လ္ဂုၚ်၊ အံက်တဝ်ဗာ (၂၂)
ကြဴနူက္တဵုဒှ်ပရေၚ်ဗ္တိုဟ်ထ္ကး ပ္ဍဲထံၚ်အေန်ဇြုၚ် ဍုၚ်လ္ဂုၚ်တုဲဂှ် ကၟာတ်ထောံ အခေါၚ်ပလံၚ်ပါသေဝ် ပ္ဍဲထံၚ်စာတ်ဗွဲမဂၠိုၚ်တံဂှ်ဝွံ ကောန်ထံၚ်ပရေၚ်ထတ်ယုက်ဟွံခိုဟ်တံ ဒးဆောံလေၚ်လမျီု အရာဟွံမွဲပၟိက်တံ နွံကၠုၚ်မာန်ရောၚ် ကောန်ထံၚ်ပရေၚ်ဍုၚ်ကွာန်တြေံတံ ကေုာံ ညးချဳဒရာၚ်ပရေၚ်ဒဳမဝ်ကရေဇြဳတံ ဟီုရ။
တုဲကၠုၚ် ဂိတုအံက်တဝ်ဗာ (၁၉) တေံ နူကဵုဌာနဆဵုဂဗကောန်ထံၚ် ပ္ဍဲထံၚ်အေန်ဇြုၚ်ဂှ် က္တဵုဒှ်လဝ် ပရေၚ်ဗ္တိုဟ်ထ္ကးတုဲ သၞာဲဒဴဌာနက္ဍိုက်ပ် နူထံၚ်စာတ် (၃) တၠ ကေုာံ ကောန်အရာပ်ကၠုၚ်ပလံၚ်စၞစ ကုကောန်ထံၚ်တံ (၅) တၠ ချိုတ်အာလဝ်တုဲ ဟွံအောန်နူကဵု (၁၃) တၠ ကလိဂွံလဝ်ဝပ်ရ။
ဗွဲကြဴပရေၚ်ပရူဏံ က္တဵုဒှ်တုဲ ပ္ဍဲထံၚ်စာတ်ဗွဲမဂၠိုၚ်ဂှ် လ္ပာ်ကံၚ်ဇြဳပၞာန်သီအဝဵုတံ ကၟာတ်ထောံလဝ် အခေါၚ်ဆဵုဂဗ ကုကောန်ထံၚ်တံ ဟၟဲကဵုတ္ၚဲအပိုၚ်အခြာရောၚ် လလောၚ်ပ္တိတ်ကၠုၚ်ရ။
ကောန်ထံၚ်ပရေၚ်ဍုၚ်ကွာန်တံ မပါလုပ် ကောန်ထံၚ်တၞဟ်ဟ်တံဂှ်ဝွံ အပ္ဍဲထံၚ်ဂှ် ဟိုတ်နူစၞစ မဍိုက်ပေၚ်တဴကဵု အာဟာရတံကီု၊ ဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက် ဍိုက်က်ပေၚ်ၚ်ကီု၊ ဒၟါနူဂွံဒၟံၚ် ဂဥုဲဇဗ အာယုက်အိုတ်တ်တံသၟးဂှ်ရ ဒးဗ္ဒါဲဗ္ဒါဲဒၟံၚ် လ္တူစၞစ ကောန်သ္ၚိကၟိန်တံ မကၠုၚ်ပလံၚ်ကဵုတံဂှ်ရ။
ပ္ဍဲအကာဲအရာ မက္တဵုဒှ်ဒၟံၚ်သာ်ဏံဂှ် လ္ပာ်ကံၚ်ဇြဳပၞာန် ကၟာတ်ထောံ အခေါၚ်ဆဵုညာတ် ပလံၚ်စၞစ ကုကောန်ထံၚ်တံဂှ်ရ ကောန်ထံၚ်ပရေၚ်ထတ်ယုက်ဟွံခိုဟ် ဗွဲမဂၠိုၚ် အရာဟၟဲပၟိက် လမျီုဒးဆောံလေၚ်တံ နွံကၠုၚ်မာန်ဂှ် လျိုၚ်ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် (AAPP) မွဲတၠ ဟီုရ။
“ကၟာတ်ထောံ အခေါၚ်ဆဵုဂဗ ကောန်ထံၚ်တံတုဲ ပရေၚ်စသုၚ်ဂှ် ခက်ခုဲအာဏောၚ်၊ ပရေၚ်ထတ်ယုက် ခက်ခုဲအာဏောၚ်၊ ဂွံတီပရိုၚ် ကဵုပရိုၚ်တံဂှ် ခက်ခုဲဏောၚ်၊ ကောန်ထံၚ်တံ သၟးဟွံကပုဟ်၊ ဂြောဝ်ဂတာမ္ၚးဏံလေဝ် သွက်ကောန်ဇာတ်ဇကု၊ သွက်ကောဒေံဇကုတံဂှ် စိုတ်ဇီုကပိုက်မာန်ဏောၚ်၊ သွက်ကောန်ထံၚ်အပ္ဍဲတေံဂှ် သီုစိုတ်သီုကာယ ဇီုကပိုက်မာန်ဏောၚ်၊ ပရေၚ်စသုၚ်ဟွံပြေပြံၚ်ရပုဟ်၊ သွက်ပရေၚ်ထတ်ယုက်ဂှ်တှ်ေ ဂဥုဲဇဗတံ ပိုတ်အိုတ်ကၠုၚ်တုဲ ကောန်ထံၚ်အပ္ဍဲတေံ ဒးဂိအာ တၟာဂလိုၚ်ဏောၚ်” သာ်ဝွံ ဥူအံၚ်မျဵုကျဝ် ဟီုရ။
သ္အာၚ်နူဂှ်ပၠန် ပွမကၟာတ်ကၠေံ အခေါၚ်ဆဵုဂဗ ကုကောန်ထံၚ်တံဂှ်ဝွံ ဒဒှ်ရကံၚ်ဇြဳပၞာန် လုတ်လောန်ဝးပ္ကဝ်ဒၟံၚ် အခေါၚ်အရာမၞိဟ် ဇၞော်ကဵုဇြဟတ်ရဂှ် သ္ဂးရ။
ဟိုတ်နူကၟာတ်ထောံ အခေါၚ်ဆဵုဂဗ ကောန်ထံၚ်တံတုဲ ကောန်ထံၚ်တံကဵု ဂြောဝ်ဂတာညးတံ အခေါၚ်ဆဵုဂဗ ဟွံဂွံရကီု၊ ကၟာတ်ထောံအခေါၚ်ပလံၚ်စၞစတံဂှ်တုဲ နကဵုကောန်ထံၚ်တံသၟးဟွံက ဂြောဝ်ဂတာညးတံလေဝ် အရာမဒးဇီုကပိုက်တံ နွံကၠုၚ်မာန်ရောၚ် ကောန်ထံၚ်ပရေၚ်ဍုၚ်ကွာန်တြေံတံ သ္ဂးအိုတ်ရ။
ညးအုပ်ကာ ဗော်ဒဳမဝ်ကရေတ်တေတ် ဗွိုၚ်မၞိဟ်တၟိ ဒဝ်နှေန်န်မှိုဲဂှ်လေဝ် လ္ပာ်ကံၚ်ဇြဳပၞာန် ကၟာတ်ထောံ အခေါၚ်ဆဵုဂဗကောန်ထံၚ်တံဂှ်ဝွံ ပ္ဍဲကောန်ထံၚ်တံ တၚ်ဝါတ်ဂါတ် စပ်ကဵုပရေၚ်စသုၚ်တံ ကေုာံ ဂဥုဲဇဗတံ နွံကၠုၚ်မာန်တုဲ အပ္ဍဲအခိၚ်ကာလ ခြာဟွံလအ်ဏံ ထံၚ်ဟွံညိၚ်ဝတ် လရုက္တံၚ်က္တဴတံ က္တဵုဒှ်ကၠုၚ်မာန်ရောၚ် သ္ၚဳဂၠိပ်လဝ်ရ။
“ကောန်ထံၚ် မရပ်ချုက်လဝ် ပ္ဍဲထံၚ်တံ ဗွဲတၟေၚ် ကောန်ထံၚ်ပရေၚ်ဍုၚ်ကွာန်တံဂှ် ဟွံကဵုဆဵုဂဗကဵု ဂြောဝ်ဂတာညးတံမွဲသာ် ကဵုပလံၚ်ကၠေံ ပါသေဝ်သၟးဂှ် လောန်ၜက်အာဒၟံၚ် နူသၞောတ်ရ၊ ဒှ်ဒၟံၚ်ကိစ္စ ဝးပ္ကဝ်ဒၟံၚ် အခေါၚ်အရာမၞိဟ်တံရ၊ ဗီုပြၚ်စသုၚ်ပ္ဍဲထံၚ်ဂှ် ပရေံဒၟံၚ်အိုတ်ဍာ်ရ၊ ဒှ်ဒၟံၚ်ဗီုပြၚ် ဗ္စဒၟံၚ်စၞစ ပရေံအိုတ်တံဂှ်ရ၊ အေ ဇှ်ဂှ် ထပ်ကၟာတ်ထောံ အခေါၚ်ပလံၚ်ပါသေဝ်ဂှ်ပၠန်မ္ဂး အပ္ဍဲအခိၚ်ခြာဟွံလအ်ဏံ ပ္ဍဲထံၚ်တံဏံ အရာမထ္ၜးဆန္ဒတံ၊ ပွမအာတ်မိက်တံ၊ ဗကပ်ဗဗေၚ်တံ ဒးဂဗကၠုၚ်မာန်ရောၚ် အဲထေၚ်ကေတ်ရ” သာ်ဝွံ ဒဝ်နှေန်န်မှိုဲ နူဗော်ဒဳမဝ်ကရေတ်တေတ်ဗွိုၚ်မၞိဟ်တၟိ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ်ဂှ် ကံၚ်ဇြဳပၞာန်ဝွံ ပ္ဍဲကဵုထံၚ်အေန်ဇြုၚ်၊ ထံၚ်အိုဝ်ဗိုဝ် မာန္တလေဝ်၊ ထံၚ်ဍုၚ်ပြန်၊ ထံၚ်သာယာဝတဳ၊ ထံၚ်ထဝါဲတံဂှ် စနူဂိတုအံက်တဝ်ဗာ (၂၀) တုဲကၠုၚ်တေံတုဲ ကၟာတ်လဝ်အခေါၚ်ဆဵုဂဗ ပလံၚ်စၞစ ကုကောန်ထံၚ်တံရ။
ပ္ဍဲထံၚ်အေန်ဇြုၚ်ဂှ် မ္ၚးနူကၟာတ်ထောံ အခေါၚ်ဆဵုဂဗ ကောန်ထံၚ်တံဂှ် သီုကဵုအမှု ရုၚ်သၞောဝ်ဓဝ်တၟေၚ် ကေုာံ ရုၚ်သၞောဝ်ဓဝ်မ္ၚးတံ မစၟဳစၟတ်ဒၟံၚ်ဖိုဟ်တံဂှ်လေဝ် ဒေါအ်ဇူလဝ်ရောၚ်ဂှ် ဂွံတီကေတ်ရ။
ပ္ဍဲကဵုထံၚ်စာတ် အလုံကၟိန်ဍုၚ်မွဲတံဂှ် သီုကဵုမပါလုပ် ကောန်ထံၚ်ပရေၚ်ဍုၚ်ကွာန် မရပ်ဒက်လဝ် ကြဴနူဒပ်ပၞာန်သီအဝဵုတုဲတံ ကေုာံ ကောန်ထံၚ်တၞဟ်ဟ်တံဂှ် ဂၠိုၚ်ကဵုဠက် မၞုံဒၟံၚ်ရ။
ပရိုၚ်−သြၚ်လောန်တိုၚ်(မ်)