မတ်မလီု၊ အံက်တဝ်ဗာ (၁၄)
ညးဍုၚ်ကွာန်ကောန်အရာပ် ဇီုကပိုက်ချိုတ်အာလဝ် အပ္ဍဲပရေၚ်ပန်ပှော် မက္တဵုဒှ်လဝ် ဗ္ဒါဲသၞေဟ်ကာတိုန်ဒဵု ကျာ်ဣသိယဵု၊ တွဵုရးဍုၚ်မန်ဂှ် နကဵုကံၚ်ဇြဳပၞာန် စောဲဒၟံၚ်ဒုဟ် မွဲလ္ပာ်ဓဝ်ဂှ် လ္ပသ္ပတုဲ ညးဂှ်မွဲဒှ်တၠတဲရောဟီုဂှ် သွက်ဂွံထ္ၜးပျးကဵု ကေမ္မရာ CCTV ကၠးကၠးမှးမှးဂှ် ဂကောံဒပ်စဵုဒၞါညးဍုၚ်ကွာန်ခရိုၚ်သဓီု ခၠေဝ်ပလန်လဝ်ရ။
တုဲကၠုၚ် ပ္ဍဲဂိတုအံက်တဝ်ဗာ (၁၂) ပယျာံဂယး ၜိုတ် (၁၀) နာဍဳဂှ် ဒပ်ပံၚ်ကောံ PDF ကဵု KNLA တံ အာစိုပ်ဗ္တိုက်လဝ် သၞေဟ်ကၚ်ဂီုကၠီု ကံၚ်ဇြဳပၞာန် ဗ္ဒါဲသၞေဟ်ကာတိုန်ဒဵု ကျာ်ဣသိယဵု မၞုံကွာန်ဂြိုပ်ကပေါဝ် ပွိုၚ်ဍုၚ်ကျာ်ထဝ်ဂှ်ရ။
အပ္ဍဲပရေၚ်ပန်ပှော်ဏံဂှ် ညးဍုၚ်ကွာန်ကောန်အရာပ် အာလ္ၚောဝ်ကျာ် (၃) တၠ ချိုတ်တုဲ ဟွံအောန်နူကဵု (၁၀) တၠ ဇီုကပိုက်ဂွံလဝ်ဝပ်ရ။
ကံၚ်ဇြဳပၞာန်ဂှ် ပရေၚ်ဗ္တိုက်ဏံဝွံ ဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ (၁) ကဵု NUG ၊ ဂကောံပံၚ်ကောံ PDF သၟဝ်တဲ CRPH တံ ဟိုတ်ဟွံမွဲ ပန်ပှော်လဝ် နကဵုလွဟ်လက်နက်ဇၞော် လွဟ်လက်နက်ဍောတ်တံဂှ်ရ ညးဍုၚ်ကွာန်ကောန်အရာပ်တံ ဇီုကပိုက်ချိုတ်ဂျိုၚ် ကလိဂွံလဝ်ဝပ်ရောၚ်ဂှ် စောတ်စောဲလဝ်ရ။
ညးဒုၚ်တာလျိုၚ် PDF ခရိုၚ်သဓီု ကိုဝ်ဨမေန်ထောန်ဂှ် ဂကောံလဵုပန်ပှော်လဝ် ညးဍုၚ်ကွာန်တံရောဟီုဂှ် နကဵုကံၚ်ဇြဳပၞာန် ဒးဂံၚ်ထ္ၜး ကေမ္မရာ CCTV ကုညးဍုၚ်ကွာန်တံရောၚ်ဂှ် ဟီုရ။
“ဂကောံလဵု ပန်ပှော်လဝ် ညးဍုၚ်ကွာန်အာလ္ၚောဝ်ကျာ်တံရောဟီုဂှ် သောၚ်ၚ်ကၠးကၠးရ၊ အေဒၞါဲဂှ် ပ္ဍဲသၞေဟ်ကာတိုန်ဒဵုတံဂှ် ကေမ္မရာ CCTV နွံမံၚ်ဂၠိုၚ်ကဵုမရ၊ နူကဵုစၟတ်သမ္တီလဝ်ဏံဂှ် ဒးဂံၚ်ထ္ၜးကဵု ညးဍုၚ်ကွာန်ပိုယ်တံ ကၠးကၠးမှးမှးဂှ် နွံပၟိက်ရ၊ ဂံၚ်ထ္ၜး ကၠးကၠးမှးမှးမ္ဂး ညးဂှ်မွဲ ဗ္တိုက်လဝ် ဒၞါဲဂှ်ရောဟီုဂှ် တီအာရဏောၚ်” သာ်ဝွံ ညးသ္ဂးရ။
စပ်ကဵုလၟေၚ်ဒဒှ်ဏံတုဲ ကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ ကံၚ်ဇြဳပၞာန်ဝွံလေဝ် နကဵုဗော်သွးကောန်ဂကူကရေၚ် (KNU/KNLA) မဒေါအ်လဝ်ပန်ပှော်တံ ဒးဂၠိုက်ဂၠါဲစၟဳစၟတ် ကုကောန်ဒပ် ဒပ်မဟာ (၁) KNLA တံကဵု PDF တံ ဗွဲမပြဟ်တုဲ ဗွဲမသၟဟ်ကဵု သၞောဝ်ဥပဒေဂှ် ဒးရေၚ်တၠုၚ်အာ ပွမကေတ်အရေဝ်စိုပ်တရဴတံ ဗွဲမသောၚ်ကၠးတီညာတ်ဂှ် လလောၚ်ပ္တိတ်လဝ်ရ။
ညးမၞုံအခေါၚ်ဟီုဂး ခရိုၚ်သဓီု KNU ဗဒိုဝ်သဝ်ဨနာၚ်ဂှ်လေဝ် ညးမဇီုကပိုက် ချိုတ်အာတံကဵု ညးမကလိဂွံလဝ်ဝပ်တံဂှ်ဝွံ ဒၟါနူလ္ပာ်ကံၚ်ဇြဳပၞာန် ပန်ပှော်လွဟ်လက်နက်ဇၞော်တုဲ ဒဒှ်ရချိုတ်အာလဝ်ဂှ် ဂွံလဝ်ပရိုၚ်ရောၚ် ဟီုရ။
“အတိုၚ်အဲမတီလဝ်ဂှ်တှ်ေ KNLA ဟွံပါပုဟ်၊ ဆ္ဂး ဂကောံ မဒက်ပ္တန်လဝ် ပ္ဍဲကဵုဂကောံကွာန်တံဏဂှ် နွံ၊ ပံၚ်ကဵု PDF တုဲ အာပန် ဗ္ဒိုပ်သၞေဟ်ကၚ်ဂှ် ဂွံလဝ်ပရိုၚ်သာ်ဏံရ၊ ဆ္ဂး အတိုၚ်ဂွံတီလဝ်ဂှ် ညးမကလိဂွံလဝ်ဝပ်တံဂှ်တှ်ေ လ္ပာ်ကံၚ်ဇြဳပၞာန်ရ ကလေၚ်ပန်ကဵုလွဟ်ဇၞော်တုဲ ကလိဂွံဝပ်ဇီုကပိုက်ဂှ် ဂွံလဝ်ပရိုၚ်ရ၊ ဆ္ဂး သွက်ဂွံသ္ပဒတန်ပရိုၚ်မာန်ဂှ် သွက်ဂွံကလေၚ်ပလံၚ်ကဵု တၚ်နၚ်ပရိုၚ်တံချိုတ်တ်ပၠိုတ်တ်ဂှ် ဟီုလဝ်ရ၊ ဒဵုအခိၚ်လၟုဟ် ဟွံဂွံဏီတုဲ သ္ပဒတန်ဟွံဂွံပုဟ်ဂှ် ဒှ်ဒၟံၚ်ရ” သာ်ဝွံ ညးသ္ဂးရ။
အခိၚ်လၟုဟ် စပ်ကဵုအပ္ဍဲပရေၚ်ဗ္တိုက် မက္တဵုဒှ်လဝ် ဗ္ဒါဲသၞေဟ်ကာတိုန်ဒဵုကျာ်ဣသိယဵု ညးဍုၚ်ကွာန်ကောန်အရာပ် မ္ဒးဇီုကပိုက်ချိုတ်အာလဝ်ဂှ်တုဲ မွဲလ္ပာ်ကုမွဲလ္ပာ် စောဲဒၟံၚ်ဒုဟ်တံ နွံဒၟံၚ်ရ။
စပ်ကဵုလၟေၚ်ဒဒှ်ဏံတုဲ ညးဒေသ မ္ဒးအောပ်မာဒၟံၚ် ပ္ဍဲပွဳပွူဗ္ဒါဲ ပရေၚ်ပန်ပှော် မွဲတၠဂှ်လေဝ် လ္တူလၟေၚ်ဒဒှ် ပွမရေၚ်တၠုၚ်ပန်ပှော်ဂှ် ဟီုလဝ် သာ်ဏံရ။
“မၞိဟ်ဆဵုနမတ်ဂှ် ဟွံမွဲပုဟ်၊ ဒှ်ပန်ပှော်ညးသ္ကအ်ဟီုဂှ်ဗက် သီုညးဖအိုတ် အောပ်မာဒၟံၚ်အိုတ်ရ၊ မွဲလ္ပာ်ဂှ် ကၠုၚ်ပန်ဏာတုဲ မွဲလ္ပာ်တေံ ဒုၚ်တဝ်စၞေဟ်ရ၊ လုပ်ကဵုကွဳစက်ကာတုဲ သၞေဟ်ကာတိုန်ဒဵု ကျာ်ဣသိယဵုဂှ် နွံၜါပၞော်ရ၊ ပၞော်စှ်ေဂှ် ဗၠာဲသၟိၚ်တံ ဒးမၚ်ဒၟံၚ်ကၚ်ရ၊ ပန်ပှော်ဏာလဝ် လ္ပာ်ပၞော်စှ်ေ နူကဵုဂၠံၚ်ကာသၟဝ်ဂှ်တုဲ ဍေံတံ (ဗၠာဲသၟိၚ်) ကလေၚ်ပန်ပှော်လွာဲဂှ်တုဲ ဂကောံလ္ပာ်တေံဂှ်လေဝ် ဒဳကွဳစက်ကာတုဲ တိတ်အာရ၊ ဒၞါဲဂှ်ဂှ် ရေၚ်ဖျောလေဝ် ဒှ်၊ ဒၞါဲဖျေံကာလ္ၚောဝ်ကျာ် တိုန်စှ်ေလေဝ် ဒှ်တုဲ အခိၚ်ဂှ် ဒးအာရဲလ္ၚောဝ်ကျာ်တံရ” ရဴဝွံ ညးသ္ဂးရ။
ဆ္ဂး ပ္ဍဲပရေၚ်ပန်ပှော်ဏံဂှ် ညးဍုၚ်ကွာန်တံ ဒးအောပ်မာဒၟံၚ် ဒၞါဲဗၠးဘဲတံဂှ်ရ ဒၟါနူမကမ်ဂကောံလဵုတုဲ ဇီုကပိုက်ချိုတ်ဂျိုၚ် ကလိဂွံလဝ်ဝပ်ရောဟီုဂှ် ဟီုချိုတ်တ်ပၠိုတ်တ် ဟွံမာန်ဏီတုဲ ကေမ္မရာ CCTV ဟေၚ် သ္ပဒတန်မာန်ရောၚ်ဂှ် ညးဒေသတံ သ္ပလဝ်တၚ်စၟတ်ရ။
အပ္ဍဲသၞေဟ်ကာ တိုန်ဒဵုကျာ်ဣသိယဵုဂှ် စုတ်လဝ်ကေမ္မရာ CCTV တုဲ ဆေၚ်ဖျာလ္ၚဵုတံလေဝ် သွက်ပရေၚ်ဂီုကၠီုဂှ် စုတ်လဝ် ကေမ္မရာ CCTV ဇကုအပိုၚ်တံ နွံဂှ် ညးဒေသတံ သ္ဂးရ။
ကြဴနူပရေၚ်ပန်ပှော်က္တဵုဒှ်တုဲဂှ် စနူဂိတုအံက်တဝ်ဗာ (၁၃) တုဲ ညးဍုၚ်ကွာန်အာလ္ၚောဝ်ကျာ် စဵုကဵုဟွံမွဲ အောန်အာတုဲ လ္ပာ်ကံၚ်ဇြဳပၞာန်ဂှ်လေဝ် မွဲဒမြိပ်ဗ္ဒါဲသၞေဟ်ကာတိုန်ဒဵုဂှ် ဂကောံဒပ်ကံၚ်ဇြဳပၞာန်တံ သၠုၚ်ပ္တိုန်လဝ် ဇြဟတ်ပရေၚ်ဂီုကၠီုရ။
ပရိုၚ်−သြၚ်လောန်တိုၚ်(မ်)