ဗြဝတဳ၊ နိုဝမ်ပါ ၁၉
ကောန်ဍုၚ်ကြုက် က္ဍိုပ်သ္ကိုပ်ကျာဖျတံ ဂြိပ်တိတ်ကၠုၚ်လဝ် နူကဵု KK Park ကဵု ဍုၚ်တၟိယှိုဲကုက်ကိုတံဂှ် ဒပ်မၚ်ပယျဵုကရေၚ် BGF မၚ်မွဲရံၚ်စံၚ် ပြံၚ်ပဆုဲနၚ်လဝ် ပ္ဍဲကွာန်တေံကတေ ပွိုၚ်ဍုၚ်ဗြဝတဳတုဲ ထပ်သိုၚ်ခၞံမံၚ် ဒၞာဲစမြိုၚ်တၟိရောၚ် တမ်ရိုဟ်ဒေသတံ ဟီုကဵု ဌာန်ပရိုၚ်သြင်လောန်တိုင်မ်ရ။
ဒၞာဲကမၠောန်ကျာဖျ KK Park နွံမံၚ်သၠုၚ်ကျာဍုၚ်ဗြဝတဳ ဒၞာဲဒပ်မၚ်ပယျဵု ကရေၚ် BGF ထိၚ်ချုက်လဝ်ဂှ် စနူဂိတု အံက်တဝ်ပါတေံ နူကဵုဒပ်ကဝ်မယှေန်ပၞာန်လုပ်ဍိုက်သီကေတ်လဝ်တုဲ ကောန်ဍုၚ်ကြုက်တံကီု ကောန်ဍုၚ်သအာၚ် ဗွဲမဂၠိုၚ်ကေုာံ သၟာကမၠောန်နူကဵုအပ္ဍဲဍုၚ်တံဗွဲမဂၠိုၚ် ဒးပြံၚ်ဆုဲဂြိပ်တိတ်အာလဝ်ရ။
တုဲပၠန် ဍုၚ်တၟိယှိုဲကုက်ကို နွံမံၚ်သၟဝ်ကျာဍုၚ်ဗြဝတဳ ဒၞာဲ BGF ထိၚ်ချုက်လဝ်ဂှ်လေဝ် ထ္ၜးဟိုတ်ပရေၚ်ဗတိုက်သရိုဟ် ကျာဖျဂးတုဲ ဒပ်ကဝ်မယှေန်ပၞာန်ကဵု BGF တံ ဘိုအ်ဂွံလုပ်ပသောၚ်သ္အးရောၚ် သ္ဂးလဝ်ဂှ် ကောန်ဍုၚ်ကြုက်ကဵု သၟာကမၠောန်နူအပ္ဍဲဍုၚ်တံ ပ္ဍဲနဝ်ဝမ်ပါ ၁၇ အခိၚ်ဗတမ်ဂှ်ဒစးဒုၚ် ဆုဲပြံၚ်အာလဝ်ရ။
စပ်ကဵုပရေၚ် ဍိုက်လုပ်ပသောၚ်သ္အး ဍုၚ်တၟိယှိုဲကုက်ကိုတုဲ အကြာက္ဍိုပ်သ္ကိုပ် ဒပ်မၚ်ပယျဵုကရေၚ် BGF ဒုသ္ကိုပ်ပၞာန် သဝ်ချေတ်တူကဵု ကဝ်မယှေန်ပၞာန်တံ ပ္ဍဲနိုဝမ်ပါ ၁၇ ဂှ် ဆဵုဂဗသဳကၠဳလဝ် လ္တူဍုၚ်ဗြဝတဳကီုလေဝ် အကြာၜါလပါ် ပရေၚ်ဟွံပြေပြံၚ်နွံမံၚ်ရောၚ် တမ်ရိုဟ်ပရိုၚ်ယှိုဲကုက်ကို ကြပ်မံၚ်ကဵု BGF တံသ္ဂးရ။
ကမၠောန်ကျာဖျ ပ္ဍဲကဵုဍုၚ်တၟိယှိုဲကုက်ကိုဂှ် ပံၚ်ကဵုဒပ်ပၞာန်ဗမာတုဲ ဒဵုကဵုကၠေံကၠက်လုပ်သောၚ်သ္အး ဒဵုစိုပ်ဒတုဲရောၚ် ညးအခေါၚ်ဟီုဂးနွံ BGF သ္ကိုပ်ဗိုလ်ဇၞော် နာဲမိုင်ဇြဝ် ဟီုလဝ်ရ။
ဟိုတ်နူ ပသောၚ်ကမၠောန်ကျာဖျရောၚ် ဟီုလဝ်တုဲ က္ဍိုပ်သ္ကိုပ်ကျာဖျအဆံၚ်လ္တူတံ ပြံၚ်တိတ်အာ နူကဵုယှိုဲကုက်ကို စိုပ်အာဇရေၚ် ဗွိုၚ်ဒပ် BGF စၟတ် ၂ လပါ်ကွာန်တေံကတေ ပြံၚ်ဆုဲတိတ်အာဂှ်ဂွံဆဵုကေတ်တုဲ နူကဵုကွာန်တေံကတေဂှ်ပၠန် သွက်ကိုန်အစဳဇန်ကျာဖျတံ သိုင်ခၞံမံၚ်ဒၞာဲစမြိုၚ်တၟိတံနွံမံၚ်ရောၚ်ဂှ် တမ်ရိုဟ်ကၞက် ပရိုၚ်ဒေသတံ သ္ဂးရ။
ပ္ဍဲကဵုကွာန်တေံကတေ ဒၞာဲဌာန်ဂအုပ်ပၞာန် BGF စၟတ် ၂ ဂှ်တှ်ေ က္ဍိုပ်သ္ကိုပ်ကျာဖျ ဂြိပ်တိတ်ကၠုၚ်လဝ် ဍုၚ်တၟိယှိုဲကုက်ကိုသၟးဟွံက က္ဍိုပ်သ္ကိုပ်ကျာဖျ ဂြိပ်တိတ်လဝ် နူကဵု KK Park တံလေဝ် လုပ်စ္ၜုဲစ္ၜော် စိုပ်မံၚ်ရောၚ် ဂွံတီနူ တမ်ရိုဟ်ကၞက်ပရိုၚ်ဒေသတံရ။
လောန်ကၠုၚ်အကြာတ္ၚဲတံဏံ ပ္ဍဲကဵုလၟေၚ်တရဴ က္ဍိုပ်သ္ကိုပ်ပၞာန်ကၠုၚ်စိုပ်လဝ် တွဵုရးကရေၚ်ကဵုမန်ဂှ် ဗတိုက်သရိုဟ်အာ ကမၠောန်ကျာဖျတံရောၚ်ဟီုလဝ်ရ။
ပရိုင်-သြၚ်လောန်တိုင်မ်
Photo – The Reporter