မတ်မလီု၊ ဂျာန်နဝါရဳ ၆
ဒပ်မၞုံမံၚ်သၟဝ်တဲ ဌာန်ဂအုပ်ပၞာန်ရးအဂၞဲဍုၚ်မတ်မလီု တွဵုရးမန်ဂှ် ကဝ်မယှေန်ပၞာန်ပလံၚ်ဗစိုပ်ဏာ လပါ်ပွိုၚ်ဍုၚ် လိုၚ်ဗၠဲကဵု ဖာပေါန် တွဵုရးကရေၚ် ကၠောန်ပေါဲရုဲမာဲ သ္ကုတ် ၂ တေံရဂှ် ရိုဟ်ကၞက်ပရိုၚ်ပၞာန်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူဂိတုဂျာန်နဝါရဳမံက်ဂှ်ရ ဒပ်မၞုံမံၚ်သၟဝ်တဲဌာန်ဂအုပ်ပၞာန်ရးအဂၞဲတံ ပလံၚ်ဏာလဝ်လပါ်ဍုၚ်ဖာအၚ်၊ ပွိုၚ်ဍုၚ်လိုၚ်ဗၠဲ၊ ဍုၚ်ကမမံၚ် ပွိုၚ်ဍုၚ်ဖာပေါန် နူကဵုဂျာန်နဝါရဳ ၃ တေံ ကွဳစက်ပၞာန် ၂၀ မ တတ်အာလဝ် အပ္ဍဲဍုၚ်ဖာအၚ်ဂှ် ဂွံဆဵုလဝ်ရိုဟ်ကၞက်ပရိုၚ်ပၞာန်ဒေသ သ္ဂးရ။
ကွဳစက်ပၞာန် ဖ္ဍိုက်လဝ်ကောန်ပၞာန်ဗွဲမဂၠိုၚ်တံ တတ်အာလဝ်ဍုၚ်ဖာအၚ် ပတဝ်အာလဝ်လပါ် ပွိုၚ်ဍုၚ်လိုၚ်ဗၠဲတေံရဂှ် ဂွံတီလဝ် နူကဵုရိုဟ်ကၞက်ပရိုၚ်ပၞာန်ဒေသတံရ။
ပေါဲရုဲမာဲသ္ကုတ် ၂ ကၠောန်အာ ပ္ဍဲဂျာန်နဝါရဳ ၁၁ ဏံ ပွိုၚ်ဍုၚ်လိုၚ်ဗၠဲ၊ ပွိုၚ်ဍုၚ်ဖာပေါန်တံပါမံၚ်ရ။
အတိုၚ်အကာဲအရာလၟုဟ်ဏံမ္ဂး KNU သီဂွံလဝ်တုဲ လ္တူဍုၚ်ဖာပေါန်ဂှ် ကဝ်မယှေန်ပၞာန်ကၠောန်ပေါဲရုဲမာဲ ဟွံဂွံကီုလေဝ် ကၠောန်အာပ္ဍဲဍုၚ်ကမမံၚ်ရောၚ် ပ္ဍဲပွိုၚ်ဍုၚ်လိုၚ်ဗၠဲလေဝ် ဆၜိုတ်ကၠောန်အာလ္တူဍုၚ်လိုၚ်ဗၠဲကဵု ကွာန်ကရပ်ဂှ်ညိညရ။
တုဲပၠန် ပွိုၚ်ဍုၚ်ဖာပေါန် ပါလုပ်မံၚ်သွက်ဂွံကၠောန်အာပေါဲရုဲမာဲ သ္ကုတ် ၂ ဏံဂှ် အကြာဒပ်ကဝ်မယှေန်ပၞာန်ကဵု ဒပ် KNLA ဂကောံဇြဟတ်ပၠန်တံ ပေါဲဗတိုက်ဆက်ဒှ်မံၚ်တုဲ ဗျူဟာဖာပေါန် ညံၚ်ဟွံဂွံစှ်ေအာသၟဝ်တဲဒပ်ပၠန်ဂတးတံဂှ် နူကဵုဒပ်ပၞာန်ဗမာ ပန်မံၚ်ကဵုၜၚ်ကျာအရိုဟ်ဟ်တ္ၚဲဒှ်မံၚ် ညးအခေါၚ်ဟီုဂးနွံ KNU မဟာဒပ် ၅ သ္ကိုပ်ဗိုလ်ဇၞော် သဝ်ဂလာဒဵု သ္ဂးလဝ်ရ။
သွက်ဂွံကဵုအာအရီုဗၚ်ပၞာန်ကု ဗျူဟာဖာပေါန်မာန်ဂှ် စနူဂိတုအံက်တဝ်ပါတေံ ကဝ်မယှေန်ပၞာန်ထပက်ကၠုၚ်မံၚ် ကရောၚ်ပၞာန် အလန်ကဵုအလန်ကီုလေဝ် ဒှ်ပေါဲဗတိုက်ဇၞော်ကဵုဇြဟတ် ဒးဘဲဂိလောန်အာတုဲ ဒးကလေၚ်ဆုတ်မံၚ် ပ္ဍဲကဵုကွာန်ဝါဒူရ။
ဒပ်ကဝ်မယှေန်ပၞာန် ထပက်ကၠုၚ်မံၚ်ကရောၚ်ပၞာန်နူကဵုကမမံၚ်ဂှ် သွက်ဂွံကဵုအရီုဗၚ်ပၞာန် ဗဒိုပ်ကတိုၚ်တိကဵု ဗျူဟာဖာပေါန်တံမဒှ်တုဲ ဟိုတ်နူဒပ်ပၠန်ဂတးတံဗတိုက်မံၚ်ဂှ် ဆက်တိုန်ဂတဟွံမာန်ဒးဖျေံလဝ်ဒပ် ပ္ဍဲကဵုကွာန်ဝါဒူ ဂိတုလံအာ ဗွဲမဂၠိုၚ်ကီုရ။
ပရိုၚ်-သြၚ်လောန်တိုင်မ်
Photo – Social Media