လွာဲကဝ်၊ အံက်တဝ်ဗာ (၁၄)
ပ္ဍဲတွဵုရးကရေၚ်ဍာဲ အပ္ဍဲကာလဒပ်ပၞာန်သီအဝဵုဂှ် ဟိုတ်နူဒးလွဟ်လက်နက်ဇၞော် နူဒပ်ကံၚ်ဇြဳပၞာန်တံ မပန်ပှော်လဝ်တံဂှ်ရ ကောန်ၚာ်သၟတ် ဟွံအောန်နူကဵု (၇၀) တၠ ဇီုကပိုက်ပြဟ်လလုဲနွံဂှ် ဂွံတီကေတ် အတိုၚ်စရၚ် ဂကောံမံၚ်ရံၚ်အခေါၚ်အရာမၞိဟ် ကရေၚ်ဍာဲတံရ။
ပ္ဍဲကဵုဂှ် ဟိုတ်နူဒးလွဟ်လက်နက်ဇၞော်တုဲ ကောန်ၚာ်သၟတ် မဒးချိုတ်အာဂှ် (၂၀) တၠပြၚ် ပါလုပ်တုဲ ကောန်ၚာ်သၟတ် (၅၀) တၠ မသှ်ေတံဂှ် ကလိဂွံလဝ်ဝပ် ဇီုကပိုက်ဒးလဝ်ရ။
တုဲကၠုၚ် ဂိတုသေပ်တေမ်ဗာ မွဲဂိတုဓဝ်ဂှ် ဟိုတ်နူကံၚ်ဇြဳပၞာန် ပန်ပှော်ဗ္တိုက်တံတုဲ ကောန်ၚာ်မဇီုကပိုက်ကလိဂွံဝပ်တံ ပါလုပ်ဒၟံၚ် (၂၀) ပြၚ်ရ။
ဒါရိုက်တာ အခေါၚ်အရာမၞိဟ် ကံၚ်ဇြဳကဵုကသပ် တွဵုရးကရေၚ်ဍာဲမွဲတၠဂှ် လ္တူပွမဗ္တိုက်ဒၟံၚ် ကောန်ၚာ်သၟတ်တံ ဗီုလၟုဟ်ဂှ် ဒုၚ်တဲဟွံမာန်တုဲ မွဲအခိၚ်မ္ဂး သွက်ဂွံကေတ်အရေဝ် ကွေံကွေံကြာန်ကြာန်ဂှ် ဂ္စါန်အာရောၚ် ဟီုရ။
သ္အာၚ်နူဂှ်ပၠန် နကဵုဂကောံဍုၚ်သ္အာၚ် မသ္ၚိတ်ဇြဒၟံၚ်တံ ယဝ်ရပါဲဒလေတ်ဒၟံၚ် ပြဝကံၚ်ဇြဳပၞာန်တံဂှ်မ္ဂး သွက်ဂွံတိတ်စ္ဍးအာ နူကဵုကၟိန်ဍုၚ်ဏံ ဗွဲမလုပ်သၞောဝ်ဂှ် ညးချဳဒရာၚ် အခေါၚ်အရာမၞိဟ် ကရေၚ်ဍာဲတံ သ္ဂးအိုတ်ရ။
ပ္ဍဲတွဵုရးကရေၚ်ဍာဲဂှ် ညးဍုၚ်ကွာန် မ္ဒးပါဲဒလေတ်ဒၟံၚ်ဘဲပၞာန် (၂) ကိုဋ်ပြၚ် နွံဒၟံၚ်တုဲ ဟိုတ်နူကံၚ်ဇြဳပၞာန်တုဲ လၟိဟ်ဂၞန်မဒးချိုတ်အာဂှ် စဵုကဵုဂိတုတုဲကၠုၚ်တေံဂှ် နွံကၠုၚ် ဒဵုကဵု (၃၂၁) တၠဂှ် ဂွံတီကေတ်ရ။
ပ္ဍဲဍုၚ်ဗၟာ လက္ကရဴဒပ်ပၞာန်သီအဝဵုတုဲဂှ် ဟိုတ်နူဒပ်ပၞာန်ဗၟာ ပန်ပှော်လွဟ်လက်နက်ဇၞော် ၊ ဗ္တိုက်ကဵု က္ၜၚ်ကျာ ကေုာံ ဟိုတ်နူပြဝ ပကီုပရာပ်တံဂှ်ရ ကောန်ၚာ်သၟတ် (၃၅၀) တၠပြၚ် ချိုတ်အာလဝ်တုဲ ကောန်ၚာ်သၟတ် မဒးဒုၚ်ရပ်ဒက်လဝ် နဒဒှ်ညးဒးဒုၚ်သ္ပဒၞန်တံလေဝ် နွံဒၟံၚ်ရ။
သွက်ဂွံကဵုဇြဟတ်ဂရိုဟ် မိမကွးဘာ မဒစဵုဒစးတၠအဝဵုပၞာန်ဂှ် ကောန်ၚာ်သၟတ် မဒးဒုၚ်ရပ်ဒက်လဝ် နဒဒှ်ညးဒးဒုၚ်သ္ပဒၞန်ဂှ် (၆၅) တၠနွံတုဲ ကောန်ၚာ်သၟတ် မဒးဂြိပ်ဒဴပါဲဒလေတ်ဒၟံၚ်တံဂှ် (၁၄,၀၀၀) ပြၚ် နွံတုဲ ပ္ဍဲကဵုဏံ ကောန်ၚာ်သၟတ် ကဝက်ပြၚ်ဂှ်ဝွံ ဒးဆောံလေၚ်ဒၟံၚ် အခေါၚ်ကတ်ဗ္တောန်ပညာတံရဂှ် CRPH လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)