တဝ်ဂျဵု၊ အံက်တဝ်ဗာ (၁၃)
ကမ္ပဏဳတိုဝ်ယိုဝ်တာ မဝ်တာဂှ်ဝွံ ပ္ဍဲဍုၚ်ဗၟာ ကြဴနူဒပ်ပၞာန်သီအဝဵုတုဲ (၁၉) ဂိတုလအ်ကၠုၚ်တုဲဂှ် ကမၠောန် အရာမဒေါအ်ဒေၚ်လဝ်တံ ကလေၚ်ဂေတ်ဂြိပ်တုဲ သွက်ဂွံကၠောန်ပ္တိတ်ကာ ပ္ဍဲရုၚ်စက်ဂှ် စဒၟံၚ်ယျရောၚ် ဟီုလဝ် ပ္ဍဲဂိတုအံက်တဝ်ဗာ (၁၂) တေံရ။
ၜိုန်ရကမ္ပဏဳတၞဟ်ဟ်တံ တိတ်စ္ဍးအာကီုလေဝ် တိုဝ်ယိုဝ်တာ မဒှ်ရုၚ်စက် ကၠောန်ပ္တိတ်ကာ ဍုၚ်ဂျပါန်ဂှ်ဝွံ ပ္ဍဲဂိတုသေပ်တေမ်ဗာဂှ် ကလေၚ်ပလံၚ်ပ္တိုန်လဝ် ကပေါတ်စက် ပ္ဍဲကၟိန်ဍုၚ်ဗၟာတုဲ မွဲတ္ၚဲမ္ဂး စဗ္ဂပ်ကၠုၚ်ဒၟံၚ် ကွဳစက် (truck) Hilux မွဲဖ္ဍိုက် ဟွံသေၚ်မ္ဂး ၜါဖ္ဍိုက်ရ။
ဂွိၚ်ဖေက် ညးဍုၚ်ကွာန်တံ ထေၚ်ခယျဒး ဒဒှ်ရကဵုဒၟံၚ်အထံက်အပၚ် ကုကံၚ်ဇြဳပၞာန်ဂးတုဲ ကမ္ပဏဳဂျပါန်လ္ၚဵုတံ ကေုာံ ကမ္ပဏဳဍုၚ်သ္အာၚ်တၞဟ်ဟ်တံဂှ် ဟွံဆက်ကၠောန် ပရေၚ်ဓလိုက်တမ်ရိုဟ် ပ္ဍဲကၟိန်ဍုၚ်ဗၟာရတုဲ ရုပ်သီထောံအိုတ်ရ၊ ကမ္ပဏဳမသှ်ေဒၟံၚ်တံဂှ်လေဝ် သွက်ဂွံတိတ်စ္ဍးအာ နူကၟိန်ဍုၚ်ဗၟာဂှ် ဒးဆေၚ်ဒၟံၚ်မုက်ကဵု ဇြဟတ်ဂရိုဟ်တံရ။
“ကမၠောန်ပြဝလၟုဟ်ဂှ်ဝွံ ကိတ်ညဳဒၟံၚ်ကဵု တၚ်ရန်တၟံပိုယ်တံ နူတမ်ဝါဒိတေံ သွက်ဂွံပါလုပ်ရီုဗၚ် ညံၚ်ပရေၚ်ဖောအ်ဗြေဝ်တောတက် ကမၠောန်ကွတ်စက်ဍုၚ်ဗၟာဂှ်ကဵု သွက်ဂွံထံက်ပၚ် သၞာဲဒဴတံ ကေုာံ ဘဝသ္ၚိကၟိန်ညးတံဂှ် စှ်ေစိုတ်ရ၊ အကာဲအရာဗီုလၟုဟ်ဂှ် သွက်ဂွံဒ္ဂေတ်ဗက် သၞောဝ်ဥပဒေ ကေုာံ စေဝ်ပၞောန် မဆေၚ်စပ်တံအိုဿီု ပိုယ်တံ ဂ္စါန်ဒၟံၚ်လၟိုန်ကာလရ” သာ်ဝွံ ထ္မံက်ထ္ၜးလဝ် ပ္ဍဲတၚ်လလောၚ်တြး တိုဝ်ယိုဝ်တာရ။
တိုဝ်ယိုဝ်တာဝွံ တုဲကၠုၚ် ဂိတုဖေဖဝ်ဝါရဳ သၞာံ ၂၀၂၁ တေံရ သ္ဂောံပံက်ရုၚ်စက်ဂှ် စဳဇန်လဝ်ကီုလေဝ် ကိတ်အာလဝ်ကဵု အခိၚ်သီအဝဵုတုဲ ဒးဒေါအ်ဇူလဝ်ရ။
ဂကောံမၚ်ရံၚ် အခေါၚ်အရာမၞိဟ်တံဂှ် အာတ်မိက်လဝ် မွဲကရောံကဵု တိုဝ်ယိုဝ်တာဂှ် သီုကဵုကမ္ပဏဳ ဓလိုက်တမ်ရိုဟ် ပ္ဍဲကၟိန်ဍုၚ်ဗၟာ တၞဟ်ဟ်တံ ညံၚ်ဂွိုအ်ကၠောန်ကမၠောန် ပ္ဍဲဍုၚ်ဗၟာ မဝးပ္ကဝ်ဒၟံၚ် အခေါၚ်အရာမၞိဟ်တံဂှ် အာတ်မိက်လဝ်ရ။
“နကဵုတိုဝ်ယိုဝ်တာ ထေက်ကဵုဝေၚ်ပါဲ ဒဒှ်မကၠောန်ကမၠောန် ပရေၚ်ပိုန်ဒြပ်ကဵု ကမ္ပဏဳဒပ်ပၞာန်ပိုၚ်တံ ကေုာံ ကမ္ပဏဳပါ်ဍေံတံရောၚ်” သာ်ဝွံ သၞာဲဒဴဂကောံဏံ နူအာယှပရိုဝ်ဂရာမ်ဂှ် ဟီုရ။
တၚ်လလောၚ်တြးတိုဝ်ယိုဝ်တာ တၞဟ်ခြာမွဲဂှ် အတိုၚ်မသ္ပလဝ်သုတေသန ပ္ဍဲကၟိန်ဍုၚ်ဂှ်မ္ဂး လၟေၚ်ကမၠောန်ဍေံတံ မကၠောန်ပ္တိတ်အာ ပ္ဍဲကၟိန်ဍုၚ်ဗၟာအိုဿီုဂှ်ဝွံ တိုက်ရိုက်ဆက်စပ်ဒၟံၚ်ကဵု ကမ္ပဏဳပၞာန်ပိုၚ် ဟွံမွဲပုဟ်ဂှ် ထ္မံက်ထ္ၜးလဝ်ရ။
တုဲကၠုၚ် အပ္ဍဲဂိတုဂျောန်ဂှ် ကမ္ပဏဳဍာ်ဍာတ်တ် ဍုၚ်ဂျပါန် Kirin Holdings ဂှ် ယှေဝ်ယျာ ကမၠောန်ဖက်နှဲ မဆက်စပ်လဝ်ကဵု ဒပ်ပၞာန်မွဲဂှ် သွံတြးအာရောၚ် ဟီုဂးလဝ်ရ။
ရုၚ်စက်တိုဝ်ယိုဝ်တာဝွံ ဒက်ပ္တန်လဝ် နကဵုပရေၚ်ဓလိုက်တမ်ရိုဟ် ကၟိန်ဍုၚ်ဂျပါန်တုဲ တန်ဒၟံၚ်ပ္ဍဲဒၞါဲပရေၚ်ပိုန်ဒြပ်ဗွဲတၟေၚ် (သီလဝါ) မဒှ်ဒတန်ဂြိုဟ် ပရေၚ်ပလံၚ်ဗစိုပ် ကေုာံ ပရေၚ်ကၠောန်ပ္တိတ်ဗၞိက် မ္ၚးဍုၚ်လ္ဂုၚ်ဂှ်ရ။
Ref: Reuters