ၜၚ်ကံက်၊ ဂျောန် ၈
စပ်ကဵုဗီုပြၚ်အလဵုအသဳ ရပ်စပ်ပရေၚ်ကြံၚ်မ္ၚိုဟ် ပယျဵုကာမ္ဗောဒဳယျာ−သေံဂှ်တုဲ အခိၚ်ညးဍုၚ်ကွာန်ဂမၠိုၚ် ပတိုန်ဒုဟ်ပါ်ပါဲ ဂၠိုၚ်ကၠုၚ်ဂှ် ပရေၚ်ဒှ်ဓဝိၚ် စပ်ကဵုဒပ်ပၞာန်သေံ သီကၠုၚ်အဝဵုမာန်ဂှ်တုဲ ဝန်ဇၞော်ကာစဵုဒၞါသေံ ဖောန်တာန် ဝဳချာယျာချာဲဂှ် တးပါဲလဝ်ရ။
ပ္ဍဲအရာခၠေဝ်ပလန် လ္တူဂလာန်ဂကောံတၠဝါဒကောန်ဂကူလ္ၚဵု မဟီုကၠုၚ်ဒၟံၚ် တၠုၚ်လအာသီကၠုၚ်အဝဵု၊ တၠုၚ်လအာ အလဵုအသဳဒးဒုၚ်ဖာဲပ္တိတ်မာန်ဂှ်တုဲ ဝန်ဇၞော်ဖောန်တာန်ဂှ်တှ်ေ အကြာညးကဵု ဒပ်ပၞာန် အဆက်နွံဒၟံၚ်လၟိုန်တုဲ လက္ချန်ဒပ်ပၞာန် မလုပ်စိုပ်သောၚ်ကလးအာအကြာ ဟွံဂွံဆဵုကေတ်ပုဟ်ဂှ် ဟီုလဝ် ပ္ဍဲဂိတုဂျောန် ၆ တေံရ။
နကဵုညးဖ္တိုက်ဖ္အောဝ်ခ္ဍဟ်ခ္ဍာဲပ္တိုန် ညံၚ်လစွံစိုတ်ဝါဒကောန်ဂကူ ဇြဟတ်ဂွံခိုဟ်ကၠုၚ်တအ် ပေါဲပၞာန်ဟီုဂှ် ဝေၚ်ပါဲမ္ဂး ဒှ်ခိုဟ်အိုတ်ရောၚ်ဟီုဂှ် ညးတံ ထေက်ကဵုဒးကၠိုဟ်လဝ်ဂှ်ကီု၊ လ္ပဖ္တိုက်ဖ္အောဝ်ခ္ဍဟ်ခ္ဍာဲအိုတ်ညိဂှ်ကီု၊ ယဝ်ကၠောန်ကၠုၚ်မ္ဂး ပြဒ္ဒညာဂမၠိုၚ် ဗက်ကၠုၚ်လက္ကရဴဏောၚ်ဂှ် ဝန်ဇၞော်ဖောန်တာန် သ္ဂးရ။
နကဵုညးဍုၚ်ကွာန်ဂမၠိုၚ် သွက်ဂွံချပ်စၚ်ခြၚ် လ္ပာ်ခိုဟ်ဂှ်ကီု၊ အကြာပရေၚ်စဵုဒၞါအဝဵုစၟိန်ပြမာန်ကဵု ပရေၚ်ထိၚ်ဒဝ် ပရေၚ်ဆက်ဆောံကလုတ်တမာန်တအ်ဂှ် ညံၚ်ဂွံတီကေတ် သောၚ်ၚ်ကၠးကၠး သွက်ဂွံကၠောန်သ္ပအိုတ်ဂှ်လေဝ် ညးဖ္တိုက်ဖ္အောဝ်လဝ်ရ။
လ္တူဂၠးတိဏံ ပြဒ္ဒညာ နွံဒၟံၚ်တၟာဂလိုၚ်တုဲ ပရေၚ်ဆက်ဆောံဍုၚ်သ္အာၚ်ဝွံ ထေက်ကဵုဒးပါလုပ် ပ္ဍဲပရေၚ်သောၚ်ကလး ပရေၚ်ကယျာန်ဓဝါန်ထေက်ဂှ်လေဝ် ဝန်ဇၞော် သ္ဂးရ။
ဟိုတ်နူတၚ်ဒတူလိုၚ်ဒပ်ပၞာန် မၞုံကဵုဇြဟတ်ခိုဟ်ဂှ်တုဲ ပြဒ္ဒညာအသိၚ်သၠုၚ်ကၠုၚ်တုဲ ပရေၚ်သီအဝဵု ဒှ်ကၠုၚ်ဏောၚ်ဟာ စပ်ကဵုသၟာန်ဏံတုဲ နကဵုဝန်ဇၞော် ဖောန်တာန်ဂှ်တှ်ေ တာလျိုၚ်ဒပ်ပၞာန် မဒးကၠောန်ညံၚ်ဂွံအံၚ်ဇၞးဂှ် နွံတုဲ ဒှ်ပဋိပက္ခ ကုအလဵုအသဳဟွံဂွံပုဟ်ဂှ် ဟီုရ။
ပ္ဍဲကဵုတာလျိုၚ်ဒပ်ပၞာန်ဂမၠိုၚ် ပရေၚ်စဵုဒၞါအဝဵုစၟိန်ပြမာန်လေဝ် ပါလုပ်ရောၚ် ညးဟီုရ။
အပ္ဍဲကဵုပရေၚ်ပန်ပှော် ဒှ်အာလဝ်ညးသ္ကအ် ပ္ဍဲပယျဵုၜါဍုၚ် ပ္ဍဲဂိတုမေ ၂၈ ဂှ် ကောန်ပၞာန်ကာမ္ဗောဒဳယျာမွဲတၠ ချိုတ်အာတုဲဂှ် ကာမ္ဗောဒဳယျာ အာတ်မိက်လဝ် သွက်ဂွံသောၚ်ကလး ပ္ဍဲရုၚ်သၞောဝ်ဓဝ်ဍုၚ်သ္အာၚ်ရ။
ၜါဍုၚ် သွက်ဂွံပညဳပညပ်သောၚ်ကလးဂှ် ဍုၚ်သေံ နွံပၟိက်တုဲ ယဝ်ရနွံပၟိက်ကဵု မ္ဒးသၠုၚ်ပ္တိုန်အသိၚ် ပရေၚ်ကြံၚ်မ္ၚိုဟ်ပယျဵုမ္ဂး သွက်ဂွံကၠောန်ပရေၚ်ပြုပြေၚ်ပၞာန်ကဆံၚ်သၠုၚ်ဂှ် ဒပ်ပၞာန် ဒစးဒုၚ်ပလေဝ်ပလေတ်လဝ်ရ။
ဟိုတ်နူတၚ်နွံပၟိက် အလဵုအသဳတုဲ ဒပ်ပၞာန် စိုတ်အိုတ်ဒၟံၚ်တုဲ ညးဍုၚ်ကွာန်ဂမၠိုၚ် ပါ်ပါဲဒၟံၚ်တအ်လေဝ် သာဂၠိုၚ်ကၠုၚ်ဒၟံၚ်ရ။
အပ္ဍဲကဵုပရေၚ်ကယျာန်ဓဝါန်ၜါဍုၚ်ဂှ် တိဍာ်ဆောံလေၚ်ကၠုၚ်မာန်တုဲ နကဵုအလဵုအသဳသေံ သွက်ဂွံဒတူလိုၚ် ပိုတ်တ်သ္ကုတ်တ်ဂှ် ညးဍုၚ်ကွာန်ဂမၠိုၚ် နွံပၟိက်ဒၟံၚ်ရ။
Ref: Bangkokpost