ဖနန်ပေၚ်၊ ဒဳဇြမ်ပါ ၁၁
အခိၚ်ပေါဲဗတိုက်အကြာပယျဵုၜါဍုၚ် သ္ကာတ်မြဟ်ဒှ်မံၚ်ဏံ နဒဒှ်ဍုၚ်တၠသ္ၚိ နူကဵုဍုၚ်သေံ ကၠောန်ဗ္ဒျ်မံၚ် ပေါဲဝေၚ်ပြိုၚ်ဇြဟတ် SEA Games ဒေသအဂၞဲ မရနုက်ကဵု ၃၃ ဝါဂှ် သၟာဝေၚ်ဇြဟတ်သ္ပစၞးဍုၚ်ညးတံသီုဖအိုတ် နုက်တိတ်အာ ဍုၚ်ခမေန် လလောၚ်တြးရ။
ထ္ၜးဟိုတ်ပရေၚ်ဂီုကၠီုနာနာတုဲ ကမ္မတဳအိုလာန်ပေတ်ခမေန် NOCC ဖျေံသ္ဂုတ်သွာတ် သွက်ဂွံနုက်တိတ်ဂှ် ပလံၚ်ဗစိုပ်ပရိုၚ်ကု ညးစဳဇန်ပေါဲဝေၚ်ဇြဟတ်သဳဂုၚ်တံ ပ္ဍဲဒဳဇြမ်ပါ ၁၀ အခိၚ်နူဂယး မဒှ်ရ။
ပရေၚ်ဒှ်ဒွိၚ်ဂွိၚ်ဂွာဲ ရဲသ္ၚိကၟိန်အိန်ထံၚ် သၟာဝေၚ်ဇြဟတ်တံနွံတုဲ ညံၚ်ဂွံကလေၚ်ကော်ဖျဴနၚ်ဓဝါဲဂှ် မ္ဒးဖျေံဏာသ္ဂုတ်သွာတ်ရောၚ် NOCC ဟီုရ။
ဟိုတ်ဂှ်တုဲ သၟာဝေၚ်ဇြဟတ်သ္ပစၞးဍုၚ်သီုဖအိုတ် နုက်တိတ်တုဲ စဳဇန်ကဵု ညံၚ်ဂွံကလေၚ်စဴဍုၚ်မိတိမရောၚ် ပ္ဍဲလိက် NOCC ဗစိုပ်ကဵုလဝ် ဂဥုပ်ဂကောံသဳဂုၚ်တေံ ချူလဝ်ရ။
တင်သ္ဂုတ်သွာတ်ဏံ ဖျေံဏာလဝ်လောဲလောဲဟွံသေၚ် ညးဇၞော် NOCC ဗက်ချာန်ရိုအာန် သ္ဂးရ။
ပေါဲပြိုၚ်သဳဂုၚ်ဏံ စနူဒဳဇြမ်ပါ ၉ ပံက်အသေအဟာန်တုဲ ဒဵုကဵုဒဳဇြမ်ပါ ၂၀ တေံ ကၠောန်ဗ္ဒျ်အာ ပ္ဍဲဍုၚ်ၜၚ်ကံက် စဳဇန်လဝ်ရ။
ဆဂး ဟိုတ်နူပြဿနာပယျဵုအကြာၜါဍုၚ်လံလနွံကၠုၚ်တုဲ အပ္ဍဲသတ္တဟဏံ ပေါဲဗတိုက်ကလေၚ်ဒှ်တိုန်ပၠန်ဂှ် လ္တူ ပေါဲပြိုၚ်သဳဂုၚ်ဏံ ပရေၚ်ဇီုကပါ်ဇၞော်ကဵုဇြဟတ် ဒှ်ကၠုၚ်ရ။
အခိၚ်ကၠာတေံလေဝ် ခမေန်တံ နုက်တိတ်လဝ် နူကဵုပရေၚ်ဝေၚ်ဇြဟတ် ၈ ဂကူတုဲရ။ စနူဒဳဇြမ်ပါ ၉ သဝ်တ္ၚဲ အခိၚ်ပံက်အသေအဟာန် ပ္ဍဲၜၚ်ကံက်ဂှ် ညးစၞးခမေန်တံ တိုန်စိုပ်လဝ်ညိညဟေၚ်ရ။
နူကဵုပေါဲပြိုၚ်သဳဂုၚ် ခမေန်နုက်တိတ်ဂှ် သ္ပဒတန်တုဲယျဂှ် ညးတာလျိုၚ်အဆံၚ်သၠုၚ် ပေါဲပြိုၚ်သဳဂုၚ် အရာရေၚ် ဟဳရာန်ဖရူယက် ဟီုလဝ် ပ္ဍဲဒဳဇြမ်ပါ ၁၀ ရ။
စပ်ကဵုပြဿနာပဋိပက္ခ ပယျဵုအကြာၜါဍုၚ်ဏံတုဲ ပေါဲဗတိုက်ဒှ်လဝ်ပွိုၚ် ၅ တ္ၚဲဂိတုဂျူလိုၚ်တေံဂှ် မၞိဟ် ၄၀ ပြၚ်ချိုတ်လဝ်တုဲ ပ္ဍဲကဵုဍုၚ်မလေဝ်ယှာ သေံကဵုခမေန်တံ ထပက်လဝ်စၟတ်တဲ တၚ်တုပ်စိုတ်ပရေၚ်ဒေါအ်ပန်ပှော်ကီုလေဝ် လၟုဟ်ပေါဲဗတိုက်ကလေၚ်ဒှ်ကၠုၚ်ပၠန် မဒှ်ရ။
ပေါဲဗတိုက်ကလေၚ်ဒှ်ကၠုၚ်ဂှ် ဟိုတ်နူဖံက်ပကဝ်လဝ် တၚ်တုပ်စိုတ်ရောၚ် လပါ်ညးလပါ်အဲ အခိၚ်စောဲစပ်ဟီုဂးမံၚ် စိုပ်ဒဳဇြမ်ပါ ၉ ဂှ် ကောန်ပၞာန်သေံချိုတ်လဝ် ၄ တၠ ညးဍုၚ်ကွာန်ခမေန် ချိုတ်လဝ် ၆ တၠတုဲယျ။
ပ္ဍဲပေါဲဗတိုက်ဒေသပယျဵုဏံ သေံတံစကာ ၜၚ်ကျာပၞာန်ဗတိုက်လဝ်တုဲ ညးဂြိပ်ဒဴပၞာန် ပေၚ်အာ ၅ ကိုတ်ယျဂှ် ဂကောံဟံၚ်ပြာ်တံ ဟီုရ။
Ref:CAN/AFP