တိုဝ်ကျိုဝ်၊ မေ ၂၅
ညံၚ်ဟွံဂွံပြံၚ်သုၚ်စောဲ တဆိပ်ဍုၚ်သ္အာၚ် ၚုဟ်တန်တံဂှ်တုဲ သ္ၚုအလဵုအသဳမဂိုၚ်စွံလဝ်တံဂှ် ပလံၚ်ဗစိုပ်ဇရေၚ်ဆေၚ်ဖျာ ဗွဲမပြဟ်တုဲ ဖအောန်ၚုဟ်တုဲသွံတြးကဵုအာဏောၚ် ပ္ဍဲဂိတုမေ ၂၃ တေံ ဝန်ဇၞော်ပရေၚ်တဵုလွဳတၟိဂျပါန် ကဵုလဝ်ကတိရ။
ဟိုတ်နူဒှ်အခိၚ်က္တဴလောန်ကီု သီုကဵုကောန်ဍုၚ်သ္အာၚ် လုပ်စိုပ်ဂၠိုၚ်ကၠုၚ်ဂှ်တုဲ ဇြဟတ်ရာန်သ္ၚု သၠုၚ်တိုန်ကၠုၚ်ဂှ်ရ ပ္ဍဲဍုၚ်ဂျပါန် ၚုဟ်သ္ၚု သၠုၚ်တိုန်ကၠုၚ်လဝ်ကဵုဆရ။
ဟိုတ်နူၚုဟ်သ္ၚုသၠုၚ်တိုန်ကၠုၚ်သာ်ဏံတုဲ မ္ၚးနူကဵုညးမစသုၚ်တံဂှ် ပ္ဍဲဂိတုဂျူလာၚ်ကၠုၚ်စိုပ်ဏံ အလဵုအသဳသ္ဂောံကၠောန်အာပေါဲရုဲမာဲ ကၠတ်ထတ်လ္တူ နွံဂှ်လေဝ် ဒှ်ဒၟံၚ်ဓဝိၚ်ကီုရ။
နူဂိတုမာတ်တေံရ ပ္တိတ်သွံလဝ်ကဵု သ္ၚုအလဵုအသဳမဂိုၚ်စွံလဝ်ဂှ်ကီုလေဝ် ပ္ဍဲဖျာသူပါမာကေတ်တံဂှ် ညံၚ်ၚုဟ်ဂွံကလေၚ်စှ်ေ ကၠောန်ကၠုၚ်ဟွံမာန်ရ။
အခိၚ်ၚုဟ်ဖျာ သၠုၚ်တိုန်ဒၟံၚ်ကဵုဆဂှ် ဝန်ဇၞော်ပရေၚ်တဵုလွဳတြေံဍုၚ်ဂျပါန် ဟီုကၠုၚ် ပ္ဍဲကဵုညးဟိုတ်နူသ္ၚုဂွံနၚ်ပရၚ်တဲ နွံဒၟံၚ်ဂှ်ရ ဟွံဒးရာန်သ္ၚု ဟီုကၠုၚ်တုဲဂှ် နုက်တိတ်အာလဝ် နူကဵုဒၞါဲကဆံၚ်ညးရ။
ညးမဒှ်ကၠုၚ်ဝန်ဇၞော်ပရေၚ်တဵုလွဳတၟိ ယှေန်ဂျဳရိုဝ် ကိုဝ်အဳသုမိဂှ် ဆေၚ်ဖျာသူပါမာကေတ်ဂျပါန်တံဝွံ အတိုၚ်တီမံၚ် ဒးကဵုအခေါန်ဖလှာဂၠိုၚ်ဂှ် ရာန်ကေတ်ဒၟံၚ်သ္ၚု ဇရေၚ်အမေရိကာန်တိုက်ရိုက်ဂှ်ဝွံ ဒှ်ကိစ္စဓမ္မတာဟွံသေၚ်ပုဟ်ဂှ် ဟီုလဝ်ကဵု ပရိုၚ်မဳဒဳယျာဂမၠိုၚ်ရ။
ညံၚ်အကာဲအရာတအ်ဏံ ဂွံပြေပြံၚ်အာဂှ် ညးတအ် ဒးကၠောန်ဏောၚ်ဂှ်လေဝ် ဝန်ဇၞော်ဂှ် ဟီုရ။
ဂျပါန်ဝွံ ဟိုတ်ဒၟါနူဝၚ်အတိက်တုဲ ဂွံပၠောပ်ပ္တိုန်သ္ၚု နူဍုၚ်သ္အာၚ်ဂှ် ဒးချိၚ်ဆဒၟံၚ်တုဲ အပ္ဍဲဍုၚ် ညံၚ်ဂွံရုမ်ဂပ်ဂှ် ကၠောန်ပ္တိတ်တုဲ သၟာဗ္ၚဂမၠိုၚ် ညံၚ်ဟွံဂွံပြိုၚ်ပ္ကာန်ညးသ္ကအ်ဂှ် ကံက်ဂလိုၚ်ပ္တိုန်အခေါန်ဖလှာတုဲ စဵုဒၞါလဝ်ရ။
ညးမဒှ်ကောန် သ္ကိုပ်ဝန်ဇၞော်တြေံ ဂျူနဳယှဳရိုဝ် ကိုဝ်အိသုမိ ဝန်ဇၞော်ပရေၚ်တဵုလွဳ ယှေန်ဂျဳရိုဝ် ကိုဝ်အိသုမိဂှ် သ္ၚုအလဵုအသဳဂိုၚ်စွံလဝ်တံဂှ် ဂိတုဂျောန်ဏံ ပပြဟ်အိုတ်တုဲ သွက်ဂွံသွံတြးကဵု ၅ ကဳလော နကဵုၚုဟ် ၂၁ ဒဝ်ဠာ (၃၀၀၀ ယာန်) ဂှ် ကၠောန်ကဵုဏောၚ် ကဵုလဝ်ကတိရ။
အပ္ဍဲပွိုၚ် ၇ တ္ၚဲ တုဲဒှ်အာ ပ္ဍဲဂိတုမေ ၁၁ ဂှ် ၚုဟ်သ္ၚုဂှ်ဝွံ ဒးရာန်ဒၟံၚ် ၅ ကဳလော စဵုကဵု ၄၂၆၈ ယာန်ရ။
Ref: Reuters