သွက်ဂွံစဵုဒၞာအာ ဍုၚ်ဗြဝတဳဂှ် ဒပ်ပၞာန်ဗမာကဵုလဝ်အမိၚ် ဒပ်ကရေၚ်ၜါဂကောံ ဒေါအ်လဝ်ပန်ပှော်တံ

ဗြဝတဳ၊ ဂျာန်နဝါရဳ ၂၄

တွဵုရးကရေၚ် သွက်ပရေၚ်ဂီုကၠီုဍုၚ်ဗြဝတဳ ဒပ် DKBA ကဵု KNU/KNLA PC ဒပ်ကရေၚ်ၜါဂကောံ ဒေါအ်လဝ်ပန်ပှော်တံ ပံၚ်တောဲကဵုဒပ်ပၞာန်ဗမာတုဲ ညံၚ်ဂွံကေတ်အာတာလျိုၚ်ညိ နူကဵုဒပ်ကဝ်မယှေန်ပၞာန် ဌာန်ဂအုပ်ပၞာန်ရးအဂၞဲ ကဵုနၚ်စၞောန်ပ္ညုၚ်ရ။

ပ္ဍဲကဵုဂျာန်နဝါရဳ ၁၉ ဂှ် သ္ကိုပ်ၝောံဒပ် ၂၂ သၟဝ်တဲဌာန်ဂအုပ်ပၞာန်ရး အဂၞဲ၊ DKBA၊ ကံၚ်သဳပရေၚ်ၜိုဟ်လလမ်ကရေၚ် KNU/KNLA PC၊ ဂကောံပရေၚ်ဆက်ဆောံဒပ်မၚ်ပယျဵုကရေၚ်တံ ဆဵုဂဗသဳကၠဳလဝ် ပ္ဍဲကဵုဍုၚ်ဗြဝတဳရ။

ပ္ဍဲကဵုတိဍာ် သၟဝ်တဲဌာန်ဂအုပ်ပၞာန်ရးအဂၞဲဏံ နူကဵုဒပ် BGF ဒေသဒပ် ၁၊ ဒေသဒပ် ၂၊ ဒေသဒပ် ၃၊ ဒေသဒပ် ၄ ရဲစုတ်လဝ်တဆိပ်ပၞး KNA တံ တိတ်အာထောံနူကဵုဍုၚ်ဗြဝတဳတုဲ ညံၚ်ဂွံအာမံၚ်ပ္ဍဲဒၞာဲဒေသဒပ် ၂ တေံ ဂျာန်နဝါရဳ ၂၅ ဂှ် စွံလက်ကရဴအိုတ်တုဲ ညံၚ်ဂွံရေၚ်တၠုၚ်အာ ကဵုလဝ်စၞောန်မွဲအလန်ဓဝ်ကီု သီုပတိတ်လဝ်လိက်ကဵုသမ္တီရောၚ် ဂွံတီရ။

ဟိုတ်ဂှ်ရ ဒပ် BGF တံ တိတ်အာတုဲမ္ဂး သွက်ပရေၚ်ဂီုကၠီုဍုၚ်ဗြဝတဳဂှ် ဒပ်ကရေၚ်ၜါဂကောံ ဒေါအ်လဝ်ပန်ပှော် DKBA ကဵု KNU/KNLA PC တံ ညံၚ်ဂွံပံၚ်တောဲကဵုဒပ်ပၞာန်ဗမာဂှ် မွဲအခိၚ်ဓဝ်ကဵုလဝ်စၞောန် မဒှ်ရ။

သွက်ဂွံစဵုဒၞာအာဍုၚ်ဗြဝတဳဂှ် အကြာဂကောံရပ်လွဟ်တံ နူအခိၚ်ကၠာတေံရ ကေတ်လဝ်တၚ်တုပ်စိုတ်နွံတုဲ ကိစ္စလၟုဟ်ဏံဂှ် ပရေၚ်သွက်ဂွံပ္ညဳပ္ညပ်ရေၚ်တၠုၚ်အာရောၚ်ဂှ် ညးအခေါၚ်ဟီုဂးနွံ ကံၚ်သဳပရေၚ်ၜိုဟ်လလမ်ကရေၚ် KNU/KNLA PC သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

“ပရေၚ်ဏံဂှ် တၟေၚ်တၟဟ်မံၚ်ဟွံသေၚ်ပုဟ်၊ ဒပ်ကရေၚ်နွံမံၚ် ပ္ဍဲကဵုဗြဝတဳတံရ ဍေံကဵုဍေံရ။ ဂကောံဖျေံလဝ်သ္ဂုတ်သွာတ်လေဝ်ဟွံသေင်ပုဟ် အတိုင်ဒၞာဲဒေသဍေံတံနွံမံၚ် ပကတိဒှ်မံၚ် သွက်ပရေၚ်ဂီုကၠီုဍုၚ်ဗြဝတဳဟီုတုဲ ဗီုဂပ်ဂဝ်ဂှ် BGF၊ PC တံ၊ DKBA တံ ကၠာတေံကၠောန်ကၠုၚ်မံၚ်ဟဂှ်ရ။ ပၟိက်ကိစ္စဒှ်မ္ဂး ဒးကၠောန်ရ။ သွက်ပရေၚ်ဂီုကၠီုဍုၚ်ဗြဝတဳ ဒပ်မွဲကဵုမွဲ ပ္ညဳပ္ညပ်ရေၚ်တၠုၚ်အာ အဲကၠိုဟ်ဗီုဏံ” သာ်ဝွံ သ္ဂးရ။

နူကဵု BGF ပြံၚ်သၠာဲထောံ ဒပ်ပၞာန်ကောန်ဂကူကရေၚ် KNA ဂှ် နူကဵုညးတာလျိုၚ်ကၟိန်ဍုၚ်တံ ကဵုလဝ်အခေါၚ်လုပ်သၞောဝ်ဟွံသေၚ် တုဲ ကဵုအခေါၚ်မံၚ်စံၚ်အာ လ္တူဍုၚ်ဟွံသေၚ်ပုဟ် သ္ကိုပ်ၝောံဒပ် ၂၂ ဟီုလဝ် ပ္ဍဲကဵုဂကောံရပ်လွဟ် ၄ ဂကောံဆဵုဂဗလဝ် မဒှ်ရ။

တုဲပၠန် တမ်ဒပ် ခလ၇ ၂၇၅ ဖျေံသ္ဇိုၚ်ဍုၚ်ဗြဝတဳတံ ယဝ်ရ ဒးဒုၚ်ဗတိုက်မ္ဂး သွက်ဂွံကလေၚ်ပ္လန်အာ ကြဳဗုမ်နကဵုၜၚ်ကျာ ခုတ်စၟတ်လဝ်ဒၞာဲ “ပေက်” ၁၈ ဒၞာဲနွံမံၚ်ရဂှ် သ္ကိုပ်ၝောံဒပ် ၂၂ ဘပလ လဝ်ရ။

မွဲအဆက်ဓဝ် ဗီုပြၚ် ဒပ် DKBA ကဵု KNU/KNLA PC တံ ဖျေံတြးလဝ်ဒပ် ပ္ဍဲဍုၚ်ဗြဝတဳကီု စနူဗီုရုပ်ဇၟာပ်ကောန်သ္ဂံၚ် သီုကဵုစရၚ်ယၟုတံဂှ် အပ္ဍဲဂျာန်နဝါရဳ ၂၄ စွံတ္ၚဲလက်ကရဴအိုတ်တုဲ ညံၚ်ဂွံပလံၚ်လဝ် နူကဵုကဝ်မယှေန်ပၞာန် ကဵုလဝ်စၞောန်ပၟိၚ်ရ။

အာတ်ကေတ်လဝ်တၚ်နၚ် ကောန်ဒပ်တံဗီုဏံဂှ်တှ်ေ ဒပ်မွဲကဵုမွဲ ညံၚ်ဟွံဂွံဗၠေတ်ဗၠေၚ်မှာရာအာ ဇကုကဵုဇကု ဒစးဒုၚ် ပ္ညဳပ္ညပ်ကေတ်လဝ်ဓဝ်ကၠိုဟ်ခၠၚ်ရ ကၠိုဟ်ကေတ်လဝ်ရောၚ် သ္ကိုပ်ဗိုလ်ဇၞော်သဝ်ကျဝ်ညောအ် ဟီုရ။

“လၟုဟ်အစဳဇန်ကိစ္စဗြဝတဳ ဗီုလဵုရောဟွံတီဏီ။ ယဝ်ရက္တဵုဒှ်ကၠုၚ်တှ်ေ မၞိဟ်ဟွံပါ ပ္ဍဲကဵုပဋိပက္ခဏံ ညံၚ်ဟွံဂွံမှာရာအာ နူသ္ဇိုၚ်သၟဝ်ဏံ ဒးပ္ညဳပ္ညပ်ကေတ်လဝ်ဓဝ်ကၠိုဟ်ခၠၚ်ကၠာ အဲညာတ်” သာ်ဝွံသ္ဂးရ။

ပြဟ်ဟ်ဏံ ပ္ဍဲလ္တူဍုၚ်ဗြဝတဳဂှ် ဒပ် KNU တံ ဆက်နွံမံၚ်ဏီတုဲ ဂျာန်နဝါရဳ ၂၅ လက်ကရဴ ယဝ်ရဆဵုကောန်ပၞာန် KNA တံ ဆက်နွံမံၚ်အပ္ဍဲဍုၚ်ဗြဝတဳတှ်ေ ကဵုလဝ်အမိၚ်ပန်ရောၚ် တမ်ရိုဟ်ကၞက်ပရိုၚ်ဒေသတံ သ္ဂးလဝ်ရ။

စနူကဵု ဒပ် BGF နူသၟဝ်တဲဒပ်ပၞာန်ဗမာဂှ်ပြံၚ်သၠာဲလဝ်ဒပ်ပၞာန် ကောန်ဂကူကရေၚ် KNA ဂှ်တုဲ နူကဵုဒပ်ပၞာန်ဗမာ ကရေပ်ဓရတ်ကၠုၚ် လ္တူ KNA ကီု ကြဳဖျေံဗုမ် ဗတိုက်လဝ်ကဵုၜၚ်ကျာလေဝ် နွံရ။

ပရိုၚ်-သြၚ်လောန်တိုၚ်မ်

Photo – Social Media