မတ်မလီု၊ ဂျောန် ၅
နကဵုကံၚ်ဇြဳပၞာန် မဒးဗလးလဝ်တိဍာ်ဗွဲမဂၠိုၚ်ဂှ် ကၠာပေါဲရုဲမာဲဏံ သၠုၚ်ပ္တိုန်အသိၚ်ပရေၚ်ပၞာန် သွက်ပရေၚ်ဂီုကၠီုမာန်တုဲ ဂကောံဇြဟတ်ပၠန်ဂတးတံလေဝ် ထ္ပက်အာပၞာန်ဏောၚ်ဂှ်ရ ပေါဲဗ္တိုက်ဂမၠိုၚ် သာသ္ကာတ်မြဟ်ကၠုၚ်မာန်ရောၚ် ညးခါတ်အကာဲပရေၚ်ပၞာန်ဂမၠိုၚ် ဟီုရ။
ကၞောတ်သၞာံဏံ ကံၚ်ဇြဳပၞာန် လလောၚ်တြးလဝ် သွက်ဂွံကၠောန်ဗဒှ်ပေါဲရုဲမာဲကီုလေဝ် ဒးဗလးလဝ်တဲ ၉၀ ဍုၚ်ပြၚ်တုဲ ပွိုၚ်ဍုၚ်ပဋိပက္ခပရေၚ်ပၞာန် ဟွံဒှ်ဂှ်ဝွံ သှ်ေဒၟံၚ် ၜိုတ်ပိဂအုံ မွဲဂအုံဓဝ်ရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်တှ်ေ အပ္ဍဲကဵုတိဍာ် ဒပ်ဂမၠိုၚ် မကေတ်လဝ်တာလျိုၚ်ဂှ် သွက်ဂွံကၠောန်သ္ပ ပရေၚ်ပြုပြေၚ်ပၞာန်၊ ပရေၚ်ဂီုကၠီု ကေုာံ ကမၠောန်ပရေၚ်အုပ်ဓလီုတိဍာ် ဗွဲမအံၚ်ဇၞးမာန်ဂှ် ပ္ဍဲဂိတုမေ ၂၄ တုဲကၠုၚ်တေံ စၞောန်ကၠုၚ်လဝ်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ ပ္ဍဲကဵုဒေသအညာ ကေုာံ ဒေသတကအ်တအ်ဂှ် ပၞာန်ထ္ပက်နူကံၚ်ဇြဳပၞာန် နွံကၠုၚ်မာန်ဂှ်ရ ပေါဲဗ္တိုက်သ္ကာတ်မြဟ်ကၠုၚ်ဏောၚ်ဂှ် သ္ၚဳဂၠိပ်လဝ်ရ။
“ ဓမ္မတာတှ်ေ အခိၚ်ကသီု ပရေၚ်ပၞာန်ဂမၠိုၚ် ပေါဲဗ္တိုက်ဆေၚ်မုက်ဂမၠိုၚ် အောန်လေပ်။ ဆ္ဂး ပ္ဍဲကဵုဒေသအညာ မဂွဵု ပ္ဍဲကဵုဒေသတကအ်တံဂှ် ပၞာန်ထ္ပက်ကံၚ်ဇြဳပၞာန် သ္ကာတ်မြဟ်ကၠုၚ်ဏောၚ်ဂှ် ခယျကေတ်ရ။ အလဵုဍေံတံလေဝ် စနူဂိတုသေပ်တေမ်ဗာတုဲ သၠုၚ်ပ္တိုန်အာပၞာန်ထ္ပက် သီုပၞာန်ကျာ သီုပၞာန်ဗလးတိ ပ္ဍဲအညာမဂွဵု ရးသက်ကိုၚ်၊ ရးဨရာဝတဳတံဂှ်ဏောၚ်ဂှ် ဂွံတီကေတ်ရ။ ဟိုတ်ဂှ်ရ အညာမျေလာတ်ကဵု ဒေသတကအ် ဂၠံၚ်ကွဳစက်ဇၞော် (ပုသိမ်၊ မုံရွာ) ဂှ် သ္ပကၠေံဗဟဵုတုဲ လ္ပာ်တေံ လ္ပာ်ဏံဂှ် ပေါဲဗ္တိုက်သ္ကာတ်မြဟ်ကၠုၚ်ဏောၚ်ဂှ် ထေၚ်ကေတ်ရ” သာ်ဝွံ သ္ဂးရ။
အခိၚ်လၟုဟ်ဂှ်လေဝ် ထ္ၜးဟိုတ်ကဵုပေါဲရုဲမာဲတုဲ ဒေသညးကဵုညး နွံပၟိက်ဒၟံၚ်ကဵုပရေၚ်ညိၚ်ဝတ်ဂှ်ရ ကံၚ်ဇြဳပၞာန် ပပဵုပ္တိုန်လဝ်အာယုက်ကာလဒေါအ်ပန်ပှော် စဵုကဵုဂိတုဂျောန်ရ။ လအာတုပ်သာ်ဂှ်ကီု ဂကောံမဟာမိတ်ကောဒေံပိဂကောံဂှ်လေဝ် ဒေါအ်လဝ်ပန်ပှော် မွဲလ္ပာ်ကီုရ။
ဆ္ဂး ပ္ဍဲပွိုၚ်ဍုၚ်ကျံက်ဖျူ ကိုန်စဳမာန်ပရေၚ်ဓလိုက်တမ်ရိုဟ်ဍုၚ်သ္အာၚ်နွံဒၟံၚ်ဗွဲမဂၠိုၚ်ဂၠေၚ် ပ္ဍဲကဵုတိဍာ်အုပ်ဓလီုကံၚ်ဇြဳပၞာန် နူကဵုတွဵုရးရခေၚ်ဂှ်တှ်ေ ပေါဲဗ္တိုက်ၜါလ္ပာ် ဆက်ဒှ်ဒၟံၚ်ဖိုဟ်ရ။
မွဲလ္ပာ်ဂှ်ပၠန် အလဵုအသဳညဳသၟဟ်ဂကူ NUG လေဝ် သွက်ဂွံထပိုတ်ရိုဟ်ကၞက် သၞောတ်တၠအဝဵုပၞာန်ဂှ် ဝေၚ်အာပၞာန်ထ္ပက်နာနာဏောၚ် ဟီုပ္တိတ်လဝ်တုဲ ဒပ်ပၠတရဴကောန်ဂကူချေၚ် CNF လေဝ် အခိၚ်ကာလဗြဲဏံ သွက်ဂွံသၠုၚ်ပ္တိုန်အာအသိၚ်ပရေၚ်ပၞာန် နဗ္ၜတ်အလုံဍုၚ်မွဲဂှ် သီုညးဖအိုတ် သွက်ဂွံပံၚ်တောဲပါလုပ်ကဵုဂှ် ဖ္တိုက်ဖ္အောဝ်လဝ်ရ။
ဗော်သွးကောန်ဂကူကရေၚ် KNU နွံသ္ကုတ်သၠုၚ်ကျာဍုၚ်ဂှ်တှ်ေ ကရောံဒပ်ပံၚ်ကောံမဟာမိတ်တံဂှ် အခိၚ်လၟုဟ် ထ္ပက်ပၞာန်သီကေတ်ဒၟံၚ် ဗ္ဒိုပ်ဒပ်ပၞာန် နွံမွဲဒမြိပ်ပယျဵုသေံ−ဗၟာဂှ် မွဲတုဲမွဲရ။
ပ္ဍဲတွဵုရးဍုၚ်မန်ဂှ် ပေါဲဗ္တိုက်ၜါလ္ပာ် ဒှ်လဝ်ဗွဲသ္ကာတ်မြဟ် ဟွံမွဲဏီကီုလေဝ် ပြဟ်ဟ်ဏံ လ္ပာ်ကံၚ်ဇြဳပၞာန် သွက်ပရေၚ်ဂီုကၠီုဂှ် ပလေဝ်ပလေတ်ကၠုၚ်ဒၟံၚ် သွက်ဂွံအုပ်ဓလီုတိဍာ်ယျဂှ် ဂွံတီကေတ် ဇရေၚ်ဂကောံပၠန်ဂတးဂမၠိုၚ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ အသိၚ်ပရေၚ်ပၞာန်ဝွံ ပ္ဍဲကဵုတမ်သၞာံဏံရဂှ် ကံၚ်ဇြဳပၞာန် စထ္ပက်ကၠုၚ်ပၞာန် ပ္ဍဲရေဝ်သၟဝ်ကျာယျဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ လ္ပာ်တွဵုရးဍုၚ်မန်ပိုယ်ဏံ အခိၚ်ကသီုမ္ဂး အာကၠုၚ်ဝါတ်ဂါတ်။ ဆ္ဂး အခက်အခုဲသာ်လဵုနွံနွံ ပြေပြံၚ်မ္ဂး နကဵုဒပ်ပိုယ်တံလေဝ် ပံၚ်တောဲကဵုဒပ်တၞဟ်ဟ်တံကဵုဒှ် ဆက်တုဲဂွံလုပ်အာပေါဲဗ္တိုက်ဂှ်နွံ။ အသိၚ်ပရေၚ်ပၞာန်ဂှ်တှ်ေ အခိၚ်ဗြဲစစှ်ေဏံရဂှ် ကံၚ်ဇြဳပၞာန် စဝေၚ်ကၠုၚ်ဒၟံၚ်ပၞာန်ထ္ပက် ပ္ဍဲကဵုရေဝ်သၟဝ်ကျာဂှ်ယျ။ လညာတ်အဲတှ်ေ သၞာံဂတဏံအိုတ် ဟွံသေၚ်မ္ဂး ၜိုတ်ယးသၞာံတေံမံက်ဂှ် ဍေံတံဂွံကၠောန်အာပေါဲရုဲမာဲ ဟွံဒေါအ်ဟွံဂွံ နွံဂှ်ရ ဍေံတံဂွံအုပ်ဓလီုတိဍာ်မာန်ဂှ် စဝေၚ်ပၞာန်ထ္ပက်တုဲ ဒက်ပ္တန်ကၠုၚ်ဗ္ဒိုပ်ဖျေံသ္ဇိုၚ်ဂမၠိုၚ် သွက်ပရေၚ်ဂီုကၠီုဏောၚ်ဂှ် အဲညာတ်ကေတ်ရ” သာ်ဝွံ သ္ဂးရ။
နူစသီအဝဵုတုဲတေံရ ကံၚ်ဇြဳပၞာန် မဟီုကြီုလဝ် ကၠောန်ဗဒှ်အာပေါဲရုဲမာဲဏောၚ်ဂှ် သၞာံဏံ နူဂိတုဒဳဇြေမ်ဗာ သတ္တာဟတတိယ စဵုကဵုယးသၞာံ ဂိတုဂျာန္နဝါရဳ သတ္တာဟဒုတိယဂှ် ရန်လဝ် သွက်ဂွံကၠောန်ဗဒှ်ပေါဲရုဲမာဲရ။
ပေါဲဗ္တိုက်ပၠန်ဂတးသၞေတ်တၠအဝဵုပၞာန်ဂှ်လေဝ် နွံဒၟံၚ် အလုံဍုၚ်မွဲတုဲ အတိုၚ်အကာဲအရာပရေၚ်ဂီုကၠီုမ္ဂး တန်တဴကဵုလ္တူတိဍာ်ဒေသတုဲ ကံၚ်ဇြဳပၞာန် ကၠောန်အာပေါဲရုဲမာဲ ကဵုသ္ကုတ်ဏောၚ် မဒှ်ရ။
ညးလ္ၚတ်ဂမၠိုၚ်ဂှ်တှ်ေ နကဵုကံၚ်ဇြဳပၞာန် ဂွံလုပ်သၞောဝ် နကဵုပရေၚ်ဍုၚ်ကွာန်ဂှ် ပ္ဍဲတိဍာ်ဍဵုဍိုက်ဂွံတံဂှ် ကၠောန်ကၠုၚ်ပေါဲရုဲမာဲ နကဵုနဲကဲနာနာသာ်မာန်ဂှ်ရ ပရေၚ်ဖံက်ပ္ကဝ်အခေါၚ်အရာမၞိဟ်တအ် နွံကၠုၚ်တၟာဂလိုၚ်မာန်ရောၚ် ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CINCDS