မတ်မလီု ၊ ဂျာန်နဝါရဳ ၈
ပေါဲရုဲမာဲတုဲ အလဵုအသဳတၟိမံက်ကၠုၚ်တှ်ေ ညံၚ်သ္ဂောံဂွံလဝ် ဒၞာဲတာလျိုၚ်သ္ကိုပ်အုပ်ဓုပ်အရာပ် လ္တူဍုၚ်မတ်မလီုမွဲမွဲဒၞာဲဂှ် နူကဵုလၟုဟ်ဗက်မံၚ်ကဵုသြန်ယျရောၚ် ညးပါလုပ်ဂကောံပရေၚ်အုပ်ဓုပ် ဟွံထမံက်ယၟုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကဝ်မယှေန်ပၞာန်ကၠောန်ပေါဲရုဲမာဲတုဲ ပံက်အလဵုအသဳတုဲအာမ္ဂး သွက်ဂွံကလေၚ်ရုဲစှ်ပတိုန် သ္ကိုပ်အုပ်ဓုပ်ကွာန်ကဵု အရာပ်လ္တူဍုၚ်တံနွံရ။
ဟိုတ်ဂှ်တုဲ နူကၠာပေါဲရုဲမာဲဏံဟွံတုဲဏီ သွက်သ္ဂောံဂွံဒၞာဲတာလျိုၚ် သ္ကိုပ်အုပ်ဓုပ်မာန်ဂှ် ထပက်မံၚ်လာဘ်ဗဇဴကဵု ညးတာလျိုၚ်ရုၚ်ဌာန ပရေၚ်အုပ်ဓုပ်ကဆံၚ်ပွိုၚ်ဍုၚ်/ခရိုၚ်/တွဵုရးတံနွံမံၚ် ဂၠိုက်ဂၠာဲဂွံလဝ်ရ၊
တာလျိုၚ်သ္ကိုပ်အုပ်ဓုပ်တၟိဂှ် အခေါၚ်အရာနွံဂၠိုၚ်တုဲ ညံၚ်သ္ဂောံဂွံဒၞာဲတာလျိုၚ်ဏံ ဗက်မံၚ်ကဵုသြန်မဒှ်ရောၚ် ညးပါလုပ်ဂကောံပရေၚ်အုပ်ဓုပ် ဟွံထမံက်ယၟုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပေါဲရုဲမာဲဏံတုဲမ္ဂး ဒးကလေၚ်ရုဲသ္ကိုပ်အုပ်ဓုပ်တံ ဗီုကၠာတေံရလေဝ်။ လၟုဟ်ဂွံဗက်မံၚ်ကဵုသြန်ဂှ်တှ်ေ သွက်အခေါၚ်အရာရဏောၚ်။ သ္ကိုပ်အုပ်ဓုပ်ကၠာကၠာတေံ မုသြဇာဟၟဲကီုလေဝ် ပ္ဍဲလက်ထက်အလဵုအသဳပၞာန်ဏံ ဍေံတံဂွံလဝ်အခေါၚ်အရာဂၠိုၚ်ကွေံကွေံ။ တေၚ်ကၟုဲလေဝ်ဂွံသြန်၊ ကေတ်လိက်ထံက်ဂလာန်လေဝ်ဂွံသြန်၊ ပ္ဍဲကဵုကွာန်၊ အရာပ်တံ ကၠောန်ဗ္ဒျ်ပေါဲ ဂွံပံက်ဝိုၚ်ဝေၚ်မွဲအလန်ဓဝ်ဂှ် တမ်ကလေၚ်ပြေရ” သာ်ဝွံ သ္ဂးရ။
ရဲဗက်မံၚ်ဒၞာဲသ္ကိုပ်အုပ်ဓုပ်တံဏံ ဒးထပက်လဝ်သြန် ညးတာလျိုၚ်ကဆံၚ်ၚ်တံ သြန်ကိုတ်ကဵုကၠမ်နွံကီုလေဝ် ဂွံဒၞာဲသ္ကိုပ်အုပ်ဓုပ်ဍာံဍာံရောၚ် ညးမွဲလေဝ်ဒုၚ်ကဵုလျိုၚ်ဟၟဲပုဟ် ညးဆက်သ္ဂးလဝ်ရ။
အတိုၚ်ဥပဒေပရေၚ်အုပ်ဓုပ်ကွာန်/အရာပ် (သၞာံ ၂၀၁၆) တေံမ္ဂး အာယုက်တာလျိုၚ် သ္ကိုပ်အုပ်ဓုပ်ဂှ် အတိုၚ်တာလျိုၚ် အာယုက်သမ္မတကၟိန်ဍုၚ်မဒှ်ရောၚ် ချူခၞံလဝ်ရ။
အတိုၚ်တာလျိုၚ်အာယုက်သမ္မတ ယိုက်ဂၠေၚ်အာကီု မ္ဒးရုဲစှ်ပတိုန်အာသ္ကိုပ်အုပ်ဓုပ်ကွာန်/အရာပ်တံတုဲ မ္ဒးသၠောဲပြံၚ်ကဵု တာလျိုၚ်ကမၠောန် ညံၚ်ဂွံချိုတ်ပၠိုတ်ဒးဒှ်ရောၚ် ပ္ဍဲဥပဒေချူခၞံလဝ်ရ။
အခိၚ်ပၞာန်သီအဝဵုဏံ သ္ကိုပ်အုပ်ဓုပ်အရာပ် လ္တူဍုၚ်မတ်မလီုတံဗွဲမဂၠိုၚ် နုက်တိတ်လဝ်၊ သ္ကိုပ်အုပ်ဓုပ် ဟွံဒုၚ်ပရေၚ်သီအဝဵုဂှ်ကဝ်မယှေန်ပၞာန် ရပ်ချုက်ပၠုပ်ထံၚ်နွံတုဲ ရဲကြပ်မံၚ်ကဵုဗွိုၚ်ပၞာန်ဂှ်ရ ခါန်ကၞက်ပတိုန်ကဵုလဝ် သ္ကိုပ်အုပ်ဓုပ် မဒှ်ကီုရ။
ပရိုၚ်-သြၚ်လောန်တိုၚ်မ်
Photo – MOI