗေတေဗ်ဂှ်လေဝ် သွက်သမ္မတအနာဂတ်ဂတဏံဂမၠိုၚ် ဂွံယိုက်ဂၠေၚ်တာလျိုၚ် ၄ သၞာံ ၜါဝါ၊ ဂွံကၠောန်ပရေၚ်အပြံၚ်အလှာဲတံဂှ် ပ္တိုန်လဝ်ဂလာန်ရ။
ကေန်မန်သူဂှ်တှ်ေ ယဝ်ညး ဂွံဇၞးကေတ်ပေါဲရုဲမာဲမ္ဂး ဖအောန်ဖျေံအာ အာယုက်ကဆံၚ်ဒၞါဲညး စဵုကဵု ၃ သၞာံဏောၚ်ဂှ် ဟီုလဝ်ရ။
Ref: Reuters