ၜဳလေၚ်၊ ဂျာန်နဝါရဳ ၄
ပဋိပက္ခပၞာန်အကြာၜါလပါ် ပ္ဍဲပွိုၚ်ဍုၚ်ၜဳကလေၚ်သ္ကာတ်မံၚ်တုဲ ဟိုတ်နူကဵုပန်မံၚ်လွဟ်ဇၞော်ဂှ်ရ ညးဍုၚ်ကွာန်တံ ချိုတ်ဂၠိုၚ်တိုန်မံၚ်ရောၚ် ဂွံတီနူညးဒေသတံကဵု ရဲကဵုအရီုဗၚ်တံရ။
ပ္ဍဲဂျာန်နဝါရဳ ၁၁ သွက်ဂွံကၠောန်ပေါဲရုဲမာဲသ္ကုတ် ၂ ပ္ဍဲပွိုၚ်ဍုၚ်ၜဳလေၚ်ဂှ် အကြာဒပ်ပၞာန်ဗမာကဵု ဂကောံဇြဟတ်ပၠန်ဂတးတံ ပဋိပက္ခပၞာန်အကြာၜါလပါ် သ္ကာတ်မံၚ်အိုတ်အစောန်ရ။
အတိုၚ်ဌာန်ပရိုၚ်သြၚ်လောန်တိုၚ် ပကောံဂွံလဝ်တၚ်နၚ်မ္ဂး စနူကဵုဂိတုဒဳဇြမ်ပါ ၂၄ တေံ ဒဵုကဵုဂျာန်နဝါရဳ ၃ ဏံ အကြာပေါဲဗတိုက်ၜါလပါ်ကီု ဟိုတ်နူဒပ်ကဝ်မယှေန်ပၞာန်ဗမာတံပန်လွဟ်ဇၞော်တုဲ ညးဍုၚ်ကွာန်ချိုတ်လဝ် ၁၀ ဂှ် ကောန်ၚာ်ပါမံၚ် ၜါတၠကီုရ။
ညးတြုံညးဗြဴ ၁၁ တၠ ဒးလဝ်ဝပ်တုဲ အပ္ဍဲဂှ်တှ်ေ ဒးဂွိၚ်မံၚ်ကဵုအန္တရာဲလမျီုပါမံၚ်ၜါတၠကီုရ။
ဟိုတ်နူဒပ်ပၞာန်ဗမာ ပန်လွဟ်ဇၞော်ဂှ်ရချိုတ်ဂၠိုၚ်မံၚ်တုဲ အကြာပေါဲဗတိုက် ၜါလပါ်ဂှ်တှ်ေ ညးဍုၚ်ကွာန် ချိုတ်လဝ် ပိတၠနွံရ။
ပြဟ်ဟ်ဏံ အကာဲအရာပရေၚ်ပၞာန်သ္ကာတ်မံၚ်တုဲ ကောန်ကွာန် အလူလေဝ်၊ အလူဂျဳ ပွိုၚ်ဍုၚ်ၜဳကလေၚ်တံ ဗွဲမဂၠိုၚ် ချိုတ်လဝ်ကီု ညးဒေသဗွဲမဂၠိုၚ်ထောံသ္ၚိဌာန်တုဲ ဒးဂြိပ်ပါဲမံၚ်ဖိုဟ်ရ။
သွက်ပေါဲရုဲမာဲကဝ်မယှေန်ပၞာန် ထပက်ကရောၚ်ပၞာန်ဂှ် အကာဲအရာပရေၚ်ပၞာန်သ္ကာတ်မံၚ်တုဲ ဟိုတ်နူပန်လွဟ်ဇၞော်ဂှ် ညးဍုၚ်ကွာန်တံဒးလဝ်ဘဲဒဏ်ဂိကွေံကွေံရောၚ် ညးဒေသၜဳကလေၚ်တံ သ္ဂးမံၚ်အိုတ်ရ။
ပ္ဍဲကဵုပွိုၚ်ဍုၚ်ၜဳကလေၚ် ဂအုံကွာန် ၅၀ နွံမံၚ်ကီုလေဝ် ပ္ဍဲကဵု ၂၈ ဂအုံကွာန်ဂှ် ကၠောန်ပေါဲရုဲမာဲဟွံမာန်ပုဟ် ကဝ်မယှေန်ပေါဲရုဲမာဲကၟိန်ဍုၚ် လလောၚ်တြးလဝ်ရ။
ပရိုၚ်-သြၚ်လောန်တိုၚ်
Photo – CJ