ဝါယှေန်တန်၊ ဂျာန်နဝါရဳ ၂၄
ဂကောံၜၚ်ပၞာန်အမေရိကာန် ပတဝ်အာမံၚ် ဍုၚ်အဳရာန်ယျ သမ္မတဒဝ်နေဝ်ထရ ဟီုလဝ်ပ္ဍဲဂျာန်နဝါရဳ ၂၂ ရ။
ကိုန်အစဳဇန်နျူကလဳယာ ကလေၚ်စကီု ဟွံသေၚ်မ္ဂး ညးထ္ၜးဆန္ဒးတံဂှ် ညံၚ်ဟွံဂွံဆက်ဂစိုတ်မံၚ် နကဵုအဳရာန်ညံၚ်ဟွံဂွံဆက်ကၠောန် ထရထပ်ကဵုလဝ်သတိတုဲ ဂကောံၜၚ်ပၞာန်ဏံ ညံၚ်ဟွံဂွံစကာအာ နကဵုညးတေံစၟဳလဝ်မံၚ် ဟီုရ။
ၜၚ်ပၞာန်ဇၞော်ဖ္ဍိုက်ၜၚ်ကျာ ယူအိတ်တ်သ် အေဗရာဟေၚ်လေၚ်ကောန်ကေုာံ ၜၚ်ပလီုပလိုက်ဂဇံက်စုတ်လဝ် မကမ်သၠောဝ်ထိၚ်သၞေဝ်တံ ခြာဟွံလံ စိုပ်ကၠုၚ်ဒေသ ဗၟံက်လဒေါဝ်ရောၚ် ညးတာလျိုၚ်အမေရိကာန် ဟွံထမံက်ယၟုမွဲတၠ ဟီုရ။
ပ္ဍဲကဵုဇရေၚ်ဒေသဗၟံက်လဒေါအ်ဏံ သွက်ဂွံဖျေံစွံအၐ သၞောတ်ပရေၚ်စဵုဒၞာသၞဂ္ၚေၚ်ကျာ စဳဇန်မံၚ်ကီုရောၚ် ညးတာလျိုၚ်အမေရိကာန် ဟွံထမံက်ယၟုမွဲတၠ ဟီုရ။
ယဝ်ရ အဳရာန်ဗတိုက်ကၠုၚ် ဗဒိုပ်ပၞာန်အမေရိကာန်ဖျေံလဝ်သ္ဇိုၚ် ပ္ဍဲဒေသတံမ္ဂး သွက်ဂွံစဵုဒၞာအာ သၞောတ်ပရေၚ်စဵုဒၞာကျာတံ ကိစ္စဇၞော်တိုန် မဒှ်ရ။
ပ္ဍဲသၞာံအာ ဂိတုဂျောန်တေံ ဗတိုက်လဝ်ဒၞာဲ နျူကလဳယာအဳရန်တံစွံလဝ်ဂှ်တုဲ လၟုဟ်ပၠန် ဟိုတ်နူထပ်ဖျေံလဝ်ဇြဟတ်ပၞာန်ဗီုဏံတုဲ ဒပ်ပၞာန်အမေရိကာန်တံ ပဵုတုဲစဵုဒၞာကဵုအပ္ဍဲဒေသတံမာန်ကီု ပရေၚ်ကေတ်အရေဝ်တၞဟ်လေဝ် ထပ်ဂွံကေတ်အာ လောဲသွာကၠုၚ်မာန်ရောၚ်။
ၜၚ်ပၞာန်ဗလးဏာလဝ်ကရပ်ဍုၚ်အဳရာန် နွံဗွဲမဂၠိုၚ်ရောၚ် အခိၚ်ထရ ကလေၚ်စဴကၠုၚ်နူကဵု သဘၚ်သဳကၠဳပရေၚ်ပိုန်ဒြပ်ဂၠးကဝ် ဟီုဂးလဝ်ကဵုအစာပရိုၚ်တံ လ္တူၜၚ်ကျာ Air Force One ရ။
အကြာအဳရာန်ကဵု အမေရိကာန်တံ အခိၚ်ကြံၚ်မ္ၚိုဟ်အသိသၠုၚ်မံၚ် နူကဵုသတ္တဟတုဲကၠုၚ်ဏံတုဲ ၜၚ်ပၞာန်အမေရိကာန်တံ တိတ်ကၠုၚ်လဝ်နူဒေသ အာယှ-ဖသိဖိတ် မဒှ်ရ။
စပ်ကဵု အဳရာန်စကာဇြဟတ် ပန်လဝ်ညးထ္ၜးဆန္ဒတံတုဲ အကြာဝါယှေန်တန်ကဵု တဳဟဳရာန် ပရေၚ်ကြံၚ်မ္ၚိုဟ် သၠုၚ်တိုန်မံၚ် မဒှ်ရ။
ယဝ်ရဂစိုတ်ညးထ္ၜးဆန္ဒတံမ္ဂး အမေရိကာန် နကဵုပရေၚ်ပၞာန် ဒးလုပ်ပသောၚ်အာဏောၚ် ထရဘပဠကီုလေဝ် ပ္ဍဲပေါဲထ္ၜးဆန္ဒအဳရာန် ညးချိုတ်လဝ် လၟိဟ်ကဵုလ္ၚီနွံဂှ် မုလေဝ်ဟွံကေတ်လဝ်အရေဝ်ဏီပုဟ်။
ဆဂး ဟိုတ်နူကဵု ပရေၚ်ကဵုသတိဏံတုဲ အစဳဇန်အဳရာန်သွက်ဂွံဂစိုတ် ဖျေံလဝ်အမိၚ်ဂစိုတ်ကောန်ထံၚ် ၜိုတ် ၈၄၀ ဂှ် ပလီုလဝ် ပ္ဍဲဂျာန်နဝါရဳ ၂၂ ဂှ် ထရဟီုရ။
ညးတာလျိုၚ်အဳရာန်တံ ဂစိုတ်ထောံထရရောၚ် ဟီုဂးလဝ်တုဲ ယဝ်ရဇကုဒှ်အာမွဲသာ်ၜါရာမ္ဂး ဍုၚ်အဳရာန် ကၠေံအာနူဂၠးကဝ်ရောၚ် ဟီုဂးလဝ်ရ။
အဳရာန်ပၠန်လေဝ် ယဝ်ရအမေရိကာန် ဗတိုက်ကၠုၚ်မ္ဂး ဗ္ဒိုပ်ပၞာန်အမေရိကာန်ၜိုတ်နွံမံၚ် ပ္ဍဲကဵုဒေသ နကဵုဇြဟတ်ပေၚ်ၚ် ကလေၚ်ပလန်အာရောၚ် ဘပဠလဝ်ရ။
Ref:Reuters