ၜဳကလေၚ်၊ အံက်တဝ်ဗာ (၁၆)
ပ္ဍဲကွာန်အလူလေဝ် ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် ပ္ဍဲကဵုသ္ၚိဒၟံၚ် ညးဒေသ နဝ်ဨသဳတာမျေတ် မဒးဒုၚ်ကၟာတ်လဝ်ဂှ် လ္ပာ်ကံၚ်ဇြဳပၞာန် ကၠုၚ်စိုပ်သီကေတ်ဏာလဝ် ကပေါတ်အပ္ဍဲသ္ၚိတံ အိုတ်တးဂှ် ညးတၠခန္ဓ ကေုာံ ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်သီအဝဵုဝွံ ကြဴနူပံက်အမှု ကုနဝ်ဨသဳတာမျေတ် မဒးပါဲဒးလေတ်ဒၟံၚ် နကဵုသၞောဝ်ဥပဒေ ပရေၚ်ဗ္တိုက်သ္အး ပကီုပရာပ်တံတုဲဂှ် ပ္ဍဲဂိတုသေပ်တေမ်ဗာ (၁၉) ဂှ် ကၠုၚ်စိုပ်ကၟာတ်သီဏာလဝ် သ္ၚိဒၟံၚ်ညး မၞုံပ္ဍဲကွာန်အလူလေဝ်ဂှ်ရ။
တုဲပၠန် ပ္ဍဲဂိတုအံက်တဝ်ဗာ (၁၂) တုဲကၠုၚ်တေံဂှ် လ္ပာ်ကံၚ်ဇြဳပၞာန် စိုပ်ကၠုၚ် ကဵုကွဳစက် (၄) ဖ္ဍိုက်တုဲ ဒၞပ်ပရေံပရေံဟွံကဵုသှ်ေ သီကေတ်ဏာလဝ် ကပေါတ်ကညောတ် မၞုံအပ္ဍဲသ္ၚိဒၟံၚ်တံအိုတ်အးရ။
ကဵုလဝ်အခေါၚ်ဟွံမွဲမွဲသာ် ကၠုၚ်စိုပ်သီကေတ်ဏာလဝ် ကပေါတ်အပ္ဍဲသ္ၚိ မစၟတ်လဝ် ညးဍုၚ်ကွာန်ပိုၚ်တံဂှ် ဒှ်ဒၟံၚ်ပွကၠတ်တုဲ ပြဝလၟုဟ်ဂှ်ဝွံ ဒှ်တဴပကီုပရာပ်ရောၚ်ဂှ် နဝ်ဨသဳတာမျေတ် သ္ဂးရ။
ဒပ်ကံၚ်ဇြဳပၞာန်ဝွံ တုဲကၠုၚ်ဂိတုဂျူလာၚ်တေံ လုပ်စိုပ်ဂၠိုက်ဂၠါဲဗ္တးဗ္တန်ဒၟံၚ် သ္ၚိဒၟံၚ်နဝ်ဨသဳတာမျေတ်တုဲ ပ္ဍဲဂိတုသေပ်တေမ်ဗာဂှ် ကၟာတ်သီထောံတုဲ ပ္ဍဲဂိတုအံက်တဝ်ဗာဂှ်တှ်ေ ကပေါတ်ၜိုတ်မၞုံအပ္ဍဲသ္ၚိတံဂှ် ကၠုၚ်စိုပ်ကေတ်ဏာလဝ်အိုတ်ရ။
နဝ်ဨသဳတာမျေတ်ဝွံ ကြဴနူဒပ်ပၞာန်သီအဝဵုတုဲ ဟိုတ်နူပါလုပ်ဒၟံၚ် ပ္ဍဲပရေၚ်ချဳဒရာၚ် ဒစဵုဒစးတၠအဝဵုပၞာန်ဂှ်တုဲ လ္ပာ်ကံၚ်ဇြဳပၞာန် ပံက်လဝ်အမှု နကဵုသၞောဝ်ဥပဒေ ပရေၚ်ဗ္တိုက်သ္အးပကီုပရာပ်တုဲ အခိၚ်လၟုဟ် ဒးပါဲဒလေတ်ဒၟံၚ်ရ။
ပ္ဍဲတွဵုရးဍုၚ်မန်ဂှ် ကြဴနူဒပ်ပၞာန်သီအဝဵုတုဲ ညးစၞးဗော် NLD တံ၊ ညးထံက်ဂလာန်ဗော်တံ ကေုာံ သ္ၚိဒၟံၚ်ညးဒေသ ဟွံအောန်နူကဵု (၉၀) မ ဒးဒုၚ်ကၟာတ်လဝ်တုဲ ဒဒှ်မကၠုၚ်စိုပ်သီကေတ်ဏာလဝ် ကပေါတ်အပ္ဍဲသ္ၚိတံ သာ်ဏံဂှ်ဝွံ ဒှ်အလန်ကိုပ်ကၠာအိုတ်ရ။
ပရိုၚ်−သြၚ်လောန်တိုၚ်(မ်)