ဗေကျေန်၊ နိုဝမ်ပါ ၁၉
စပ်ကဵု သ္ကိုပ်ဝန်ဇၞော်ဂျပါန် သာနေ တာကာအဳချဳ ဟီုဂးလဝ်ပရေၚ်ထာဲဝါန်တုဲ ပွမကယျာန်ဓဝါတ် အကြာပရေၚ်ပိုန်ဒြပ်ဇၞော်အိုတ်အာယှၜါဍုၚ်ဏံ အသိၚ်သၠုၚ်တိုန်မံၚ်ဂှ် ကောန်ဍုၚ်ဂျပါန် နွံမံၚ်ကြုက်တံ ဒၞာဲမၞိဟ်ဂၠိုၚ်ၚ်ပါဲမံၚ်အာကီု ဒစးဒုၚ်စွံလဝ်သတိ ဒၞာတာလဝ်ဘဲအန္တရာဲညိဂှ် အလဵုအသဳဂျပါန် ကဵုလဝ်သတိရ။
အရာပွမကြံၚ်မ္ၚိုဟ်တံ ဂွံယှအ်ဖျေံမာန် သွက်ဂွံအာဆဵုဂဗ ညးတာလျိုၚ်ဌာနဝန်ဇၞော်ဍုၚ်သ္အာၚ်ကြုက်တံ အခိၚ်ညးတာလျိုၚ်ဌာနဝန်ဇၞော်ဂျပါန်မွဲတၠ အာစိုပ်မံၚ် ဗေကျေန်ဂှ် တင်ကဵုသတိ ရုၚ်ကလုတ်ဂျပါန်ဍုၚ်ကြုက် မံက်တိတ်ကၠုၚ်လဝ် အတိုင်ဏံရ။
ကောန်ဍုၚ်ကြုက်တံ လ္ပအာဍုၚ်ဂျပါန်ညိ ဟိုတ်နူကြုက်ဗတိုက်ဖအောဝ်လဝ်ဂှ်တှ်ေ ပြဟ်ဟ်ဏံ ကၟုဲအာတရဴဍုၚ်ဂျပါန် ပန်ဂအုံမွဲဂအုံဂှ် ဒှ်မံၚ်ကောန်ဍုၚ်ကြုက်တုဲ ပရေၚ်ပိုန်ဒြပ်ဂျပါန် ယုတ်ဒေက်စှ်ေမာန်ရောၚ်။
ၚုဟ်မးယှေဝ်ယာ ဆက်စပ်မံၚ်ကဵု ကမၠောန်ကၟုဲအာတရဴဂေတ်ဂၠးကဝ် ဍုၚ်ဂျပါန်တံ ယအ်စှ်ေအာလဝ်ရ။
ယဝ်ရ ကြုက်လုပ်ဗတိုက် ထာဲဝါန်မ္ဂး သွက်ဂျပါန် ဂွံဆက်ဂျိုၚ်တဴအာ ဒှ်ကၠုၚ်အန္တရာဲမန်တုဲ နကဵုပရေၚ်ပၞာန် ဒးကလေၚ်ပ္လန်အာရောၚ် သ္ကိုပ်ဝန်ဇၞော် သာနေ တာကာအဳချဳ ဟီုဂးလဝ်ကဵု အမာတ်စၠတ်ထဝ်တံဂှ် အကြာပရေၚ်ပိုန်ဒြပ်ဇၞော်အိုတ်အာယှၜါဍုၚ်ဏံ ပွမကယျာန်ဓဝါတ်ဇၞော်ဇၞော်မွဲ က္တဵုဒှ်မံၚ်ရ။
အမာတ်ကလုတ်ကြုက်မွဲတၠ နွံမံၚ်ဂျပါန်ဂှ် ကုတ်ထပိုတ်ကအ် တာကာအဳချဳရောၚ် ဘပဠလဝ် ပ္ဍဲကဵုမဳဒဳယာပရေၚ်မၞိဟ်တုဲ ဂျပါန်ဒစဵုဒစးစောဒကပရေၚ်ချူလဝ်ဏံဂှ် ဗွဲကြဴကလေၚ်ပလှ်ဖျေံဏာရ။
ဆေၚ်စပ်ကဵု အလေံအထဒေသကြုက်တံဂှ် သ္ပအဲပရဲကီု အကြာပရေၚ်ဆက်ဆောံကဵုကြုက်တံဂှ်လေဝ် ညံၚ်ဂွံစွံသတိညိ ရုၚ်ကလုတ်ဂျပါန် နွံဍုၚ်ကြုက်ဂှ် ဗတိုက်ဖအောဝ်လဝ်ကဵု ကောန်ဍုၚ်ဂျပါန်တံရ။
အခိၚ်တိတ်မ္ၚးပၠန် ညံၚ်ဂွံစွံလဝ်သတိကဵု ပွဳပွူတံကီု ညးမွဲတၠဓဝ်ဟေၚ် လ္ပတိတ်မ္ၚးညိ၊ အခိၚ်အာတရဴ ကရောံကောန်ၚာ်တံမွဲစွံမ္ဂး ဗွဲတၟေၚ်စွံသတိအိုတ်ညိ ရုၚ်ကလုတ်ဂျပါန် ကဵုလဝ်သတိရ။
ယဝ်ရဆဵုညာတ်မၞိဟ် ထေက်ကဵုသံသယနွံညိညိ ဟွံသေၚ်မ္ဂး မၞိဟ်ဂကောံမ္ဂး ညံၚ်ဟွံဂွံအာကရပ်ဒၞာဲတံဂှ်ကီု ပါဲတိတ်အာပြဟ်ဟ်ညိ နူကဵုရုၚ်ကလုတ်ဂျပါန် ကဵုလဝ်ကသပ်နွံရ။
Ref: Reuters