မတ်မလီု ၊ နိုဝမ်ပါ ၁၈
ပ္ဍဲပေါဲရုဲမာဲ ကဝ်မယှေန်ပၞာန်ဏံ ဗော်ဒစဵုဒစးဇြဟတ်ဇၞော် ပြိုၚ်ပ္ကန်ဟွံမာန် ဗော်ပျဳခိုင်ဖျိုဝ် USDP ဝွံ စပ်ကဵုအစဳဇန် ပရေၚ်အေန်တာနိတ်ဂှ် လလောၚ်တြးလဝ် ပ္ဍဲကဵုနဝ်ဝမ်ပါ ၁၅ ရ။
ဗော်ဓယံက်ဒပ်ပၞာန် ပျဳခိုင်ဖျိုဝ် ပတိတ်ဏာလိက်ကၞပ်လလောၚ်တြး ပေါဲရုဲမာဲဂှ်တှ်ေ ဆေင်စပ်ကဵုအေန်တာနိတ်မ္ဂး အကာဲအရာလၟုဟ်ဏံဟွံကၠောန်ဟွံဂွံ လၟေၚ်ကမၠောန်ဒးထမံက်အာရုပ်ရဴဟေၚ် ချူထမံက်လဝ်နွံရ။
အတိုင်လိက်ကၞပ် လလောၚ်တြးလဝ်ဏံမ္ဂး ပ္ဍဲအရာကဏ္ဍသိပ္ပံကဵု နဲကဲပညာတံဂှ် သွက်ဂွံစဵုဒၞာအာ ပရေၚ်ဂီုကၠီုအေန်တာနိတ်ကဵု တင်နၚ်ဇၟာပ်ပူဂဵုတံမာန် ဒးချူခၞံအာ သၞောဝ်ဥပဒေတံရောၚ်စုတ်လဝ်နွံရ။
ပရေၚ်ဏံဂှ်တှ်ေ စပ်ကဵုအခေါင်ချူဆန်ဟီုဂး ဗွဲမသၠးပွး၊ အခေါင်ဟီုတွံနာနာ အခေါင်ဗှ်ပရိုၚ်ကေုာံ သွက်အရာ ပွမရေၚ်တၠုၚ်ပရေၚ်ကမၠောန်ဆက်စၠောံ လ္တူညးဍုၚ်ကွာန်ကောန်ဍုၚ်ဗမာတံဂှ် အစဳဇန်သွက်ဂွံထိၚ်ကြာပ်အာ ဍာ်ဇမၠိၚ်ရောၚ် ညးလ္ၚတ်တံ ဟီုရ။
ပ္ဍဲကဵုကၞောတ်သၞာံဏံအိုတ် ကေုာံသၞာံဂတမံက်တေံ ကၠောန်အာပေါဲရုဲမာဲမ္ဂး အလံၚ်အမာတ် USDP တံ အပ္ဍဲကဵုအလုံမွဲဍုၚ်ဂှ် လၟိဟ်ဂၠိုၚ်အိုတ်ဒှ်မံၚ်တုဲ ညးဇူလဝ်နူဒပ်ပၞာန် အဆံၚ်တာလျိုင်သၠုၚ်ၚ်တံ သွက်ဂွံလုပ်ပြိုၚ်အာ ဖန်လဝ်ရောၚ်။
ပေါဲရုဲမာဲဏံ ဗော် USDP မာန်ဍာံဍာံရောၚ် တော်ဆတုဲ ယဝ်ရပံက်အလဵုအသဳမာန်အာမ္ဂး စပ်ကဵု နဲကဲပညာပရေၚ်ဆက်စၠောံတံဂှ် သဘဴသွက်ဂွံဍဵုဍိုက်အာကဵု ဥပဒေတံရောၚ် ဒါရိုက်တာ ပရိုဂရာန် ဖံၚ်ဒေယှေန် အခေါၚ်အရာမၞိဟ် ဍုၚ်မန် နာဲအဲမန် သ္ၚဳဂၠိပ်လဝ်ရ။
“ဇၟောဝ်ဍာ်ပရိုၚ် ဟဳဇွောဝ်အာမံၚ် ဗွဲမသၠးပွးဂှ် ဍေံတံမိက်ဂွံကုတ်ထပိုတ်မံၚ်လအ်ကွေံရ။ ဟိုတ်ဂှ်ရ ပေါဲရုဲမာဲဏံ ဍေံတံမာန်ချိုတ်ပၠိုတ်ဏောၚ် တော်လဝ်တုဲ ဗွဲတၟေၚ် ပေါဲရုဲမာဲတုဲအာတုဲ ဍေံတံပံက်အလဵုအသဳမာန်အာမ္ဂး ချူခၞံအာ သၞောဝ်ဥပဒေ စပ်ကဵုပရေၚ်ဆက်စၠောံနာနာကဵု နဲကဲဆေင်စပ်တံတုဲ ကိစ္စသွက်ဂွံဍဵုဍိုက်အာပရေၚ်တံဏံ သွက်ဂွံကၠောန်အာချိုတ်တ်ပၠိုတ်နွံမံၚ်။ ဍေံတံဘိုအ်ဂွံထပၠုပ်အာ ဍိုက်ပၞာန်ဍာ်ဇမၠိၚ်နွံတုဲ ဒးဒှ်ဒွိၚ်ကွေံကွေံရ” သာ်ဝွံ သ္ဂးရ။
တုဲပၠန် ပ္ဍဲကဵုသၟဝ်သၞောတ် ဒးဒုၚ်မၚ်ရံၚ်မံၚ် ပွိုၚ် ၂၄ နာဍဳဂှ် ပရေၚ်ဍံၚ်ဗက်ဒၞာဲဇိုၚ်တံကီု ဒးဒုၚ်ရပ်ဟၟဲကဵုဗဗွဲဓရ် ပရေၚ်ဍဵုဍိက် ပျဲပျာံနာနာ ပရေၚ်ဒးဒုၚ်ဂစိုတ်တံကဵု ဒးဒုၚ်ဖျေံထံၚ်သၞာံဇမၠိၚ်တံ ဒှ်အာမာန်တုဲ သွက်ကောန်ဍုၚ်ဗမာတံ ကမၠောန်နွံကဵုဂုဏ်ဖဵုဟွံသေၚ်ရောၚ် ညးဟီုရ။
မွဲလပါ်ပၠန် သွက်ဂွံကလေၚ်ပ္လန် ပရိုၚ်အေန်တာနိတ် ကေုာံ ပရေၚ်ဗတိုက်မံၚ်ကဵု ပရေၚ်ဍုၚ်ကွာန် ဟီုဂးပါ်ပါဲမံၚ်တံဏံ သွက်ဂွံစဵုဒၞာကေတ်အာအရေဝ်မာန် ညံၚ်ဂွံမၚ်ရံၚ်အာ ပရေၚ်စကာသုၚ်စောဲအေန်တာနိတ် ပွိုၚ် ၂၄ နာဍဳဂှ် နူကဵုကံၚ်သဳစဵုဒၞာ ကောန်ဂကူကေုာံ ပရေၚ်ဂီုကၠီု ပံက်လဝ်ကမ္မတဳ နွံမွဲကီုရ။
ပ္ဍဲကဵုလိက်ကၞပ်လလောၚ်တြးပေါဲရုဲမာဲ USDP ဂှ် အပ္ဍဲဍုၚ်အရာနွံမံၚ်ပၟိက် Software ကဵု Application တံ သွက်ဂွံဖန်ဗ္ဒျ်ကေတ်မာန် ကဵုဇြဟတ်ရေၚ်တၠုၚ်အာရောၚ် သ္ဂးလဝ်ရ။
ဗီုဒပ်ပၞာန် ပတေဟ်မံၚ်ဍုၚ်ကြုက်တံ ပလက်ဖံၚ်သိုဲယှေဝ်အတိုင်ကြုက်ခၞံလဝ်ကဵု ညးဍုၚ်ကွာန်တံဂှ်ဟေၚ် ဂွံအခေါင်သုင်စောဲမာန်တုဲ ပရေၚ်ပါ်ပါဲအလဵုအသဳချူဆန်မံၚ်တံ ညိလေဝ်ကၠောန်ဟွံဂွံ USDP ဗက်ကၠောန်မံၚ် မွဲသၞောတ်ဓဝ်ရောၚ် ညးလ္ၚတ်တံ သ္ၚဳဂၠိပ်ရ။
တုဲပၠန် သွက်ဂွံထိၚ်ကြာပ်အာ ပရေၚ်အေန်တာနိတ်မာန်စုတ်လဝ် ပ္ဍဲကဵုလိက်ကၞပ်လလောၚ်တြး ပေါဲရုဲမာဲဂှ်တှ်ေ လေံထံက်ပၞာန် USDP ကၠောန်အာ သွက်ဂွံစဵုဒၞာကဵုပၞင်တၠအဝဵုရောၚ် ပါ်ပါဲမံၚ်အိုတ်ရ။
ညးဍုၚ်ကွာန်တဝ်စၞေဟ်မံၚ် သၞောတ်တၠအဝဵုပၞာန်တံဂှ် ယြဴပရေၚ်ဟၟဲကဵု ဗဗွဲဓဝ်သာ်လဵုဒှ်ဒှ် ဆက်တဝ်စၞေဟ်အာရောၚ် က္ဍိုပ်သ္ကိုပ်ကွးဘာတြေံ မေန်တွိုဲတေတ် ဟီုကဵုဌာန်ပရိုၚ်သြၚ်လောန်တိုင်ရ။
“သွက်ဂွံစဵုဒၞာအာ ပၞၚ်တၠအဝဵုပၞာန် USDP ကၠောန်မံၚ်ကမၠောန်ဍေံရ။ အံင်ဇၞးမာန် ဟွံသေၚ်။ ညးဍုၚ်ကွာန်ပၠန်ဂတးမံၚ်တံဂှ် နကဵုအရီုဗင်နဲကဲတံ စကာအာတုဲ ဆက်တဝ်စၞေဟ်အာ သၞောတ်တၠအဝဵုပၞာန်ဂှ်ရဏောၚ်။ ပေါဲရုဲမာဲဏံတုဲအာတုဲ အလဵုအသဳပျဳခိုင်ဖျိုဝ်ကၠောန်အာ ပ္ဍဲအရာကဏ္ဍ သိပ္ပံကဵု နဲကဲပညာတံ သွက်ဂွံစဵုဒၞာအာ ပရေၚ်ဂီုကၠီုအေန်တာနိတ်ကဵု တင်နၚ်ဇၟာပ်ပူဂဵုတံဟီုဂှ် ညံၚ်ဂွံဒၞာအာ ရဲဒစဵုဒစးတၠအဝဵုပၞာန်တံရ။ သွက်ဂုဏ်ဖဵုညးဍုၚ်ကွာန်တံ ဂွံဖောအ်ဗြဳတဴတက်အာ ကၠောန်ကဵုဟွံသေၚ်ပုဟ်” သာ်ဝွံ သ္ဂးရ။
စနူသီလဝ်အဝဵုဍုၚ်ဗမာတုဲ ဒဵုအခိၚ်လၟုဟ် သွက်ဂွံထိၚ်ချုက်အာ ဆေင်စပ်ကဵုပရေၚ်အေန်တာနိတ်တံဂှ် ကဝ်မယှေန်ပၞာန်ချူခၞံလဝ် နဲကဲဥပဒေတံတုဲ ကၟာတ်ဒမၠုလဝ်ပရိုၚ်ဍဵုဍိုက်မံၚ်တံ ကၠောန်လဝ်အဆက်က်ရ။
စနူအခိၚ်သီအဝဵုတေံ ပရေၚ်စကာမံၚ် သိုဲယှေဝ်မဳဒဳယာ Facebook ဂှ် ကဝ်မယှေန်ပၞာန်ကဵုလဝ်အမိၚ် အဝ်ပရေတာပရေၚ်ဆက်စၠောံတံကဵု ကာန်ပနဳအေန်တာနိတ်တံ ကၟာတ်ထောံလဝ်ဒဵုအခိၚ်လၟုဟ် မဒှ်ရ။
ညးဍုၚ်ကွာန်နွံအပ္ဍဲဍုၚ်တံဂှ် သွက်ဂွံတီပရိုၚ် ပရေၚ်ပိုန်ဒြပ်မၞိဟ်တံကီု တင်နင်ပရိုၚ်နာနာသာ်မာန် ဒုင်လဝ် Virtual Private Network ကော်ခဴစ VPN မွဲအဆံၚ်တုဲ စကာကၠုၚ် Facebook ကြပ်ပေၚ် ၅ သၞာံ မဒှ်ရ။
လ္တူဏံ ကဝ်မယှေန်ပၞာန် သွက်ဂွံထိၚ်ဒဝ်အာအဝဵုဍုၚ်ကဵု ပရေၚ်ညိင်ဝပ်တံမာန် သုင်စောဲစကာအာတင်နင်ပရိုၚ် ဗွဲမဂီုကၠီုနွံနွံမာန် ထ္ၜးဟိုတ်တုဲ ခၞံဗ္ဒျ်လဝ်သၞောဝ်ဥပဒေပရေၚ်ဂီုကၠီုဂှ် ဆက်ထပၠုပ်လဝ်လမျီုကီုရ။
အပ္ဍဲကာလသီအဝဵုဏံ လ္တူဇာဖိုၚ်ပရေၚ်မၞိဟ်တံ ဒစဵုဒစးပါ်ပါဲလဝ် ကဝ်မယှေန်ပၞာန်တုဲ မွဲလပါ်ဂှ်ဟိုတ်နူချူဟီုဂး ထံက်လဝ်ဂလာန် ပရေၚ်ချဳဒရာၚ်ညးဍုၚ်ကွာန်ကဵု ဂကောံပၠန်ဂတးတံဂှ် ညးဒးဒုၚ်ရပ်ထိၚ်လဝ် ၁၉၉၃ တၠ နွံမံၚ်ရောၚ် Data For Myanmar လလောၚ်တြးလဝ်ရ။
ပရိုၚ်-သြင်လောန်တိုၚ်မ်
Photo – USDP