မတ်မလီု၊ ဂျာန်နဝါရီ ၂၃
အလုံမွဲဍုၚ် အပ္ဍဲကဵုသၞာံအာတုဲကၠုၚ် ပွိုၚ်မွဲသၞာံ ဟိုတ်နူၜၚ်ကျာကြဳလဝ်ဗုမ်ဂှ်တုဲ နူကဵုကဏ္ဍပရေၚ်ပညာ အစာ၊ အစာဗြဴကဵု ကွးဘာ ၉၆ တၠ ချိုတ်လဝ်နွံမံၚ်ရောၚ် နူကဵုဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် AAPP လလောၚ်တြးလဝ်ရ။
စနူကဵုသၞာံ ၂၀၂၅ ဂျာန်နဝါရဳ ၁ ဒဵုစိုပ်ဒဳဇြမ်ပါ ၃၁ ပ္ဍဲအလုံမွဲဍုၚ်ဂှ် ဟိုတ်နူဒပ်ကဝ်မယှေန်ပၞာန် အစာ၊ အစာဗြဴ နူကဵုကဏ္ဍပရေၚ်ပညာ ညးဗြဴ ၄၇ တၠကဵု ညးတြုံ ၄၉ တၠတံချိုတ်လဝ်ဂှ် သ္ပလဝ်ဒတန်သီုကဵုယၟုညးတံမာန်ကၠုၚ် သ္ဂးရ။
အပ္ဍဲဏံ နူကဵုဒေသရးသဂိုၚ် မၞိဟ်သၟဝ်အယုက် ၁၈ သၞာံ ချိုတ်အာ လဝ် ၇၁ တၠဂၠိုၚ်အိုတ်တုဲ နူကဵုတွဵုရးရခေၚ် ချိုတ်လဝ် ၂၇ တၠ ဒှ်မံၚ်ဒုတိယဂၠိုၚ်အိုတ်ရ။
ဟိုတ်ဖဵုပရောဒဒှ် ဒပ်ကဝ်မယှေန်ပၞာန်ပန်လဝ်ကဵုပၞာန်ကျာဂှ် မၞိဟ်ချိုတ်လဝ် ၈၀ တၠ ဂၠိုၚ်အိုတ်တုဲ ပ္ဍဲကာလတေံ သွက်ဂွံဆက်သ္ပအာဒတန် ယၟုမၞိဟ် ၁၆ တၠ သှ်ေမံၚ်ဏီရောၚ် AAPP သ္ဂးလဝ်ရ။
ပ္ဍဲကဵုသၞာံအာ ဂိတုအံက်တဝ်ပါ ၁၃ ဂှ် ပ္ဍဲကဵုကွာန်ဗာန်ဟာ ပွိုၚ်ဍုၚ်ဟာခါ တွဵုရးချေၚ် ဟိုတ်နူကဵုၜၚ်ကျာ ဒပ်ကဝ်မယှေန်ပၞာန်ကြဳလဝ်ဗုမ် ပ္ဍဲကဵုဘာဗတောန်လိက်ဂှ် ကွးဘာ ၃ တန် ဂျိုဟာန်ကဵု ကွးဘာသၟတ်ဗြဴ ၅ တန် ဇြုင်ကျေဝ်ရ်တံ ဒးကဝေက်ဗုၚ်တုဲ ချိုတ်အာလဝ်ရဂှ် ချူထမံက်ပတိတ်လဝ်ရ။
ပ္ဍဲဍုၚ်ဗမာ အခိၚ်သီလဝ်အဝဵုကြပ်ပေၚ်ပွိုၚ် ၅ သၞာံဏံဂှ် ဟိုတ်နူဒပ်ကဝ်မယှေန်ပၞာန်ကဵု ကောန်ရဲတဲသွာဍေံတံတုဲ ညးဍုၚ်ကွာန်ကောန်အရာပ် ၇၇၀၁ တၠ ချိုတ်အာလဝ်နွံ AAPP လလောၚ်ပတိတ်လဝ်ရ။
ပရိုၚ်-သြၚ်လောန်တိုၚ်မ်
Photo – Social Media