တနင်သဳ၊ နိုဝမ်ပါ ၁၉
ဟိုတ်နူပေါဲဗတိုက်သီဍုၚ် မဝ်တံၚ် ပ္ဍဲပယျဵုသေံ-ဗမာ ရးတနင်သဳဂှ်ရ သွက်ရဲဒဴပၞာန် ၄၀၀၀ ပြင်တံ စၞဇွောံမနာနာ ဟွံရုံဂပ်ဒှ်မံၚ်တုဲ တင်ယုတ်ဒေက်ပရေၚ်ထတ်ယုက်လေဝ်နွံမံၚ်ရောင် ညးကဵုမံၚ်ပရေၚ်ရီုဗၚ်ဟံၚ်ပြာ်တံ ဟီုကဵုဌာန်ပရိုင် သြင်လောန်တိုင်မ်ရ။
ဒပ်ပံၚ်တောဲဂကောံဇြဟတ်ပၠန်ဂတးတံ စနူနိုဝမ်ပါ ၁၁ ဂှ် ဗတိုက်သီဂွံလဝ်ဗ္ဒိုပ်မဝ်တံၚ် ပ္ဍဲကဵုနိုဝမ်ပါ ၁၄ ကီုလေဝ် ဟိုတ်နူဒပ်ကဝ်မယှေန်ပၞာန် ပန်မံၚ်ကဵုပၞာန်ကျာဂှ်ရ ညးဍုၚ်ကွာန်တံဟွံဂံၚ်စဴသ္ၚိဏီရ။
အတိုင်ညးကဵုအရီုဗင်ဘဲပၞာန်တံဟီုမ္ဂး ဟိုတ်နူကဵုပေါဲဗတိုက် ဒေသပယျဵုမဝ်တံၚ်ကဵု ဒပ်ပၞာန်ကျာ ကဝ်မယှေန်ပၞာန်ပန်မံၚ်ဂှ်ရ ညးဒေသမဝ်တံၚ်ကီု သီုကဵုကွာန်ဗ္ဒာဲဗ္ဒာဲတံ ညးဍုၚ်ကွာန်ဟွံအောန်နူကဵု ၄၀၀၀ ဒးဂြိပ်ပါဲမံၚ်မဒှ်ရ။
ပြဟ်ဟ်ဏံ ညးဒေသမဝ်တံၚ်ဗွဲမဂၠိုၚ်တံ အာစိုပ်ပါဲဒဴမံၚ် ပ္ဍဲကဵုကရပ်သၞေဟ်ကၚ်ပယျဵု ဒၞာဲအဒေါဝ်ဂှ်တုဲ ညးဒေသတၞဟ်ဟ်တံဂှ် ပ္ဍဲအကြာဂြိပ်ဒဵုဗီုပြေပြံၚ် ဒးဂြိပ်ပါဲမံၚ်အိုတ်သ္ဂးရ။
သွက်ရဲဒဴပၞာန် ၜိုတ် ၁၈၀၀ ပါဲဒဴမံၚ် ပ္ဍဲကဵုကရပ်သၞေဟ်ကၚ်ပယျဵု အဒေါဝ်တံဂှ်ဇွောံမဍိုက်ပေၚ်မံၚ်တုဲ သွက်ရဲဒဴပၞာန် လပါ်တၞဟ်ဟ်တံဂှ်တှ်ေ နွံမံၚ်ပၟိက်ကဵုဇွောံမကဵုဂဥုဲဇဗတံနွံရဂှ် သၟတ်ကဵုမံၚ်အရီုဗၚ်မွဲတၠ ဟီုကဵုဌာန်ပရိုၚ်သြင်လောန်တိုင်မ်ရ။
မွဲလပါ်ပၠန် ဟိုတ်နူ ဒှ်မံၚ်ကာလဥတုရာသဳပြံၚ်သၠာဲမံၚ်ကီုတုဲ သွက်ရဲဒဴပၞာန်တံနွံမံၚ်ပၟိက်ကဵု ကၟိဳစဵုဒၞာ၊ ယာတ်၊ ကၞဴ၊ ဟရောပ်တဲ ဟရောပ်ဇိုင်တံသၟးဟွံက ဂဥုဲနာနာဓါတ်ၜဵုဂမၠိုၚ်လေဝ် နွံမံၚ်ပၟိက်ကီု သ္ဂးရ။
ပြဟ်ဟ်ဏံ သွက်ရဲဒဴပၞာန်မဝ်တံၚ် နွံမံၚ်ကရပ်ပယျဵုသေံတံဂှ် ညးတာလျိုၚ်သေံတံ သိုၚ်ခၞံကဵုမံၚ်သ္ၚိဍာ်၊ ခဒမ်ဟောံဍာ် ယာယဳတံနွံမံၚ်ရောၚ်ဂွံတီကေတ်ရ။
ပရိုင်-သြၚ်လောန်တိုင်မ်
Photo – CJ