ဖာအၚ်၊ ဂျာန်နဝါရဳ ၄
တွဵုရးကရေၚ် ပ္ဍဲလဝေၚ်ပၞာန်ဗြဝတဳဂှ် ကျလဝ်ပၞာန်ကီု ကောန်ပၞာန်ချိုတ်အာတုဲ သ္ကိုပ်ၝောံဒပ် ၂၂ နူဖာအၚ်ဂှ် ကဝ်မယှေန်ပၞာန် ရပ်စပ်ကေတ်အရေဝ်ရဂှ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန် တမ်ဒပ်နွံမံၚ်သၟဝ် ဌာန်ဂအုပ်ၝောံဒပ် ၂၂ ဍုၚ်ဖာအၚ်တံ အခိၚ်လုပ်ဗတိုက်ပၞာန်ဒေသဖလူ မေန်လက်ပါန် သၠုၚ်ကျာဍုၚ်ဗြဝတဳဂှ် ဒှ်ပေါဲဗတိုက်ကဵုဒပ်ပံၚ်ကောံမဟာမိတ်ပၠန်ဂတး KNLA တံတုဲ ဒးဝပ်ချိုတ်လဝ်ဂၠိုၚ်ရ။
တုဲပၠန် တမ်ဒပ်နွံမံၚ်သၟဝ်ၝောံဒပ် ၂၂ တံ လုပ်ဖျေံလဝ်လွဟ်ကဵု ဒပ်ပံၚ်ကောံမဟာမိတ်ပၠန်ဂတး KNLA ဗိုလ်ဒါဗဝ် က္ဍိုက်ပ်လေဝ်နွံမံၚ်ရဂှ် လပါ်ဂကောံမဟာမိတ်ပၠန်ဂတးတံ လလောၚ်တြးလဝ်နွံရ။
ဒပ်ကဝ်မယှေန်ပၞာန်ဗမာ ၝောံဒပ် ၂၂ လဝေၚ်ပၞာန် စိုပ်မံၚ်ဒေသ သ္ကုတ်သၠုၚ်ကျာဗြဝတဳ လံကဵုဂိတုဂၠိုၚ်ကီုလေဝ် ဒဵုအခိၚ်လၟုဟ် တတ်ဒေသမေန်လက်ပါန်၊ ဖလူတံဟွံမာန်ဏီ မဒှ်ရ။
ပ္ဍဲပေါဲဗတိုက်ဏံဂှ် ကပေါတ်လွဟ်မကမ် ဆောံလေၚ်ဂၠိုၚ်၊ ကောန်ပၞာန်တံ ဖျေံလွဟ်ဂၠိုၚ်ဂှ်ကီု၊ ဟိုတ်နူပြေၚ်ဇန်လဝေၚ်ပၞာန် ကောပ်ကာဲကဵုအမိၚ်ဍိုန်လျမံၚ်တုဲ သ္ကိုပ်ၝောံဒပ် ၂၂ ဒးဒုၚ်ဖျေံ တာလျိုၚ်ရဂှ် ရိုက်ကၞက်ပရိုၚ်ပၞာန်ဒေသတံသ္ဂးရ။
ပ္ဍဲဒဳဇြမ်ပါတုဲကၠုၚ်ဏံ သ္ကိုပ်တမ်ဒပ် ၂၀၂ နွံသၟဝ်ၝောံဒပ် ၂၂ စိုပ်မံၚ်ဒေသ လဝေၚ်ပၞာန် ဖလူ၊ မေန်လက်ပါန် ဂှ်လေဝ် ဗတိုက်ပၞာန် ဟွံအံၚ်ဇၞး၊ ထ္ၜးဟိုတ်စလာဘ်ဗဇဴတုဲ ကဝ်မယှေန်ပၞာန် ရပ်လဝ်ရောၚ် ဂွံတီရ။
နူကဵုၝောံဒပ် ၂၂ ဖျေံလဝ်သ္ဇိုၚ်ဍုၚ်ဖာအၚ်ဏံ ပ္ဍဲကဵုသၞာံတုဲတုဲကၠုၚ်တေံ လုပ်ဝေၚ်လဝ်ပၞာန် ပ္ဍဲတွဵုရးရခေၚ်ဂှ် အတိုၚ်မွဲတမ်ဒပ်အိုတ်အာလေဝ်နွံဂှ် သ္ကိုပ်ၝောံဒပ် ၂၂ သ္ကိုပ်ဗိုလ်ဇၞော် အံၚ်နေမျိုဝ်ဂှ်လေဝ်ရပ်ဂွံချိုတ်တ်ရဂှ် ဒပ်ပၞာန် AA ပတိတ်လဝ်ပရိုၚ်ရ။
တုဲပၠန် ဒပ်ကဝ်မယှေန်ပၞာန် ကော်ပကောံကေတ် ကောန်ပၞာန်တၟိ နကဵုဥပဒေယိုက်ဝန်ပၞာန်ဂှ် ကလေၚ်ဗပေၚ်ကၠုၚ်ဇြဟတ်ဒပ်ပၞာန် မာန်ကၠုၚ်တုဲ တမ်ဒပ်သၟဝ်ၝောံဒပ် ၂၂ တံ ကလေၚ်ပါလုပ်ကၠုၚ် မဒှ်ရ။
ပရိုၚ်-သြၚ်လောန်တိုၚ်
Photo – CJ