ကလေး၊ ဂျာန်နဝါရဳ ၂၄
ပ္ဍဲရးသဂိုၚ် ညးတာလျိုၚ်ထံၚ်ကလေဝ်တံ စမံၚ်လာဘ်ဗဇဴ ဍဵုဍိုက်ရေက်ကးဇြောတ်မံၚ်ဆီ နူကဵုကောန်ထံၚ်တံနွံမံၚ် ဂွံတီနူဇာဖိုၚ်ကောန်ထံၚ်ပရေၚ်ဍုၚ်ကွာန်အလုံဍုၚ်ဗမာ PPNM ရ။
ဒုသ္ကိုပ်ကောပ်ကာဲထံၚ်ကလေဝ် ကျဝ်ထက်ဥူဂှ် သွံစဇဗၠုပံၚ်၊ ခၞေဝ်ကေဝ်ကောန်ထံၚ်တံတဵုလွဳဂှ် ပတိုန်ၚုဟ်မး ပိဆတုဲသွံစကီု သွက်ဂွံပြံၚ်ဒၞာဲခဒမ်၊ ဒၞာဲတိက်တံဂှ်အာတ်ဓရတ်ကေတ်မံၚ်သြန် နူကဵုကောန်ထံၚ်တံ ထေၚ်လဵုမံၚ်ရ။
တုဲပၠန် ဒုသ္ကိုပ်ကောပ်ကာဲထံၚ် ကျဝ်ထက်ဥူဂှ် ကေတ်အဝဵုသ္ပမာန်ဆက်ဆောံမံၚ်တုဲ စၞစသုၚ်သွက်ညးတေံ နူဂယး၊ ဒေါဝ်တ္ၚဲ၊ သဝ်တ္ၚဲတံဂှ် ထပိုတ်ကေတ်မံၚ်နူကဵုဇွောံမအရၚ်ကောန်ထံၚ်တံ သ္ဂးရ။
ပ္ဍဲဍုၚ်ဗမာ စနူသီအဝဵုတုဲ ဗွဲကြဴဂှ် ပ္ဍဲထံၚ်ဗွဲမဂၠိုၚ်တံမ္ဂး ညးတာလျိုၚ်ထံၚ်တံ ဝဳလဝ်ကောန်ရဲတဝ်သွာအပ္ဍဲကဵုထံၚ်တုဲ တက်မံၚ်ပရဲလ္တူကောန်ထံၚ်ဂမၠိုၚ်၊ စလာဘ်ဗဇဴ ကၠောန်မံၚ်ပရေၚ်ရေက်ကးဇြောတ်ဆီတံ ပရေအ်မံၚ်ကွေံကွေံရောၚ် ညးတာလျိုၚ် လလောၚ်ပရိုၚ် PPNM မယံၚ်နဳလေၚ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုထံၚ်ကလေဝ်ပၠန် စၞးစဇွောံမသွက်ကောန်ထံၚ်တံဂှ် ဟွံပတိတ်ကဵုပေၚ်ၚ်ဟွံသၟးက ထပိုတ်ကေတ်စလဝ်ကီု ညးတာလျိုၚ်ထံၚ်တံထပိုတ်ကေတ်ထောံ ကပေါတ်ပါသေဝ် ရဲကၟိန်သ္ၚိဌာန်ကောန်ထံၚ်တံ ကဵုနၚ်လဝ်တံဂှ် ညးဆက်ဟီုရ။
ကပေါတ်ပါသေဝ်ထပၠုပ်နၚ်ထံၚ်တံဂှ် သွက်ဂွံယိုက်ပလံၚ် နူကဵုရုၚ်ဒုသ္ကိုပ်ကောပ်ကာဲထံၚ် ကဵုလဝ်တာလျိုၚ် ကောန်ရဲတဝ်သွာ အံၚ်တာန်လှိုၚ်တုဲ စၞမိက်ဂွံစသုၚ်တံဂှ် ဒုသ္ကိုပ်ကောပ်ကာဲထံၚ်ကျဝ်ထက်ဥူ ကဵုကေတ်နၚ်လဝ် မဒှ်ရ။
ဒုသ္ကိုပ်ကောပ်ကာဲထံၚ် ကျဝ်ထက်ဥူဂှ် ကဆံၚ်တာလျိုၚ် နူမွဲဍောၚ်ဂှ် တိုန်အာၜါဍုၚ်တုဲ ပ္ဍဲကဵုယန္တရာစဳရေၚ်ကောပ်ကာဲ ထံၚ်ကလေဝ်ဂှ်ကေတ်လဝ်တာလျိုၚ်ပေၚ်ၚ်ရောၚ် နူကဵု PPNM ကဵုလဝ်သမ္တီရ။
ပရိုၚ်-သြၚ်လောန်တိုၚ်မ်
Photo – Social Media