တဝ်ဂျဵု၊ အံက်တဝ်ဗာ (၁၂)
သွက်ဖွက်ဆော ညးလိၚ်တုပ်တံ ဂွံပ္တိုန်စရၚ်မာန် သ္ဂောံမံၚ်မွဲစွံဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၁၁) ပ္ဍဲဍုၚ်တဝ်ဂျဵုဂှ် ပံက်ကၠုၚ်လဝ်တုဲ ဣဏံဝွံ သွက်ကၟိန်ဍုၚ်ဂျပါန်ဂှ် ဒှ်လဂါံဇိုၚ်တၟိမွဲရောၚ်။
ကၟိန်ဍုၚ်ဂျပါန်ဝွံ ပ္ဍဲဒၞါဲဒုၚ်တဲဒ္ဂေတ်ဗက် အရာဟွံတုပ်သၟဟ်တၞဟ်ခြာတံဂှ် ဒှ်ကၟိန်ဍုၚ်လဇုဲနူ ဍုၚ်တၞဟ်သ္အာၚ်တံတုဲ ၜိုန်ရဒှ်ဍုၚ် G-7 မွဲဍုၚ်ဓဝ် မဟွံကဵုအခေါၚ် မၞိဟ်လိၚ်တုပ်တံ ထပ်တဲကီုလေဝ် ကဵုအာအခေါၚ်ကၠောန်သ္ပ ဗီုလၟုဟ်ဂှ်ဝွံ သွက်ကၟိန်ဍုၚ်ဂျပါန်ဂှ် ဒှ်စၟတ်သမ္တီမွဲရ။
သၞောတ်ဏံဝွံ သွက်ဖွက်ဆော ညးလိၚ်တုပ်တံဂှ် ဒတုဲဖဵုစပ်ကဵုပရေၚ်ထပ်တဲ ဗဗွဲသၞောဝ်တံဂှ် ကဵုဟွံမာန်ကီုလေဝ် ဂကောံအခေါၚ်အရာ LGBTQ တံဂှ် ဒုၚ်ဒၟံၚ်တၠုၚ် နဒဒှ်လဂါံဇိုၚ် မချဳဒရာၚ်ကၠုၚ် သွက်အဓာန်ဂတမွဲရ။
“ဆက်မိတ်သၞောတ်ဏံ ပ္ဍဲတဝ်ဂျဵုဂှ်ဝွံ အာဒၟံၚ်လ္ပာ်ခိုဟ် ဒှ်အထံက်အပၚ် ဗွဲမလောန်ရ၊ ဆ္ဂး ၜိုတ်ဏံဓဝ်ဂှ် ဂွံပံၚ်ဖက်ဆက်ဆောံအာဂှ် ဟွံရုမ်ဂပ်ဏီပုဟ်၊ ပၟိက်ဇၞော်ဂှ်တှ်ေ မိက်ဂွံကလိဂွံ ပွမထပ်တဲ ဗဗွဲသၞောဝ်ရ” ဂှ် ဂကောံခေါၚ်အရာ LGBT နူတဝ်ဂျဵု ဇၞော်သ္ကိုပ်Fair သဵုယှဳ ဟီုရ။
ကၟိန်ဍုၚ်ဂျပါန်ဝွံ မၞိဟ်အာယုက်ဇၞော်ဇၞော် ဂၠိုၚ်ကၠုၚ်ဗက် ဟွံပြံၚ်လှာဲထောံ တၚ်စၞောန်ပျးသာ်ဏံတုဲ ယဝ်ရဒးပ္တောံၜတ်ကဵု ဍုၚ်တၞဟ်ဟ်တံမ္ဂး ကဵုဇီုကပိုက်ကၠေံ ဍာ်အစောံစရာဲ ဍုၚ်ဂျပါန်မာန်ဂှ် ဂကောံတၞဟ်ဟ်တံလေဝ် ကဵုသတိဟီုဂးလဝ်ရ။
က္ဍိုပ်သ္ကိုပ်ဗော် လေတ်ဗရဴဒဳမဝ်ကရေတ်တေတ် မဂွံအဝဵု ကောန်သာဗေတေဗ် သ္ကိုပ်ဝန်ဇၞော် ဖူမဳယိုဝ်ကဳယှဳဒါဂှ်ဝွံ စွံသတိတုဲ သွက်ဂွံကၠောန်သ္ပအာ ကိစ္စဏံဂှ် ဖ္တိုက်ဖ္အောဝ်လဝ်ရ။
ပ္ဍဲအရာပ္တိုန်လိက် စၟတ်သမ္တီ သွက်ဂွံထပ်တဲ ညးလိၚ်တုပ်တံ ဗီုဏံဂှ် တၚ်ဗၞတ်ဗ္ၜတ်ပိုၚ်ခြာလဝ်တံ နွံဒၟံၚ်ဏီတုဲ အရာမဗၞတ်ဗ္ၜတ်လဝ်တံဂှ်မ္ဂး ပ္ဍဲတဝ်ဂျဵု ဗွဲတွဵုမအောန် ပွမမံၚ်တန်တဴဒၟံၚ်ကဵု အဖဝ်မွဲမွဲတၠ၊ ကၠောန်ဒၟံၚ်ကမၠောန် ဟွံသေၚ်မ္ဂး ဖွက်ဆော မတိုန်ဒၟံၚ်ဘာတံ ကေုာံ အောန်အိုတ် ဒးဒှ် မၞိဟ်ပေၚ်အာယုက် (၁၈) သၞာံတုဲတံရောၚ်ဂှ် သ္ဂးရ။
လိက်အာတ်မိက်တံဂှ် ဒးပ္တိုန်စရၚ် ပ္ဍဲအန်လာၚ်တုဲ စၟတ်တဲသ္ပစၟတ်သမ္တီဂှ် စနူဂိတုနဝ်ဝေမ်ဗာ (၁) တုဲ ကလိဂွံမာန်ရောၚ် ထ္မံက်ထ္ၜးလဝ် ပ္ဍဲဝပ်သာ် အလဵုအသဳဍုၚ်တဝ်ဂျဵုရ။
“ကၠိုဟ်လဝ် အခေါၚ်အရာ LGBT တံ ဇြိုဟ်ဟ်နက်က်တုဲ ပ္ဍဲအရာဒ္ဂေတ်ဗက်ရှ်ေသှ်ေတံဂှ် တဝ်ဂျဵုဝွံ ဟိုတ်နူအသိၚ်သြဇာမဓလီုတံ ဇၞော်ဂှ်ရ ဣဏံဝွံ ဒှ်အရာသ္ဇက်ဂွံအမ်သဝ်ခိုဟ်ရ” ဂှ် ဟဳရိုဝ်ယှဳမဳကဳဒါ နူဂကောံ Marriage For All Japan ဟီုရ။
ဖွက်ဆောညးလိၚ်တုပ်တံဝွံ ဟိုတ်နူဒးဒုၚ်တးပါဲဒၟံၚ် နူကဵုပွမကဵုကသပ် ဖျေံသ္ဂုတ်သွာတ် စပ်ကဵုဂဥုဲတံဂှ်ကီု၊ ပ္ဍဲအရာလိၚ်မံၚ် ဒၞါဲမံၚ်စံၚ်တံဂှ်လေဝ် ဒးဂဗဒၟံၚ် အခက်အခုဲဂှ်ကဵု အခေါၚ်သ္ဂောံဒုၚ်စအာဲကၟာဲအောန်တံဂှ် ဒးဂဗလေပ်ဂှ်ရ “ကၞောတ်တဲ အလဵုအသဳဗဟဵု လုကဴဟွံပြံၚ်ကၠေံ ဥပဒေတံဂှ်မ္ဂး အရာကၠောန်ဟွံဂွံတံ နွံဒၟံၚ်တၟာဂၠိုၚ်ရ” သာ်ဝွံ ညးဆက်ဟီုရ။
အပ္ဍဲသၞာံတုဲကၠုၚ် ခြာဟွံလအ်ဏံ လစွံစိုတ် ညးဍုၚ်ကွာန်ဓမ္မတာ လ္တူပွမထပ်တဲလိၚ်တုပ်တံဂှ်ဝွံ ၜိုန်ရဒှ်ကၠုၚ် လ္ပာ်လဟဵု လ္ပာ်ခိုဟ်တံကီုလေဝ် သၟာပရေၚ်ဍုၚ်ကွာန်ကွေတ်ဗိုန်လ္ၚဵုတံဂှ်မ္ဂး ပွမဂၠါဲသၞ လ္တူကသပ် မဒုၚ်ဂိုၚ်ကေတ်သာ်ဏံဂှ် နွံဒၟံၚ်ဖိုဟ်ရ။
နဝ်ဗူရိုဝ် ညးမဒှ် ကောန်ဂကောံပရေၚ်အုပ်ဓုပ် LDP မၞုံလ္ပာ်တိဍာ် အိုၚ်ချဳဂှ် စပ်ကဵုပွမထပ်တဲလိၚ်တုပ်ဂှ် “အရာဇအိုန်ဇရ” သာ်ဏံ ချူပ္တိုန်ကၠုၚ် Post ပ္ဍဲအန်လာၚ်တုဲဂှ် ပ္ဍဲဂိတုဏံမံက် ပြဟ်ဟ်တေံဂှ် ဒးကလေၚ်ဒုၚ်လဝ်ဂုန်ရ။
Ref: Bloomberg