မတ်မလီု ၊ နိုဝမ်ပါ ၁၉
သွက်ဂွံစကၠောန်ဗ္ဒျ်အာ ပေါဲရုဲမာဲ ပ္ဍဲကဵုကၞောတ်သၞာံဏံ ကွးဘာတက္ကသိုလ်ဂမၠိုၚ် သွက်ဂွံကၠုၚ်ကဵုမာဲဒစးဒုၚ်ဂှ် ကဝ်မယှေန်ပၞာန်ခါန်ကၞက် ကဝ်မယှေန်ပေါဲရုဲမာဲကၟိန်ဍုၚ် ဂစာန်ကၠုၚ်မံၚ်ယျ။
ပ္ဍဲကဵုတ္ၚဲကၠောန်ပေါဲရုဲမာဲဂှ် ကွးဘာတက္ကသိုလ်တံ တိုန်ဘာစိုပ်မံၚ်ဒၞာဲ မ္ၚးဒေသဆန္ဒမာဲတံမဒှ်တုဲ ပ္ဍဲစၟတ်တ္ၚဲ ဒဳဇြမ်ပါ ၂၈ ဂှ် ဇၟာပ်ညး အာယုက်ပေင်ၜက် ၁၈ သၞာံတံ ကၠုၚ်ကဵုလဝ်မာဲဒစးဒုၚ်မာန်ရောၚ် ပ္ဍဲနိုဝမ်ပါ ၈ ဂှ် ကဵုလဝ်သမ္တီနွံရ။
ပ္ဍဲကဵုအရာပ်၊ ဂကောံကွာန် ရုၚ်ကဝ်မယှေန်ပါ် ဒၞာဲစရၚ်မာဲဇကုနွံမံၚ်ဂှ် ကွးဘာတက္ကသိုလ်၊ ဒဳကရဳကဝ်လိက်၊ ကွးဘာကဝ်လိက်တံ စနူတ္ၚဲ နိုဝမ်ပါ ၁၇ ဒဵုကဵု ၂၁ အကြာအခိၚ်နူဂယး ၉ နာဍဳ သဝ်တ္ၚဲ ၄ နာဍဳကဝက် အာကဵုမာဲ ဒစးဒုၚ်မာန်ရောၚ် သ္ဂးရ။
မွဲလပါ်ပၠန် ကွးဘာ အာတိုန်ဘာတက္ကသိုလ်တံ ဒဒှ်ရ ကဵုလဝ်မာဲဒစးဒုၚ်တုဲ ထ္ၜးကဵုလိက်ထံက်ဂလာန် ရုၚ်ပရေၚ်အုပ်ဓုပ် ဇကု မဆေင်စပ်မာန်မှ ဂွံအခေါင်ပအပ်ဘာကီုရောၚ် လ္တူ Facebook ပရိုၚ်တိတ်မံၚ်ရ။
ကွးဘာတံ ညံၚ်ဂွံအာကဵုလဝ်မာဲဒစးဒုၚ် ပ္ဍဲကဵုရုၚ်ကဝ်မယှေန်ပါ် ပွိုၚ်ဍုၚ်ဇကုတံညိဂှ် နူကဵုတက္ကသိုလ်၊ ဒဳကရဳကဝ်လိက်လ္ၚဵုတံ နူကဵုမုက်လိက် Facebook မွဲအဆံၚ် သွက်ဂွံဆဝ်ဗ္ၚုဟ်အာကီု စဳဇန်လဝ်သ္ဂးရ။
အလဵုအသဳ သွက်ဂွံအုပ်ဓုပ်ဇကုဂှ် ဂလာန်ပတေဟ်ဟၟဲမ္ဂး သဘဴညးဍုၚ်ကွာန်တံ အာစုတ်မာဲဟွံသေၚ်ကီုတုဲ ညးအုပ်ဓုပ်တံ ဘပဠဟွံဂွံပုဟ်ဂှ် ညးအခေါၚ်ဟီုဂးနွံ ဂကောံရာမညဖိတ်ဒရေဝ် ဇြဟတ်တၟိ NRFF နာဲပဳတာ ဟီုကဵုဌာန်ပရိုၚ်သြင်လောန်တိုင်မ်ရ။
“သဘဴဓရ်ညးဍုၚ်ကွာန်တံဂှ်တှ်ေ အလဵုအသဳမွဲမွဲ အဆံၚ်မၞိဟ်ပရေၚ်ညးအုပ်ဓုပ်မွဲမွဲဂကောံ ဟွံစှ်ေစိုတ်မ္ဂး ပေါဲရုဲမာဲဂှ် ဂလာန်ပတေဟ်ညးတံဟၟဲမ္ဂး ညးတံဟွံအာစုတ်ကဵုမာဲပုဟ်။ ဟွံစုတ်မာဲဂးတုဲ ရဲအုပ်ဓုပ်တံ ဘပဠ ညးဍုၚ်ကွာန် ဟွံဂွံပုဟ်။ ပျဲပျာံ ရပ်ချုက်ဟွံဂွံပုဟ်။ ဂးဟဂှ်တှ်ေ ဟိုတ်နူဟွံအာကဵုမာဲ (ညးအုပ်ဓုပ်တံဖန် လ္တူညးဍုၚ်ကွာန်) မွဲနဲမွဲဗီု ဖန်ဖက်ဏာလ္တူညးဍုၚ်ကွာန်တံမ္ဂး ပရေၚ်ပကီုပရာတ် စပ်ကဵုပေါဲရုဲမာဲ Electoral Violence ဟီုဂွံ။ ဖံက်ပကဝ်အခေါၚ်အရာမၞိဟ် ဟီုဂွံ” သာ်ဝွံ သ္ဂးရ။
နူကဵုသ္ကိုပ်က္ဍိုက်ပ် ဌာနပညာအဆံၚ်သၠုၚ် ဌာနဝန်ဇၞော်ပရေၚ်ပညာ သၟဝ်တဲကဝ်မယှေန်ပၞာန် ပ္ဍဲကဵုနိုဝမ်ပါ ၂၄ ဂှ် စပံက်အာ ဘာတက္ကသိုလ်၊ ဒဳကရဳကဝ်လိက်ဂမၠိုၚ်ကီုတုဲ ပ္ဍဲနိုဝမ်ပါ ၁၇ ဂှ် တ္ၚဲမာတ်ဘာဟၟဲ ဒုၚ်တဲပအပ်ဘာရောၚ် လလောၚ်တြးလဝ်ရ။
ပြဟ်ဟ်ဏံ ပ္ဍဲရးတနၚ်သဳ ကွးဘာတက္ကသိုလ် နူကဵုပွိုၚ်ဍုၚ်ဗိက်တံ ပ္ဍဲကဵုနိုဝမ်ပါ ၁၇ တေံ ကောံအာကဵုလဝ်မာဲဒစးဒုၚ် ပ္ဍဲကဵုဒၞာဲရုၚ်ကဝ်မယှေန်ပွိုၚ်ဍုၚ် ပံၚ်ကောံရဂှ် လိက်ပရိုၚ်ကၟိန်ဍုၚ်တြးဝါဒ ဒပ်ပၞာန်တံ ချူလဝ်ရ။
ပ္ဍဲကဵုကွးဘာတက္ကသိုလ်တံ ကဵုလဝ်မာဲဒစးဒုၚ်ဂှ်တှ်ေ ထ္ၜးတၞးကာတ်ကောန်ဍုၚ်ကဵု ကာတ်ကွးဘာတုဲ ပတိတ်ကေတ်တၞးမာဲ၊ အလံၚ်ညးစၞး ဇကုဒးစိုတ်ဂှ်အာစုတ်လဝ်မာဲ ပ္ဍဲကဵုခဒမ်ဟပၠုပ်ဆန္ဒကာပၞုက်ရဂှ် ပတိတ်လဝ်ပရိုၚ်ရ။
ပေါဲရုဲမာဲ သွက်ဂွံကၠောန်အာ ပိသ္ကုတ် ရန်လဝ်တုဲ ပ္ဍဲကဵုသ္ကုတ် ၁ ဂှ် ၁၀၂ ပွိုၚ်ဍုၚ်၊ သ္ကုတ် ၂ ဂှ် ၁၀၀ ပွိုၚ်ဍုၚ်ကဵု ဒၞာဲကၠောန်ဟွံမာန် ၅၆ ပွိုၚ် ပါဲထောံတုဲ ပွိုၚ်ဍုၚ်သှ်ေမံၚ်တံဂှ် ဆက်ကၠောန်အာသ္ကုတ် ၃ ရောၚ် ကဵုလဝ်သမ္တီတုဲတုဲ မဒှ်ရ။
ပေါဲရုဲမာဲကဝ်မယှေန်ပၞာန်ဏံ မၞုံကဵုသၠးပွး၊ ဗဗွဲဓရ်ဟွံသေၚ် ပေါဲရုဲမာဲအလီရောၚ် ညးဍုၚ်ကွာန်တံကီု ဂကောံဇြဟတ်ပၠန်ဂတး ဂမၠိုၚ်တံကီု သီုကဵုအမာတ်ကလုတ်ပွဳဗွိုၚ်ဂၠးကဝ်တံလေဝ် ပါဲပါဲဒစဵုဒစးမံၚ် ဒှ်မံၚ်အကာဲအရာဏံရ။
“ပေါဲရုဲမာဲဏံ ညးဍုၚ်ကွာန်တံ ၜိုတ်အဆံၚ်လဵုစိုတ်လုပ်စမံၚ်နွံရော ဗီုပြၚ်ဂကောံပၞာန်တံ သွက်ဂွံထ္ၜးစဂှ် စနူကဵုအခိၚ်လၟုဟ် ကဵုမံၚ်မာဲဒစးဒုၚ်ယျ သဘဴဍေံတံတြးဝါဒရ” သာ်ဝွံ နာဲပဳတာ ထံက်ထ္ၜးဟီုလဝ်ရ။
ပ္ဍဲကဵုနဲကဲဥပဒေ စပ်ကဵုပရေၚ်ပေါဲရုဲမာဲ ကဝ်မယှေန်ပၞာန်ခၞံလဝ်မ္ဂး ညးပါလုပ်မံၚ် ပ္ဍဲကဵုစရၚ်မာဲတံဂှ် အာစိုပ် မ္ၚးပွိုၚ်ဍုၚ်ဇကုဒးကဵုမာဲမ္ဂး ပ္ဍဲကဵုဒၞာဲဆန္ဒမာဲ ဆေၚ်စပ်တံဂှ် အခေါၚ်ကဵုမာဲ ဒစးဒုၚ်နွံရောၚ် ချူလဝ်ရ။
အပ္ဍဲကဵုပူဂဵု အခေါၚ်ကဵုမာဲဒစးဒုၚ်မာန်တံဂှ်တှ်ေ ကောန်ပၞာန် ကေုာံ ရဲကၟိန်သ္ၚိဌာန်မံၚ်မွဲစွံ၊ ကွးဘာ၊ ကောန်တန်ဗတောန်၊ ရဲဒးအချုက်၊ မၞိဟ်ယဲတိုန်မံၚ်ရုၚ်ဂဥုဲ၊ ရဲစ္ဍးခြာမံၚ်ကဵုဌာန်ဒၟံၚ် ဗွဲယာယဳတံ၊ ရဲစိုပ်မံၚ်ဍုၚ်သ္အာၚ် အလဵုအသဳကဵုလဝ်အခေါၚ်တံ ပါလုပ်ရ။
ဟိုတ်ဂှ်ရ နူကဵုရဲပါဲဒဴပၞာန်တံကဵု ကောန်ဍုၚ်စိုပ်မံၚ်ဍုၚ်မ္ၚးတံ မိက်ဂွံဂွံမာဲဒစးဒုၚ်မ္ဂး ထပေၚ်စုတ်တင်နၚ်ပူဂဵုဇကု ပ္ဍဲကဵုဗီုပြၚ် (၁၅) တုဲ အာဂမြၚ်ပတီပတိုန်ထ္ၜး ဇရေၚ်ရုၚ်ကဝ်မယှေန်ပါ် ကေုာံ ရုၚ်ကလုတ်တံမာန်ရောၚ် ကဝ်မယှေန်ပေါဲရုဲမာဲ ကၟိန်ဍုၚ် လလောၚ်တြးလဝ်နွံရ။
ပရိုင်-သြၚ်လောန်တိုင်မ်
Photo – MOI