နေပျဳတဝ် ၊ ဒီဇြမ်ပါ ၃
ကာလကဵုမာဲမ္ဂး ညံၚ်ဂွံဒှ်သဟဇာတကဵုဒပ်ပၞာန် ပူဂဵုပံၚ်တောဲကဵု ဒပ်ပၞာန်မာန်ဂှ် ထေက်ကဵုဒးကဵုမာဲရောၚ် က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ဟီုဂး စန်ဒက်တံၚ်ဂြဲမာဲကု ကောန်တန်ဗတောန်တက္ကသိုလ် သၞာဲဒါကၟိန်ဍုၚ်တံ မွဲနဲမွဲဗီုနွံရ။
ပ္ဍဲကဵုတက္ကသိုလ်သၞာဲဒါကၟိန်ဍုၚ် (ဍုၚ်ဗမာသ္ကုတ်လ္တူ) ဒၞာဲၝောံခန် ရတနာ၊ တ္ၚဲ ၁ ဂိတုဒဳဇြမ်ပါဏံ အခိၚ်ဆဵုဂဗလဝ်ကဵု ကု ညးတာလျိုၚ်/အစာ ကေုာံ ကောန်တန်ဗတောန်ကွးဘာ နူကဵုဘာပကတ်ဗကေၚ် ညးတာလျိုၚ်ဒပ်ဗၠာဲသၟိၚ် ဇြဳပေၚ်ဂျဳကဵု ဘာတန်ဗတောန်ပလိုတ်ပၟတ် ဗဟဵု(ပျေၚ်ဥူလွေၚ်) တံဂှ် ဟီုဂးလဝ်ရ။
ပ္ဍဲကဵုဍုၚ်ဒဳမဝ်ကရေသဳမ္ဂး ပေါဲရုဲမာဲဂှ် ဒှ်အရာကိစ္စဇၞော်မွဲတုဲ နကဵုညးတံ ပ္ဍဲကဵုဒဳဇြမ်ပါ ၂၈ ဏံ ကၠောန်ကဵုပေါဲရုဲမာဲရောၚ် မဒှ်တုဲ ပေါဲရုဲမာဲမၞုံကဵုသိက္ခာ သၠးၜးဓရ်ယာမာန် အရာမဒစးဒုၚ် ဖန်ဖက်လဝ်တံဂှ် စဳရေၚ်ကၠောန်လဝ်တုဲယျဏောၚ် ဟီုလဝ်ရ။
ပၞောဝ်ကဵု ပရေၚ်ဂီုကၠီုကၟိန်ဍုၚ်တုဲ ပ္ဍဲကဵုကၠောန်အာ ပေါဲရုဲမာဲ ပါ်လဝ် ပိသ္ကုတ်ဏံ နနဲလီဠာန်မာဲဟွံဂွံ နကဵုသၞောတ်စက်ကဵုမာဲ မျာန်မာအဳလက်ထရဝ်နေတ် (MEVM) သွက်ဂွံကဵုအာဆန္ဒမာဲတံ ပြုပြေၚ်စဳရေၚ်ကဵုလဝ်ရောၚ် က္ဍိုပ်သ္ကိုပ်ပၞာန် သ္ဂးရ။
နကဵုကောန်တန်ဗတောန်တံညးဂမၠိုၚ် ပ္ဍဲအရာကဵုဆန္ဒမာဲမ္ဂး ညးရေၚ်တၠုၚ်ဂုဏ်ဖဵုဍုၚ် ဂုဏ်ဖဵုဒေသတံမာန်၊ ညးဒဂေတ်ဗက်တာလျိုၚ်ပိုဲ ပိတန်မာန်တံ၊ အတိုၚ်ကၟိန်ဍုၚ်တန်ကြန်မံၚ်ဂှ် ဒပ်ပၞာန်ဆက်တန်တဴနွံအာမံၚ် နဒဒှ် (Institution) ခိုၚ်ၚ်ကၠိုက်က်မဒှ်တုဲ ပူဂဵုဒှ်သဟဇာတ ပံၚ်တောဲရေၚ်တၠုၚ်ကဵုဒပ်ပၞာန်မာန်တံဂှ် ထေက်ကဵု ဒးကဵုအာမာန်ရောၚ် ဟီုလဝ်ရ။
ဒပ်ပၞာန်ဗမာကဵု ဗော်ပျဳခိုၚ်ဖျိုဝ်တံ ဒှ်မံၚ်တုပ်ပ်ရတုဲ ညံၚ်ရဴဗီုပြၚ် ကဵုမာဲ ဗော်ပျဳခိုၚ်ဖျိုဝ်ညိဂှ် က္ဍိုပ်သ္ကိုပ်ပၞာန် ဟီုလဝ်ဏောၚ် ဗိုလ်ဇၞော် CDM ဇြေန်ယဝ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“မၞိဟ်တံ ယဝ်ရဟွံပေၚ်စိုတ်ကဵု ဒပ်ပၞာန်တုဲ ကဵုမာဲမ္ဂး ဟွံဒးစိုတ်အရံၚ်ဍီုတုဲ ကဵုမာဲအရံၚ်ဍာဲဏောၚ်။ လၟုဟ် ဗီုလဵုဟီုဟီု ကဵုမာဲဗော်ပျဳခိုၚ်ဖျိုဝ်ညးတံ ဗော်ပျဳခိုၚ်ဖျိုဝ်ဂှ် ကဵုမာဲအိုတ်ညိ ဒှ်မံၚ်ဗီုပြၚ်ဏံ။ မုဒှ်ရောဟီုတှ်ေ ပျဳခိုၚ်ဖျိုဝ်ဂှ် ဒပ်ပၞာန်၊ ဒပ်ပၞာန်ဂှ် ပျဳခိုၚ်ဖျိုဝ်ရ။ တုပ်ပ်ရ ယူနဳဖံၚ်ရတၞဟ်ခြာမံၚ်၊ မၞိဟ်တံဏံဖအိုတ်ရဏောၚ်” သာ်ဝွံ သ္ဂးရ။
ပ္ဍဲကဵုပေါဲရုဲမာဲ ကဝ်မယှေန်ပၞာန်ကၠောန်အာဏံဂှ် ဗော်ဒုၚ်ဓယံက်ဒပ်ပၞာန် အလံၚ်အမာတ်ပျဳခိုၚ်ဖျိုဝ် ညးတာလျိုၚ် သၠောတ်လဝ်ယူနံၚ်ဖံၚ်ပၞာန် ကရပ် ၄၉၀ တၠ သွက်ဂွံလုပ်ပြိုၚ်အာရောၚ်။
တုဲပၠန် ညးတာလျိုၚ်ကဆံၚ် သ္ကိုပ်ဗိုလ်၊ ဒုသ္ကိုပ်ဗိုလ်ဇၞော် ၜိုတ် ၁၀ တၠ ဂှ်လေဝ် ကဵုဇူထောံကမၠောန်တုဲ သွက်ဂွံလုပ်ပြိုၚ်အာ နူဗော် တစညနွံမံၚ်ရဂှ် ဂွံတီလဝ်နူတၚ်နၚ် BNI Myanmar Peace Monitor ရ။
မွဲလပါ်ပၠန် သ္ကိုပ်ဝန်ဇၞော် ရးကဵုတွဵုရး ကဝ်မယှေန်ခါန်ကၞက်တံကီု ဝန်ဇၞော်ကၟိန်ဍုၚ်ဗွဲမဂၠိုၚ်တံကီု လုပ်ပြိုၚ်အာပေါဲရုဲမာဲရောၚ် ဂွံတီလဝ် နူကဵုစရၚ်အလံၚ်ညးစၞးတံရ။
အတိုၚ်စရၚ် ကဝ်မယှေန်ပေါဲရုဲမာဲမ္ဂး ပ္ဍဲကဵုအလုံဍုၚ်မွဲ ဗော်လုပ်ပြိုၚ် ၆ ဗော်တံဂှ် အလံၚ်အမာတ်ပျဳခိုၚ်ဖျိုဝ် မွဲလ္ၚီပြၚ်ၚ် သွက်ဂွံလုပ်ပြိုၚ်အာ ဂၠိုၚ်အိုတ်မဒှ်ရ။
ပ္ဍဲပေါဲရုဲမာဲ ဗော်ဂွံဇၞးမာဲဂှ် သၠောဲပြံၚ်ကဵုအဝဵုဍုၚ်ရောၚ် က္ဍိုပ်သ္ကိုပ်ပၞာန်ဟီုမံၚ်ကီုလေဝ် ဗီုပြၚ်မွဲမွဲ ဗၠေတ်ဗၠေၚ်အာဂှ်လေဝ် ဍေံတံ ဂွိၚ်ဖေက်မံၚ်ကွေံကွေံရောၚ် ဗိုလ်ဇၞော် CDM ဇြေန်ယဝ် ဟီုရ။
ဒှ်ပေါဲရုဲမာဲဗော်ဇဳ ကညၚ်ဟီုမံၚ်ကီုလေဝ် ပ္ဍဲကဵုပေါဲရုဲမာဲကဝ်မယှေန်ပၞာန် သ္ကိုပ်သ္ကကၠောန်အာဏံ ဗော်ပရေၚ်ဍုၚ်ကွာန် ဒစဵုဒစးဇြဟတ် ဇၞော်ဇၞော် ဗီုကဵုဗော် NLD တံ ဟွံပါလုပ်ပုဟ်။
ညံၚ်ဂွံသီုရုပ်ထောံ ပေါဲသီအဝဵုဟွံအံၚ်ဇၞးဏံ ပေါဲရုဲမာဲကဝ်မယှေန်ပၞာန် စဳရေၚ်ပလေဝ်စလဝ် နနဲသၞောတ်စှ်ေစှ်ေတုဲ ပေါဲရုဲမာဲဏံလောန်မ္ဂး ရုပ်ရဴအပြံၚ်အလှာဲ သၠောတ်လဝ်ယူနဳဖံၚ် ကယျိုၚ်ပၞာန်တံဟေၚ် သွက်ဂွံဆဵုညာတ်အာမာန်ရောၚ် BNI Myanmar Peace Monitor သ္ၚဳဂၠိပ်လဝ်ရ။
ပရိုၚ်-သြၚ်လောန်တိုၚ်မ်
Photo – USDP