ပွေတ်ဖျူ၊ အံက်တဝ်ဗာ (၉)
ပ္ဍဲပွိုၚ်ဍုၚ်ပွေတ်ဖျူ ၊ ရးဒေသဇၞော်မဂွေဂှ် ဒပ်ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီုတုဲ ပ္ကိတ်ဗီုဓာတ် စၟဳစၟတ်ဒၟံၚ် ညးဍုၚ်ကွာန်အာကၠုၚ်တရဴတံရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် နူစဂိတုအံက်တဝ်ဗာ (၅) တုဲကၠုၚ်တေံတုဲ ပ္ဍဲဒဒန်မေဝ်သလဳ ကေုာံ သၞေဟ်ကၚ်စၟဳစၟတ်ကိုဝ်ဝေဒ် ပွေတ်ဖျူ၊ ဂၠံၚ်လုပ်ဍုၚ် လေဝ်ကာၚ်၊ ပွိုၚ်ဍုၚ်ပွေတ်ဖျူတံဂှ် ဒပ်ကံၚ်ဇြဳပၞာန် ကၟာတ်ဆိုအ်ဗစၟဳစၟတ်ဒၟံၚ် နကဵုဇြဟတ်လၟိဟ် ဗွဲမဂၠိုၚ်ဂၠေၚ်ရ။
ပ္ဍဲအရာစၟဳစၟတ် ကုညးမအာကၠုၚ်တတ်ကၠောံတံဂှ် စၟဳစၟတ်တၞးကာဒ်ကောန်ဍုၚ်တံကီု၊ ပ္ကိတ်ကဵုဗီုဓာတ်တုဲ စၟဳစၟတ်တံကီု၊ မ္ၚးနူဖံက်ဂၠိုက်ဂၠါဲ ကုကပေါတ်မပါဗက်ကၠုၚ်မွဲကရောံတံဂှ် သၟာကွဳစက်တံမ္ဂး ကဵုမိုပ်တုဲ စၟဳစၟတ်ဒၟံၚ်ဂှ် ညးဒေသမွဲတၠ ဟီုရ။
ပ္ဍဲကဵုစၟဳစၟတ်သာ်ဏံတံဂှ် ကဵုက္ဍိုပ်တုဲ စၟဳစၟတ်ဒၟံၚ် မၞိဟ်တြုံ၊ ကွဳစက်၊ ကွဳလိုန်ဓာတ်တံတုဲ ဟိုတ်နူဒပ်ကံၚ်ဇြဳပၞာန် စၟဳစၟတ်စဳစောတ်ဒၟံၚ်တံဂှ်ရ ညးဍုၚ်ကွာန်အာတရဴတံဝွံ မ္ၚးနူအခိၚ်လအ်လဂှ် ဒးဆေၚ်ဒၟံၚ်မုက်ကဵု အခက်အခုဲ ပရေၚ်အာကၠုၚ်တံ ဗွဲမဇၞော်ကဵုဇြဟတ်ရ။
ကံၚ်ဇြဳပၞာန်သီအဝဵုဝွံ ကြဴနူဂွံပရိုၚ် ဒဒှ်ရဒပ်စဵုဒၞါဒေသတံ ကေုာံ ဒပ်စဵုဒၞါညးဍုၚ်ကွာန် PDF တံ တတ်ပွိုၚ်ဍုၚ်ပွေတ်ဖျူတုဲ ယိုက်ဏာနၚ် လွဟ်လက်နက်ရောၚ်တုဲဂှ် စၟဳစၟတ်ကၠုၚ် သာ်ဏံရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ပ္ဍဲကွာန် မၞုံအပ္ဍဲပွိုၚ်ဍုၚ်တံဂှ်လေဝ် ဂေတ်ဒၟံၚ်ကၚ် နကဵုဂယျိုၚ်အရာပ်တံကီု၊ ဂေတ်ဂေၚ်အာကၠုၚ်ဒၟံၚ် နကဵုကွဳစက်ပၞာန်၊ ကွဳစက်အချုက်တံဂှ် ကၠောန်ဒၟံၚ်အဆက်က်ရ။
ပရိုၚ်−သြၚ်လောန်တိုၚ်(မ်)