မတ်မလီု ၊ ဂျာန်နဝါရဳ ၄
ပ္ဍဲကၞောတ်သၞာံတုဲကၠုၚ်ဏံ ကၠောန်လဝ်ပေါဲရုဲမာဲသ္ကုတ် ၁ ဂှ်တှ်ေ အလံၚ်အမာတ် ဗော်ပျဳခိုၚ်ဖျိုဝ် ဓယံက်ဒပ်ပၞာန် ၂၈ တၠဂှ် ဟွံဒးလုပ်ပြိုၚ်မွဲသာ် အလဵုလဵုဒှ်အာအမာတ်ကီု ပ္ဍဲကဵုသွဟ်ပေါဲရုဲမာဲ ပၠန်လေဝ် ဇၞးလဝ်မာဲဂၠိုၚ်အိုတ်ရ။
ပ္ဍဲဒဳဇြမ်ပါ ၂၈ နူကဵုကဝ်မယှေန်ပေါဲရုဲမာဲကၟိန်ဍုၚ် ကၠောန်လဝ်ပေါဲရုဲမာဲ ၁၀၂ ပွိုၚ်ဍုၚ်ဂှ်တှ်ေ ယၟုအမာတ်ဇၞးမာဲ ပၞောဝ်ကဵုစၠတ်ဓဝ်ညးတံတုဲ လလောၚ်တြးလဝ် သွဟ်ပေါဲရုဲမာဲ ၂၅ ပွိုၚ်ဍုၚ် ပ္ဍဲဂျာန်နဝါရဳ ၂ ဂှ်ရ။
အပ္ဍဲဏံ သွက်စၠတ်ဓဝ်ညးဍုၚ်ကွာန်၊ စၠတ်ဓဝ်ကောန်ဂကူ၊ စၠတ်ဓဝ်ရးကဵု တွဵုရးတံ ပ္ဍဲကဵု ၅၆ ဒၞာဲဂှ်တှ်ေ အလံၚ်အမာတ် ဗော်ပျဳခိုၚ်ဖျိုဝ် ၅၂ ဒၞာဲ ဂွံဒုၚ်ရုဲစှ်လဝ် ဂၠိုၚ်အိုတ်ရ။
ဟိုတ်ဂှ်တုဲ အတိုၚ်ကဝ်မယှေန် လလောၚ်တြးလဝ် ကိုပ်ကၠာဲဏံ ပေါဲရုဲမာဲသ္ကုတ် ၁ ဂှ်တှ်ေ ဗော်ပျဳခိုၚ်ဖျိုဝ်ဂွံလဝ်ဒၞာဲ သွက်စၠတ်ဓဝ် ညးဍုၚ်ကွာန် ၃၈ ဒၞာဲ၊ သွက်စၠတ်ဓဝ် ရးကဵု တွဵုရး ၁၄ ဒၞာဲ ဇၞးလဝ်မာဲ တုဲ သွဟ်သှ်ေမံၚ်ဂှ် ယဝ်ရဆက်ဂွံအာပၠန်မ္ဂး ပံက်အလဵုအသဳမာန်ရောၚ်။
ဗော်ပျဳခိုၚ်ဖျိုဝ်ဟေၚ် ပ္ဍဲစၠတ်ဓဝ် ပံက်ခၞံအာအလဵုအသဳဗဟဵုမာန်ဒှ်တုဲ တၚ်အခက်အခုဲညးဍုၚ်ကွာန်တံ မုလေဝ်အပြံၚ်အလှာဲဒှ်ကၠုၚ်ဟွံမာန်ပုဟ် ညးလ္ၚတ်ပရေၚ်ဍုၚ်ကွာန် ဥူကျဳမျေအ် သ္ၚဳဂၠိပ်လဝ်ရ။
“မုလေဝ်အပြံၚ်အလှာဲဟၟဲပုဟ်။ မၞိဟ်ကီုမူကီု မၞိဟ်တံဏံရတှ်ေ မုလေဝ်အပြံၚ်အလှာဲ ဒှ်ကၠုၚ်ဟွံသေၚ်ပုဟ်။ မုလေဝ်တၟေၚ်တၟဟ်ကၠုၚ်ဟွံသေၚ်ပုဟ်။ ဗဂေတ်ခၠန်လဝ်မတ်ရ။ ဍေံတံ ချပ်လဝ်ကဵုကြုက်တုဲ ကၠောန်ပေါဲခၠန်မတ်မွဲ ဟီုမွဲနဲပၠန် ပေါဲရုဲမာဲဂှ် ဟိုတ်နူကြုက် ဍေံတံဒးကၠောန်အာ။ မုလေဝ်အပြံၚ်အလှာဲဍာံဍာံ ဒှ်ကၠုၚ်ဟွံမာန်ပုဟ်” သာ်ဝွံသ္ဂးရ။
ပေါဲရုဲမာဲဗော်ဒစဵုဒစးဇၞော်ဇၞော် ဗီု NLD ဟွံပါကၠုၚ်ဂှ် ဗော်ပျဳခိုၚ်ဖျိုဝ် ဇၞးမာဲ သွက်စၠတ်ဓဝ်ညးဍုၚ်ကွာန်၊ စၠတ်ဓဝ် ရးကဵုတွဵုရး ဒၞာဲဆန္ဒမာဲ ၃၀ တံဂှ် နကဵုဥပဒေပေါဲရုဲမာဲၝောံပိုဒ် ၄၁(က) မ္ဂး ဂွံလဝ်ညးစၞး ၂၈ ဒၞာဲရ။
အတိုၚ်ၝောံပိုဒ် ၄၁(က) မ္ဂး ပ္ဍဲကဵုဒၞာဲဆန္ဒမာဲမွဲမွဲဒၞာဲ ယဝ်ရအလံၚ်အမာတ်မွဲတၠဓဝ်ဟေၚ်နွံမ္ဂး သွက်ဒၞာဲဆန္ဒမာဲဏံ ဟွံဒးကၠောန် ပေါဲရုဲမာဲမွဲသာ် ပူဂဵုလုပ်ပြိုၚ်ဂှ်ဟေၚ် ဒှ်ညးစၞးအမာတ်စၠတ်ဓဝ်ရောၚ် ဒးလလောၚ်တြးကဵုရောၚ် ခၞံလဝ်သၞောဝ်မဒှ်ရ။
ဟိုတ်ဂှ်တုဲ ပ္ဍဲတွဵုရးကချေၚ်၊ တွဵုရးသေံ၊ ရးသဂိုၚ်၊ ရးမဂွေကဵု ရးတနၚ်သဳ ဒၞာဲဆန္ဒမာဲ ၂၈ ဒၞာဲဂှ် ဟွံဒးကၠောန်ပေါဲရုဲမာဲ မွဲသာ် ဗော်ပျဳခိုၚ်ဖျိုဝ် အလဵုလဵုဒှ်အာအမာတ်ရ။
တုဲပၠန် အတိုၚ်ဥပဒေပေါဲရုဲမာဲၝောံပိုဒ် ၄၁(က)ဏံပၠန် ပ္ဍဲကဵုတွဵုရးသေံ သွက်ဒၞာဲဆန္ဒမာဲကောန်ဂကူဂှ် နူကဵုဗော်တဴတက်ကောန်ဂကူ အာခါ ဂွံအာညးစၞးစၠတ်ထဝ်တွဵုရးမွဲဒၞာဲကီုရ။
ဗော်ကၠဗုဂှ် ဂွံအာအမာတ်မွဲတၠ၊ ဗော်ကောန်ဂကူ “ဝ” လေဝ် နကဵုသၞောတ် FPTP ဂှ် ဂွံအာအမာတ် စၠတ်ဓဝ် ကောန်ဂကူမွဲတၠ လလောၚ်တြးကဵုဏာ အတိုၚ်ဥပဒေပေါဲရုဲမာဲၝောံပိုဒ် ၄၁(က) ရ။
ညးစၞးဒုၚ်ရုဲစှ် နကဵုသၞောတ် FPTP သွက်စၠတ်ဓဝ်ညးဍုၚ်ကွာန်ကီု စၠတ်ဓဝ်ကောန်ဂကူ၊ စၠတ်ဓဝ်ရးကဵုတွဵုတံကီု အတိုၚ်နူကဵုကဝ်မယှေန်ပါ်တွဵုရးတံလလောၚ်တြးဂှ် ကဝ်မယှေန်ပေါဲရုဲမာဲကၟိန်ဍုၚ် လလောၚ်တြးကဵုသ္ဂးရ။
ပ္ဍဲကဵုကၠောန်လဝ်ပေါဲရုဲမာဲ သွက်စၠတ်ဓဝ်ညးဍုၚ်ကွာန် ၂၅ ဒၞာဲ အပ္ဍဲကဵုအလံၚ်အမာတ်လုပ်ပြိုၚ်လဝ်တံမ္ဂး ဗော်ပျဳခိုၚ်ဖျိုဝ် ဇၞးလဝ် ၂၄ ဒၞာဲ ကေုာံ ဗော်ညဳသၟဟ်မန်ဂွံလဝ်အမာတ် မွဲဒၞာဲကီုရ။
အတိုၚ်ဥပဒေပေါဲရုဲမာဲ ၝောံပိုဒ် ၄၉(ခ)မ္ဂး လၟိဟ်မမာဲအလံၚ်အမာတ်ဂွံလဝ် သွက်စၠတ်ဓဝ်ညးဍုၚ်ကွာန်တံဂှ် ပကောံပကေဝ်တုဲ ညးဂွံလၟိဟ်မာဲဂၠိုၚ်အိုတ်ဂှ် ညးတံရုဲစှ်ပတိုန်ဏာ ညးစၞးအမာတ်မဒှ်ရ။
ပေါဲရုဲမာဲသ္ကုတ် ၂ ကၠောန်အာပ္ဍဲဂျာန်နဝါရဳ ၁၁ ပ္ဍဲကဵု ၁၀၀ ပွိုၚ်ဍုၚ်၊ သ္ကုတ် ၃ ဂှ် ဆက်ကၠောန်အာ ၆၃ ပွိုၚ်ဍုၚ်တုဲ ပ္ဍဲဂိတုမာတ်ချ်အိုတ်မ္ဂး ညံၚ်ဂွံပံက်အလဵုအသဳမာန် ကဝ်မယှေန်ပၞာန်ပလေဝ်ပလေတ်လဝ် မဒှ်ရ။
ပရိုၚ်-သြၚ်လောန်တိုၚ်
Photo – USDP