အေတ်သတာန်ဗူလ်၊ ဒဳဇြမ်ပါ ၁၂
အခိၚ်ဍဵုဍိုက်မံၚ် မူသလေၚ်အပ္ဍဲဍုၚ်တံ လ္တူရဲအုပ်ဓုပ်လဝ် ဍုၚ်ဗမာဂှ် သွက်ဂွံကၠောန်ကဵု ပရေၚ်မာတ်ဆိုအ်လွဟ် ဂကောံအခေါၚ်အရာမၞိဟ်မွဲဂကောံ ဗတိုက်ဖအောဝ်ဏာကုလသမဂ္ဂ ပ္ဍဲကဵုဒဳဇြမ်ပါ ၁၀ ရ။
ပရေၚ်ထံက်ပၚ်ကၠေၚ်ၜၚ်ကျာ ညံၚ်ဂွံဒေါအ်၊ ပရေၚ်ပြံၚ်သၠာဲသွံကဵုလွဟ် စကာနဲကဲစကာၜါဂကူ၊ သွက်ဂွံဒေါအ်ထောံ ပရေၚ်ကဵုမံၚ်အရီုဗၚ်ဂီုကၠီုတံ၊ သွက်ဂွံကၠောန်ပရေၚ်မာတ်ဆိုအ်လွဟ်တံကီု အကာဲအရာပရေၚ်ဍုၚ်ဗမာ နူကဵုရုၚ်သၞောဝ်ဓရ်ရာဇဝတ်ဂၠးကဝ်မုလေဝ်ဟွံကေတ်အရေဝ်ဂှ် ညံၚ်ဂွံဒေါအ်အာ ဂကောံ The Burma Human Rights Network အာတ်မိက်ဏာ ကံၚ်သဳပရေၚ်ဂီုကၠီုကုလသမဂ္ဂရ။
ပေါဲရုဲမာဲအလီ သွက်ဂွံကၠောန်အာပ္ဍဲကၞောတ်ဂိတုဏံဂှ် အာသဳယာန် ညံၚ်ဂွံတးပါဲအာ၊ ကောံဓရီုအာသဳယာန် သီုဖအိုတ်ဂှ် ညံၚ်ဟွံကဵုကဝ်မယှေန်ပၞာန်တံတိုန်စိုပ်၊ ညံၚ်ဂွံကေတ်အရေဝ်ကဵု သ္ကိုပ်ပၞာန်ဗမာတံ ဂကောံဏံ ဗတိုက်ဖအောဝ်လဝ်ရ။
ပြဿနာရဲဒဴပၞာန်တံဂှ် နကဵုအေန္ဒိယ၊ သေံ၊ အေန်ဒိုနဳယှာကဵု ဗၚ်ဂလာဒက်ချ်တံ ညံၚ်ဂွံရပ်စပ်ကဵု၊ သွက်ဂွံကဵုအာပရေၚ်စဵုဒၞာကေုာံ ကဵုအရီုဗၚ် သွက်ညးဂြိပ်ပါဲဒဴကၠုၚ်နူကဵုဍုၚ်ဗမာတံကီု၊ ထံက်ပၚ်ကဵု ပရေၚ်ရီဗၚ်ဗ္စာရဏာမၞိဟ်တံကီု ကေုာံ အရီုဗၚ်ဆေင်စပ်ကဵု ပရေၚ်ဥပဒေတံ သွက်ဂွံထံက်ပၚ်အာဂှ်လေဝ် ဂကောံအခေါၚ်အရာမၞိဟ်ဏံ ဗတိုက်ဖအောဝ်လဝ် ကံၚ်သဳဂီုကၠီုကုလသမဂ္ဂရ။
ညးဒးဂြိပ်ဒဴပါဲမံၚ်ဘဲပၞာန် အပ္ဍဲဍုၚ်တံဂှ်လေဝ် တတ်ပယျဵုတုဲ သွက်ဂွံကဵုအာအရီုဗၚ်အထံက်ပၚ်ဂှ်လေဝ် ဂကောံဏံ ဗတိုက်ဖအောဝ်လဝ်ကီုရ။
လလောၚ်တြးလဝ် အခေါၚ်အရာမၞိဟ် ဆေင်စပ်ကဵုဂၠးကဝ် ပွိုၚ် ၇၇ သၞာံတုဲ ပ္ဍဲကဵုဍုၚ်ဗမာ ဂကူမူသလေၚ်တံ ဒးဒုၚ်ဍဵုဍိုက်မံၚ်ဏီရောၚ် ဂကောံ The Burma Human Rights Network ဟီုလဝ်ရ။
ပ္ဍဲကဵုဍုၚ်ဗမာ စပ်ကဵုဥပဒေ ပရေၚ်အဆံၚ်တုပ်သၟဟ်၊ ပရေၚ်ဂီုကၠီု၊ ဂုဏ်သိက္ခာတံတုဲ နူကဵုဒပ်ပၞာန် ဖံက်ပကဝ်လဝ် သၞာံဗွဝ်စှ်ဗွဲမဂၠိုၚ်နွံကီုလေဝ် ဂွံလဝ်အခေါၚ်ဗၠးဒးလအ်အာယျ ဂကောံအခေါၚ်အရာမၞိဟ်ဏံ သ္ဂးလဝ်ရ။
ရိုဟေၚ်ဂျာကဵု မူသလေၚ် ဂအုံမၞိဟ်အောန်တံ ၜိုတ်ကရပ်ဗွဝ်စှ် ၈ ဒးဆဵုဂဗဇီုကပါ်မံၚ်ကဵု ပွမထိၚ်ကြာပ်လဝ် ပါဲလဝ်နူဗွိုၚ်မၞိဟ်တံကဵု တၚ်ကရေပ်ဓရတ်နာနာတံရောၚ် ဂကောံဏံ ဟီုလဝ်ရ။
လ္တူကဝ်မယှေန်ပၞာန် နူကဵုအလဵုအသဳဂၠးကဝ်တံ ကဵုလဝ်ပရေၚ်အထံက်ပၚ်ဆက်စၠောံနာနာ ကေုာံ တမ်ရိုဟ်ကၞက်ပရေၚ်ဘဏ္ဍာတံ ညံၚ်ဂွံဗဒေါအ်တာဒၞာထောံကေုာံ နကဵုသၞောဝ်ဥပဒေ ညံၚ်ဂွံကေတ်အရေဝ်ကဵု က္ဍိုပ်သ္ကိုပ်ပၞာန်တံဂှ်လေဝ် ဗတိုက်ဖအောဝ်လဝ်ကု ကံၚ်သဳပရေၚ်ဂီုကၠီုရ။
Ref:AA