ဝါယှေန်တာန်၊ ဂျောန် ၇
အကြာသေဌဳဇၞော် တၠဗဳလျာန် အဳလောန်မက်ကဵု သမ္မတအမေရိကာန် ဒဝ်နေဝ်ထြာမ် ပရေၚ်ကြံၚ်မ္ၚိုဟ် ဒှ်ဒၟံၚ်ညးသ္ကအ်ဂှ် ညးဓလိုက်တမ်ရိုဟ်ဂမၠိုၚ် ပ္ဍဲဂိတုဂျောန် ၅ တေံ သွံပ္တိတ်လဝ် ယှေဝ်ယျာကမ္ပဏဳ Tesla ရ။
ၚုဟ်ယှေဝ်ယျာ ကမ္ပဏဳကွဳစက်ဓာတ်လလဳ အဳလောန်မက် မပိုၚ်ပြဳလဝ်ဂှ် ထ္ပက်စှ်ေအာ စဵုကဵု ၁၄ တၟံကၠံတုဲ အပ္ဍဲပွိုၚ်ဂိတုမဂၠိုၚ်ဂှ် နဒဒှ်တ္ၚဲပရေံအိုတ်မွဲ ၚုဟ်မးဗွဝ်ဖျာ ဒးဆောံလေၚ်အာ ၜိုတ် ၁၅၀ ဗဳလျာန် ဒဝ်ဠာအမေရိကာန်ရ။
သွက်ဂွံတာဒၞါ ကုညးမညာတ်ကေတ်လဝ်နဒဒှ်သၞဂှ်တုဲ သ္ၚိဗု မကေမ်ၛာပ်လဝ်အဝဵုအလဵုအသဳဂှ်ကဵု ညး ယဝ်ထ္ကးပြးအာမ္ဂး သွက်အဳလောန်မက် အန္တရာယ်သာ်လဵုနွံကၠုၚ်ရောဟီုဂှ် ပရေၚ်ဆောံလေၚ်သာ်ဏံ ထ္မံက်ထ္ၜးဒၟံၚ်ရ။
အခိၚ်ပရေၚ်ကယျာန်ဓဝါတ် မံက်တိတ်ကၠုၚ်ဂှ် မ္ၚးနူကမၠောန်ယာန်ကမ်လှောဝ် SpaceX မချုက်လဝ်လိက်ကသုက် ကုအလဵုအသဳ ၚုဟ်မးမၞုံဗဳလျာန်ဒဝ်ဠာ မဂၠိုၚ်ဂၠေၚ်ဂှ် သီုကဵုလိက်ကသုက် မချူက်လဝ် အကြာကမ္ပဏဳအဳလောန်မက်ကဵု အလဵုအသဳဂှ်လေဝ် ရုပ်သီအာဏောၚ်ဂှ် ထြာမ် ဘပဠလဝ်ရ။
နဒဒှ်ကလေၚ်ခၠေဝ်ပလန် ပရေၚ်ဘပဠဏံဂှ်တုဲ ဆက်တုဲကၠောန်စမ်အာညိဂှ် အဳလောန်မက် ဟီုလဝ်ဂှ် ဂွံဆဵုကေတ်ရ။
နူကဵုပရေၚ်ဗလးပ္တိတ်တိုက်ရိုက် ပ္ဍဲမဳဒဳယျာပရေၚ်မၞိဟ်ဂှ် လညာတ်စပ်ကဵုမူဝါဒ ထ္ကးပြးတုဲ နူဏံမွဲကဆံၚ် အသိၚ်သၠုၚ်တိုန်ကၠုၚ် စဵုကဵုဖ္ဍိုက်ဂရိုက်ကၠုၚ် ပရေၚ်ပူဂဵုညးသ္ကအ်ရ။
အကြာညးတံၜါတၠ ဟိုတ်နူပရေၚ်ဆက်ဆောံ ဟွံပြေပြံၚ်တုဲ ညးဓလိုက်တမ်ရိုဟ်ဂမၠိုၚ် ဒှ်ဒၟံၚ်ဓဝိၚ်အိုတ်တုဲ သွံပ္တိတ်လဝ် ယှေဝ်ယျာညးတံ နွံဒၟံၚ်ပ္ဍဲကမ္ပဏဳအဳလောန်မက်ဂှ်ရ။
သၞာံတုဲကၠုၚ်တေံ အခိၚ်ဒက်လဝ်မဟာမိတ် ကုထြာမ်ဂှ် နကဵုတၚ်စၟဳ ကမ္ပဏဳအဳလောန်မက်ဝွံ ဒတုဲဖဵုဂၠိုၚ်ကၠုၚ်မာန်ဏောၚ်ဂှ်တုဲ ၚုဟ်ယှေဝ်ယျာဂမၠိုၚ် သၠုၚ်တိုန်ကၠုၚ်လဝ်ရ။
ဗွဲကြဴဏံ အဳလောန်မက် ဟွံစွံအာရီု လ္တူကမ္ပဏဳညးမွဲသာ် ဟိုတ်နူစိုတ်လုပ်စဒၟံၚ်ကဵု ကမၠောန်အလဵုအသဳဂှ်တုဲ ညးဓလိုက်လဝ်တမ်ရိုဟ်ဂမၠိုၚ် ဒှ်ဒၟံၚ်ဓဝိၚ်အိုတ်ရ။
Ref: BBC